Read Angguruk Yali YESAYA 4 Bible Online

YESAYA 4 - Angguruk Yali bible

YESAYA 4

¹O ino sambil hiyap enebe sabirenen ap misig seneko ubam enele uruk lit, ”Nit yuwog weregma haren og nenesug lamin! Niren suburu nininggarehen tohon naruk lit sum nininggarehen tohon wan teg lamuhuk angge re neneseher angge fahet wenggeluk fug angge hindi se roho og nenesug lamin. Nit nenehunsi nunumalikisi elehen nininggali roho welamuhuk tohon!” ulug hiyag umuhup.

²Fobik NINIKNI Allahn Israel inap enengginang nin seiyap turuk laruhu. O ino sambil anggen sig anggolowon yihik feruk laruhumu Israel inap we tor angge onoluk welamuhubon arimanowen enengginang fanoman si roho wilip atuk angge fahet enehiyeg haruk lit nininggali roho welatukukteg nin hebeloho palimu atukuk ulug inindi se roho welamuhup.

³Ari tuhu li o Yerusalem inap tom Sion fam wereg lit we tor angge onoluk welamuhubon arimano Allahn numalikisi welamuhup ulug mumal tarisiyon ulug suwaleg lamuhup. It onoluk welamuhup ulug Allahn ununuk suwesingga fam haharoho emberisi.

⁴Alem kong tuhu sambil Ninikni Allah ahime inowen indok ambulpul turuk hag toho turuk lit yog o Sion hiyap unubam tag tehon puhun tebeselug ap enemep hinang eneptukon Yerusalem inap enebene werehon ik umag enebuhu.

⁵Ari tuhureg NINIKNI Allahn tom Sion men ap tom ino fam luhal arik waharuk lamuhubon men hondo enesugmen eneg welaruhu ulug unukoho fahet hina, hubanggo fahet indok ambulpul umbagpag turukon men hubu men werehap tuhu. Ari turuk lit NINIKNI Allah mondabi welaruhuwon inowen o pumbuk ari atogman atogma ungga hag toho hondo reg laruhu.

⁶Hondo reg lit mo olok tegma oho sakoma heriyeg ambeg hag toho welaruhu, siyeluwen osit pilabik waharukmu oho o saboma mapmu reg ambeg hag toho welaruhu.