Read Angguruk Yali YESAYA 40 Bible Online

YESAYA 40 - Angguruk Yali bible

YESAYA 40

¹”An numalikisi inindi enehiyehap enebiyok! Inindi enehiyehap enebiyok!” ulug Hinikni Allahn ele irisi.

²”Yerusalem inap inindi seyap enebiyok! Ininggik hele pug toho welatusa angge famen ketiya loloho wereg, iren siyag ane turuson oho elehap tirisi. Iren hare ane turuk latuson fahet Allah inggarehen sebe roho ayeg wat isarisi ulug hiyag esemek!”

³ Ap ekeyen ele hi roho urukon tu holeg lamek, ”Anggenma kebunggalem eleg ke ari NINIKNI waruhu ke yaho feruk lamek! Funggalem lekma Allah waruhu ke ari pikit toho hale feruk lamek!

⁴Fanggong teg ambeg fare feruk lamuhup! Punu reg ambeg men hu reg ambeg men tuwale feruk lamuhup. Lahuk wambuk teg ambeg tonggo aruhu.

⁵NINIKNI Allah umbagpag turukon seleg ino inam arik waharukmu ap obog tohowen yet hahup. NINIKNI Allahn we tem toho an nubam ele ari irisi.”

⁶Nin ap ekeyen ele hiyag nutuk lit, ”Hele ine roho uruk laruhun!” irisimu anden te, ”Nungge ane uruk laruhuk?” ulug kapal harikik. Kapal harikikmu ap inowen te, ”Ap kinangmon obog toho hoholangge hag toho wereg ulug hiyag isaruk laruhun. Ninine roho welahe peruk angge famen e owil loloho wamburukon hag toho wereg.

⁷NINIKNI Allah ambilik ahe fam fu isahu halug hoholangge lilog aruhu, e owil loloho wambuhu. We tem toho ap o pumbuk aruma werehon enebe hoholangge hag toho wereg.

⁸Hoholangge lilog aruhu, e owil loloho wambuhu angge famen Allah wene eneg mondabi wereg laruhu ulug hiyag isa lahun!” irisi.

⁹Hit Yerusalem hinap, tom yaron fam lahalug henele hi roho wene fanowon hiyag isahup! Wene fanowon hunubam weregma henekol eleg toho henele ine roho uruk lamuhup! ”Hinikni Allah tu waharukmu yet teg lamek!” ulug ap o pumbuk Yehuda inap hiyag isahup.

¹⁰ NINIKNI Allah mondabi palimuwon ino waharuk lit inggik ine roho turukmu yet hemek! Allahn ap Anden tohon amuhup ulug windat eneptisiyon arimano hondog eneplug waharuk.

¹¹Wam domba ngi ahun inowen domba umalik inggiken helmako walug laruk lit domba isinga oho fano roho hondog eneptuk hag toho Allahn ambohom fano roho fet enesug lit andog eneptuk.

¹²Ik humon yenggelehon nit ap kinangmon san inggik fam hinanggoho winahuk teg? Pohol atogman atogma nit ap kinangmon san wirim tuk teg? Kinang fabuli-fil lalug kinang alinlan ari san winahuk teg? San tom men punu men anggin wirim turuk angge fam embelug winahuk teg?

¹³ NINIKNI Allah fam ari-ari turuk laruhun ulug san hiyag um teg? Nit ap kinangmon san At komo ruk teg?

¹⁴NINIKNI Allahn te ap sa ubam, ”An nindi anggar atuk ane An hiyag nirik ma!” uruk? ”Pikir ane turuk lamin,” ulug ap kinangmon san NINIKNI Allah indi anggarap tuk teg?

¹⁵Nit ap o pumbuk wal-wal welaheyon ik kubag fam hinanggurukmu ampukpuk misig tep toho wamburukon hag toho welahe. NINIKNI Allahn nit ap kinangmon fahet kinang alinlan anggin eleg hag toho wereg peruk. Yinggi alinlan se reg hag toho ikanggen oho se reg peruk.

¹⁶Niren Allah fahet hubu lahabul ulug wam o Libanon farema werehon arimano obog toho watlareg o Libanon ohimu e anggolo werehon fam yalta halug oho Allahn yet haruk lit we tor angge wereg pelep.

¹⁷Nit ap kinangmon nununggul unuk wal taneg welaheyon NINIKNI Allah olohotma eleg hag toho welahe. Niren turuk ane Allahn te ket-ker ane turuk ulug yet nisaruk.

¹⁸Nungge-nungge Allah hag toho wereg ulug wirim tuk teg? Ap sa Allah men ambi reg?

¹⁹Usangge hag toho wereg ulug wirim tuk teg? Usangge ari aben lale felug ebene aliliyangge fano-fano angge emas perak men lahabe feruk.

²⁰Ap eke fano-fano angge emas perak men inggikmu eleg halug e fubut turuk elehon yami halug usangge yuk tuk fug tohon wit numag ulug ap inggik fanowon og utuk.

²¹Hit henepeleg toho welahep? Ap san pohol kinang wal tibag ulug aben hiyag hisarukmu indamen tulug ketiya oho holtuk lahep fug?

²²Kinang ari pumang tegma wal tibag ahun ino palimu heriyegma nit ap kinangmon herenangge hag toho apma welahe. Allahn pohol senegma ungga hag toho poholen nit sal nenesug.

²³Ap suwon welahe perukon Allahn elehap eneptuk. Unggum kong turuk inap kinangma werehon arimano inine eleg amag ulug apmaya feseruk.

²⁴It arimano eiyangge yaho ferukmu ket eneg umanggen kinangma pilaptukon hag toho weregma NINIKNI Allahn ambilik ahe fu isahumu lilog aruhureg e inggila lilohon siyeluwen walug laruk hag toho fu roho longgo uhup.

²⁵Allah ebe usa fulu rohon inowen ele uruk lit, ”Ap sa An men ambi roho wereg? An sa nim wirim naptuk lahep?” uruk.

²⁶Hinil pohol fil lahap haruk lit yet homok! San suhal obog toho wal tibag? Suhal anggolo winag isa fug toho wereg angge famen san winag isalug ununuk wal taneg uruk lit luhal arik maniyek ulug wol eneptuk? At ineyon palimu wereg lit wol eneptukmu misig oho pok atukon wereg eleg.

²⁷Hit Yakub umalikisi Israel hinaben henele uruk lit, ”Nit NINIKNI Allah mapmu welahe. Aben siyahap neneptukmu asengseng toho welahe angge famen At inowen nisaruk eleg,” uruk lahebon nungge fahet uruk lahep?

²⁸NINIKNI Allahn pohol kinang atogman atogma wal tibag ahun ino mondabi werehon fahet holtikip fureg henepeleg toho welahep? At sat haruk lit lisag haruk eleg. Mun ane man ane At indi oluk tehon aben onoluk am fug teg.

²⁹Sat werehon Aren elehap turuk, inine elehon Aren inineyap eneptuk.

³⁰Kabiniyonen sat haruk lit lisag turuk. Sawiyon salog-malog angge roho fuk turuk.

³¹NINIKNI Allahn let nenebuhu ulug yet teg lit wereg inap arimano Aren inine keron og isaruk. It arimano suwe kut aherabul ine werehen poholma yat toho laharuk hag toho wereg. Lahabeg laharuk lit uwag ele ruruk eleg, pilabeg wamburuk lit sat haruk eleg.