Read Angguruk Yali YESAYA 41 Bible Online

YESAYA 41 - Angguruk Yali bible

YESAYA 41

¹Allahn ele urukon tu, ”Hit o pumbuk obog toho yatma horogma ik humon yenggelehon ayeg ke welahebon henele eleg angge wereg lit An nele uruk lahiyon holeg lamok! Niraham wamuhupmu alem hiyahul ulug suwahal uruk lamuhuk.

²Ap misig yali filen waharukon san monde ferisiyon waharuk?[18] Tog abil laruk lit palimu eneg atukon ino san wol tirisi? Ap suwon kinang ki rohon pilap enebil laruk lit o pumbuk obog toho unusuhu ulug san inggikmu emberisi? At inowen karog fam kong eneptukmu ul hag atuk. Tog fam unusurukmu e inggila lilohon siyeluwen walug larukon hag toho wereg.

³Seliyon mug eneplug lalug koloweg waharuk lit uyuhen kinang sobit ha fug angge fililoho hag toho waharuk.

⁴Obog toho turuk latisi ane ari san turuk latisi? Hunumbasi atam welatfahon arimano wol eneptik iyag nahun inowen tirikik. An HINIKNI Allah tam welatik iyag nahun weregman eneg fobik oho mun angge man angge eleg aruhumu we An eneg welaruhuk.

⁵O pumbuk kinang atogman atogma werehon arimanowen Anden turuk latikik ane yet harusareg enekolen yuk turuk. It arimanowen nangginuhuk ulug enekolen palu arik waharuk.

⁶It-it let-ler atuk lit, ’Ninindi wirik toho welamul,’ uruk.

⁷Nungge-nungge e fam wituk ahunen emas laltuk ahun fam ele uruk lit, ’Usangge wibul,’ ulug indi ineyap turuk. Usangge ino wiri feruk lit ap ekeyen fano roho hale femin ulug helep simbuk fam tele felug are hiyag utuk lit, ’Ketiya umbagpag turuk angge sum wan tehon hag toho lombog tebemihin,’ ulug indi wirikap turuk. It itanowen enele uruk lit, ’Fano wiri feheyon tu yuk tuhu rohon,’ ulug posiyemanggen mondabi tele feseruk.”

⁸Allah ele urukon tu, ”Hit Israel hinap Anden mingming heneptik iyag, hit Yakub umalikisi mumal heneptik iyag. Abraham nindi reg latik iyahon umbusagsi hit welahep.

⁹Umu filon ahamu filon wol heneptikikteg kinang atogman hondog henebik waharikik. Hit fahet nirim puk fug angge ’Namingmingangge welaruhunen mumal habihi,’ ulug hiyag hisarikik.

¹⁰Hakol toho welam fug, Anden hat hibil atuk lahi. Hindi anggin toho welam fug, An Hikni Allah welahi. Hindi ineyap habuhukteg let haptuk laruhuk. An ninggik pikironen sen habuhukteg fanowap habuhuk.

¹¹Ap obog toho hunusik waharukon aben inda yako ininggaliyap enebuhup. Hit henele ying heneptukon Anden elehap enebuhukmu linggik-longgo uhup.

¹²Ap hunusik waharuk inap arimano wereg puhup angge famen pen isahupmu eleg lamuhup. Tog abul ulug waharuk angge famen obog toho linggik-longgo uhup.

¹³An HINIKNI Allahn hininggik sen henesug lahireg, ’Henekol toho welam fug, Anden hit let heneptuk lahi,’ ulug hunubam uruk lahi.”

¹⁴Allah ele urukon tu, ”Hit Israel hinap imbalo hag toho welahebon henekol toho welam fug. Hit Yakub umalikisi uluhan hag toho welahebon yuk la fug. An HINIKNIYEN let heneptuk laruhuk. Windat henebuhuwon ino Israel hinap Hinikni nebe usa fulu rehon An welahi.

¹⁵Helep simbuk ineyon angginon hag toho amuhuben Anden unduhuk hunubahakuk.[19] Tom punu hiren halog tuhupmu ul hag aruhu.

¹⁶Wiramna halog turukmu ahap al sahaltukon fu isarukmu laruk hag toho siyeluwen walug lahu. An HINIKNI nubahet henehiyeg toho wereg lit, ’Israel ninap Ninikni mondabi fanowonen let neneptisi,’ ulug wel naptuk lamuhup.

¹⁷An numalikisi siyag toho wereg lit inine elehon arimano ik yami rurukmen ik elehen enembilikanggen lilog aruhu. An INIKNIYEN it siyagma umbusuk fug teg lahireg enele holtuk laruhuk.

¹⁸Punumu ik eleg ambeg Anden ik eleruk suwon wilibi feruk lit tonggoman ik werehap tuhuk. Ik eleg ambeg sene yenggele fuhukmu kinang lilog teg ambeg ik eneg aruhu.

¹⁹Leimu e eleg ambeg Anden e ap alma hur atuk ahan wali hahon men wambumu hahon men inggila amben fano ahan men yaho fuhuk. E wilip am fug teg ambeg wilip amin uhukmu wilip aruhu.

²⁰Ap obog tohowen yet hahupteg NINIKNI inggiken aruma yaho ferisi ulug onoluk aruhureg Israel inap Inikni Allah fanowon inowen ari obog toho wal tirisi ulug An wel naptuk lamuhup.”

²¹Yakub umalikisi INIKNI Allah suwon raja inowen tu Allah hag toho wereg perukon unubam ele urukon tu, ”Alem yami rulen hunundama werehon wili fisiyek!

²²Indam welatfag inaben turuk latfag ane niren wenggel haruk lamuhuken hiyag nisa maniyek! Alem fobik aruhu ane nangginoho teko lahu peruk lamuhuken hiyag nesemek!

²³Hit we tem toho Allah hag toho welahep puhuken alem fobik aruhu ane hiyag nesemek! Niren yihi ulug kim hisahuken siyahon fanowon turuk eneg lamek!

²⁴Hiren welahe peruk lahep angge famen elehon hag toho welahep. Turuk lahep ane turuk eleg hag toho turuk lahep. Hit fil atukon enemben siyag toho wereg.

²⁵Ap misig mo lahik waharuk filen unduhuk ferikikteg[20] at unuk uruk lit wol tirikikmu ik ambut filen waharuk. O ulanggen puwa tag tebelug unuyuhen hondo ruruk hag toho at waharuk lit ap suwon welahe perukon arimano uyuhen sobir enebil waharuk.

²⁶San at waruhu ulug hiyag nisarisimu nonoluk alep? Tem toho puhuk ulug san atam hiyag nisarisi? Hiren henele tot hiyag nisarikip fugmu tor angge oho holtukuk fug.

²⁷Anden Sion inap ap eke waruhu ulug atam hiyag isarikik. Yerusalem inap wene fanowon hiyag isahun ulug ap eke monde ferikik.

²⁸Anden walinggoho yet isarukmen aben Allah hag toho wereg perukon misihen oho ele fano roho uk fug teg. Anden kapal isarukmen oho hebeloho hiyag nutuk eleg.

²⁹It Allah hag toho wereg peruk angge famen nungge-nungge tuk fug angge ap ler enebuk fug teg. Tu Allah hag toho ulug wirim turukon homhomo hag toho saplangge turuk.”