Read Angguruk Yali YESAYA 42 Bible Online

YESAYA 42 - Angguruk Yali bible

YESAYA 42

¹ Allah ele urukon tu, ”An namingmingangge Anden seneg lahiyon tu, ap Anden mumal tarikikteg nindi reg lahiyon tu yet hemek! Fano roho welamuhup ulug Anden ap komo eneptuk lahi ane o pumbuk obog toho hiyag isahuwen An nahime fanowon at ubam emberikik.

²Ele hum toho uk fug angge o iraham keyen eke ele ine roho hiyag isaruk laruhu fug.

³Fili hayu rohon si roho pilabe fusuhu fug. Indok anggen fil-turukon mondabi ware fusuhu fug. Anden ap komo eneptuk lahi ane aren ap obog toho hiyag isahumu it unubam alem werehon obog toho haloho emberuk lamuhup.

⁴Anden telep peruk ane kinang atogman atogma teko lawag ulug aren sat toho turuk laruhu angge famen ine eleg aruhu fug. Fili si ruruk hag toho at ino si aruhu fug. Ik suwon yenggeleg ke werehonen oho wene hiyag nisahu ulug nangno reg lit wereg.”

⁵Allah NINIKNIYEN pohol wal turuk lit ungga hag toho sale fibag. Aren kinang lale fibareg wilip atuk angge yaho fibag. Aren ap kinangma werehon onoluk welamuhup ulug sat kilap enepfag. At inowen amingmingangge fam ele urukon tu,

⁶”An HIKNIYEN numaliki fanowap enebuhun ulug wol haptikikteg hinggik sen haptuk lahi. Ap kinangmon ununggul unuk wal taneg werehon numaliki amuhupteg An men mangno roho welamuhuken hat unduhuk hubaharikik. O pumbuk obog toho fahet iral hag toho wereg lit

⁷inil hupnihon fenggen eneptuk laruhun. Ininggik hele waroho hik teg ambeg werehon ininggik lisoho wilip eneptuk laruhun.

⁸An nunuk HINIKNI Allah welahiyon ino we misig welahi. An nubam umbagpag turukon ap ekeyen hila fug teg. Aben An wel naptuk hag toho usangge winon wel tuk fug teg.

⁹Indam hiyag isiyag ane arimano hikit toho teko larisi. Ketiya wene keron eke hiyag hisaruk laruhuk. Alem uwan wilip atuk elegma Anden tam hiyag hisaruk laruhuk.”

¹⁰Sini keron NINIKNI Allah fahet yunggultuk lamuhup! Kinang atogman atogma werehonen wel turuk lamuhup! Ik fam werehon obog tohowen haglabut turuk lamuhup! Ap yatma ik humon yenggelehon ayeg ke werehonen Allah fog turuk lamuhup!

¹¹Ap o pumbuk anggenma werehonen enehiyeg toho enele uruk lit Kedar inap inibam wal tanehen Allah wel turuk lamuhup! Owikmu werehon men[21] punumu werehon menen enele enehiyehen hi roho uruk lamuhup.

¹²It arimanowen NINIKNI Allah palimuwap turuk lit yatma ik suwon ayeg ke werehonen oho At wel tukag ulug hiyag isaruk lamuhup.

¹³Tog aptuk inaben sehen seneko tog abul ulug wilip atuk hag toho NINIKNI Allah wilip atuk. Otsi unuyug seyap eneptuk lit ngik-ngog sup turuk lit it nim seli rehon obog toho unusuhu.

¹⁴Allah ele urukon tu, ”Amusun toho nele eleg angge welatikik. Nele imin peruk latikik angge famen nele irikik fug. Hiyap malik indag tuk oho lit memeltuk hag toho ketiya nele memeloho imin.

¹⁵Ik tom famen wambik waharukon firihap tuhukmu hoholangge kinangma wilip atukon lilog aruhu. Ik suwon larukon men ik sene yenggelehon men firihap tuhukmu kinang lilog aruhu.

¹⁶Numalikisi inil hupnihon kebunggalem enepeleg ambeg ininggik seneko hondog eneplug lahuk. Hik tegma lahup ke Anden selehap tuhukteg kalem yaho eleg ke Anden hale fuhuk. Unubam ari tuhuk ulug tem toho peruk lahiyon ari umbusuhuk fug.

¹⁷Usangge fam we tem ulug wenggel haruk lit hit ninikni Allah hag toho welahep uruk inap arimano nik neng uhupteg ininggali hahup.”

¹⁸Allah ele urukon tu, ”Hit hinisanggo sok larehonen holeg lamok! Hit hinil hupnihonen yet teg lamok!

¹⁹Hit Israel hinap An namingmingangge wereg lit wene hiyag isaruk lamuhuben hunumbaharikik angge famen hinil hupnig lit hinisanggo sok lareg lit welahep hag toho sa eke wereg?

²⁰Anggolo hinil fam yet haruk lahep angge famen hinindiyen wenggel haruk lahep fug. Hinisanggo leho feruk lahep angge famen holtuk lahep fug.”

²¹NINIKNI Allah indiyen fanowap enebuhuk peruk lit wene ap komo eneptuk lahi ane su atukmu numalikisi wene ari apma welamuhup ulug og isarisi angge famen

²²it arimano enenggengge obog toho taluk toho hilarusareg enebe hele waroho kinang fo reg ambeg kilap eneptusa. It ininggik lisoho og eneplug larukmu windar eneptukon eleg latisi.

²³Ap sa isanggo leho feruk lit alem ari fobik wenggel haruk laruhuwen holtuk?

²⁴Ap san Yakub umalikisi unubam huhul kukag ulug nunumbaharisi? Ap san Israel inap ininggik lisoho og eneplug lawag ulug nunumbaharisi? NINIKNI Allah ubam siyag ane turuk latukukmu At amuwen nunumbaharisi. Kebunggalem Aren hal neneptisi angge famen ninirim ulug laruk latukuk fug. Ari-ari turuk lamuhup ulug hiyag nisarisi angge famen niren holtuk latukuk fug.

²⁵Allahn undama ahe laharukon obog toho nunubam wili ferisi. Tuhi humon nunubam monde ferisimu o walinggoho harep naruk lit nenebe oho na hag teg latisi angge famen ninindi wenggel ha fug angge welahe.