Read Angguruk Yali YESAYA 43 Bible Online

YESAYA 43 - Angguruk Yali bible

YESAYA 43

¹NINIKNI Allahn hit Yakub umalikisi Israel hinap wal henepfahon inowen ele urukon tu ketiya hiyag hisaruk lahi, ”Hakol ha fug, Anden windat habuhuk. Hunuk uruk lit wol haptikikteg hat Anden ngi hasug lahi.

²Ik paltukmu og habuhu rohon ulug Anden fet hasug lahi. Indok yanggo ke lahunmu indok ambulpul laharuk lit wiyal habuhureg hinahu fug.

³An HINIKNI Allah nebe usa fulu rehon welahi. Israel hinap windat heneptuk lahiyon An welahi. Hit Israel hinap An ninggikmu welamuhuben Mesir inap, Sudan inap, Syeba inap men ayeg war isaruk lahi.

⁴Hat An nolohotma fano angge hag toho weregma nindi reg lahiyon fahet ap enebe ambiyang hun isaruk lahi. Hat holuk welamag ulug o pumbuk wal-wal werehon ayeg war isaruk lahi.

⁵Hakol ha fug, Anden hat fet hasug lahi. Hat humalikisi yali fil hubula fil werehon wol enebuhukteg andog enebuhuk.

⁶Umu fil werehon unubam og nesemek il laruk lit ahamu fil werehon unubam oho sen enesug lam fug uhuk. Numalikisi ap umalik yatma werehon walug maniyek, hilani umalik kinang atogma werehon hondog eneplug maniyek!

⁷It arimano An nunuk fam ununuk suwal enesug. An wel nabukag ulug werehap eneptik iyag.”

⁸Allahn ele urukon tu, ”Numalikisi inil wereg angge famen fuki roho haruk elehon men inisanggo wereg angge famen fuki roho holtuk elehon men hondog eneplug maniyek!

⁹O pumbuk ekeyon-ekeyon palu arik wamag. Ununggul unuk wal taneg luhal arik wamag. Iren Allah hag toho wereg ulug wel eneptukon san fobik tuhu ane fahet nonolukap nenepmisi? Ketiya teko larukon fahet san tam hiyag nisarisi? Inisanggo fam holtuson arimano in amusareg tem toho puhuben ulusama ap obog tohowen hol halusa.

¹⁰Hit Israel hinap aruma An hinilen niyarikip. At ino wereg ulug hiren wenggel haruk lamuhuben An namingmingangge welamuhup ulug mumal heneptikik. An uwanma An Allah hahon eke welatfag fug. An eleg alema An hahon eke welalep fug.

¹¹HINIKNI An welahi, fanowap heneptukon ap winon An hahon eke wereg eleg.

¹²Anden eneg teko lahuwon fahet hiyag hisarikik. Anden eneg windat henebik waharikik. An Allah hag toho werehon winon eke hit sehelimu welatisi fug. An Hinikni Allah misig eneg welahiyon hit hinilen niyarikip.

¹³Fobik oho Hinikni we An welaruhuk. Mun angge man angge ninggikmu seneg lahiyon ap ekeyen kobog isa fug teg. Anden ari roho tuhuk peruk lahi ane aben apmayap tuk fug teg.”

¹⁴Israel hinap windat heneptukon HINIKNI Allah ebe usa fulu rehon inowen ele hunubam urukon tu, ”Hit fahet nindi ulug ap o Babilonia mon enebik waruhukteg hit sen heneptusama welahep ambeg sok larehon hut heneptuk laruhuk. Babilonia inaben enele enehiyeg toho uruk angge famen Anden unusik waruhukmu enele ya nga uhup.

¹⁵An HINIKNI fanowon Allahn hit Israel hinap wal heneptik iyag. Hinikni suwon raja An welahi.

¹⁶Anden ik humon pul ke kong tibiyareg funggalem hale fiyag.

¹⁷Sehen seneg inap kereta men wam kuda men fam lahibareg unusul ulug mug eneplug mondoko libahon arimano Anden ik fam unusimin ulug mon eneptik iyag. It arimano in am fug toho waroho yinggig latfag. Indok ambulpul war atuk hag toho war atfag.

¹⁸Hinikni umban indam turuk latfag ane wenggeloho welam fug.

¹⁹Anden alem keron yatuk lahi ane yet teg lamok! Anden yatikikmu ketiya wilip atukon henepeleg toho welahep? Ap eleg ambeg oho kebunggalem Anden yaho feruk laruhuk, ik eleg ambeg oho ik werehap feruk laruhuk.

²⁰An numaliki mumal eneptikikonen naruk lamuhup ulug ik eleg ambeg ik werehap tuhukmu lekma ik suwon wilip aruhumu olomene men huhubi men mun angge man angge farema werehonen An wel naptuk lamuhup.

²¹An numaliki welamuhup ulug werehap eneptikikonen Allahn fano ane tirisi ulug An fog naptuk lamuhup.”

²²Allahn ele urukon tu, ”Hit Yakub umalikiyen An wol naptikip fug. Hit Israel hinaben sat toho yami naptikip fug.

²³An wel nabik oho lit wam senggeltikinteg An fahet hubu lahaptikin fug. Anggin angge humaloma emberuk lit naruk angge numbahiyok ulug heng haptikik fug. Amben fano angge yal nitmihin ulug hindi siyahap toho heng haptikik fug.

²⁴Amben fano angge An nubahet ayeg waroho warikin fug. Wam esetug sei fam nindi nahiyehap naptikin fug. Haren siyag ane eneg turuk latikinon famen nindi angginap naptikin. Hare ane tirikinon famen nindi siyahap naptikin.

²⁵Anden huwatle angge famen let haptukon An welahireg siyag ane turuk latikinon elehap turuk lahi. Hare ane haren tirikinon fahet wenggel haruk laruhuk fug.

²⁶Alem kong turuk ambehen suwahal ulen ma! Anden tem peminen haren tirikin ane fag toho nubam in!

²⁷Humba tam welatfahonen[22] An ambol yig nutuk lit siyag ane turuk latfag hag toho honowesi suwonen oho An fahet ninirim peruk lit tuk fug ane turuk latusa.

²⁸Hit fet henesuhon arimanowen An nibam siyahap turuson ari fahet Yakub umalikisi Israel inap unusuruk lit ininggaliyap enebukag ulug ap og isarikik.”