Read Angguruk Yali YESAYA 44 Bible Online

YESAYA 44 - Angguruk Yali bible

YESAYA 44

¹Allahn ele urukon tu, ”Yakub An namingmingangge, Israel mumal tarikikon, ketiya holeg lamok!

²An HIKNI hat wal haptik iyahon inowen nele imin. Hisinga ahummuwen werehap haptik iyareg let haptuk lahiyon inowen hiyag hitmin. Yakub An namingmingangge, hat mumal haptikikon hakol ha fug.

³Kinang lilog teg ambeg osit pilabik waharuk lit kinang ik eleg ambeg ahaluweyap turuk lahi hag toho hat humalikisi An nahime fanowon unubam pilabik waruhukteg hat humbusagsi nindi enesug laruhuk.

⁴Hame ik senema wilip atug yat atuk hag toho e furuk ik ayegma wilip atukon hag toho it arimano inine roho welamuhup.

⁵It welamuhubon arimanowen enele uruk lit misihen, ’An NIKNI Allah anggengge welahi,’ uhumu ekeyen unuk Yakub suwal tahu. Hinahanehon te, ’An NINIKNI Allah amloho welahi,’ ulug inggikmu hahatuk lit unuk Israel suwal tahu.”

⁶Israel inap windat eneptukon INIKNI suwon pohol kinang senehonen ele urukon tu, ”Tam An eneg welatik iyareg fobik oho mun ane man ane eleg aruhu halug An eneg welaruhuk. Ap winon An Hinikni hahon eke wereg eleg.

⁷Ap sa An hag toho wereg? Misig wereg halug in aruhureg ele uruk lit An wirim naptuk lamag. Ap san indam famen fobik aruhu ane fahet hiyag isaruk latfahon wereg halug in atmisireg fobik aruhu ane fahet nunubam ele ik wamag.

⁸Henekolen lagmag uruk lit yuk la fug! Indam angge Anden ketiya teko larukon fahet hit hiyag hisaruk latikik. An hag toho Allah eke wereg ulug hiren hinilen harikip halug iyek! Tom fam helep fal werehon hahon winon An napeleg.”

⁹Allah tu hag toho wereg ulug wirimangge lale feruk inap inine mondabi eleg. Wirimangge iren lale ferukon arimano inindiyen wel turuk angge famen wirimangge arimanowen let eneptuk eleg. It wel turuk inap arimano inil elehen yet ha fug angge inindi elehen wenggel ha fug angge werehen ininggali aruhu.

¹⁰Ap san Allah hag toho wirim timin ulug lale feruk halug saplangge laltuk angge ariyen let tuk fug teg laruhu.

¹¹Usangge wituk inap arimano ap kinangmon eneg werehen usangge ngi inap obog toho ininggali hahup. It arimano obog toho palu roho in arik maniyek ulug wol enebuhupmu yuk lagmag uruk lit ininggali hahup.

¹²Posiyemanggen wituk ahunen wirimangge lalmin ulug indokma wiraho felug inggik ine roho simbuk fam teltuk. Suburu men ik men na fug angge sat toho teltukmen ine eleg atuk.

¹³E sali ruruk ahunen hele fam wirim tebelug tu hag toho witmin ulug hahatuk angge fam pale felug yaha fam sali ruruk lit ap hag toho lale feruk. Lale felug ap fanowon lale fihi ulug olma imbik kuruk.

¹⁴Sali ruruk ahun inowen farema lalug e sin mug tamin peruk. Nin e salama men panduk men ineyon yami rik laruk lit wali ei yag tarukmu osit ubam wamburuk lit su aruhu.

¹⁵E ari walug watug fumag fil aben indok sun halug yet tarukon fahet yaltuk. Nin suburu men wam unu men wiratmin ulug yale felug wirahowon ino naruk halug ahum atuk. Ahum atukmu indok yet taruk lit, ”Nahiyeg, indok yet taruk lahi, nubam inahan aha,” uruk. Ari roho wereg angge famen e fumag fil Allah hag toho wirim timin ulug lale felug olohotma kunuk toho hur atlug sembahyang uruk lit, ”Hat an nikni Allah hag toho welahenonen windat naptuk laruhun!” ulug wel turuk.

¹⁸Ap ari il yowilen seleben tehen yet ha fug toho wereg. Indi sohu reg lit wenggel ha fug angge werehon ariyen mun ane man ane apeleg toho wereg lit indi anggar am fug angge wereg.

¹⁹Ap inowen ele uruk lit, ”E fumag filon indok munggaltuk lit suburu men wam unu men wirarihireg ninggi. Fumag filon tu Allah hag toho wereg ulug wirimangge lalihi. E lilohon alukema heriyeg lit wel turuk lahi,” ulug ari elep angge famen indi anggat teg elehen uruk eleg.

²⁰Ap inowen indok abulolo fam let nabin ulug sembahyang hag toho saplangge turuk lit indimuwen ele si ane anggolo peruk. ”Nele ying naptuk angge ninggikmu seneg lahi,” uruk elehen at ino oluk fano welaruhu fug.

²¹Allah ele urukon tu, ”Yakub umaliki Israel hinap, An namingmingangge welahep ane fahet honoluk toho welamuhup. Namingmingangge aruhun ulug werehap haptikikon An napeleg am fug teg lahi.

²²Indok hubu eleg atuk hag toho An hambol yig nutuk latikinon elehap tirikik. Hina homhomowen fu isarukmu longgo uruk hag toho siyag ane haren tirikinon nambiliken fu isarikik. Anden hat windat haptuk lahireg suhuloho An nambeg waruhun.”

²³Yakub umaliki Israel inap arimano inggik ineyon fam windar eneptuk latisi ulug poholma werehonen Allah sini ik kuruk lamek! Kinangma werehonen NINIKNI Allah uruk lit henele hum toho uruk lamek! Tom fam werehon men e farema werehon menen henehiyeg toho sini uruk lit Allah wel turuk lamuhup!”

²⁴HIKNI Allahn hisinga ahummuwen werehap haptisireg windat haptisiyon inowen ele urukon tu, ”Anden mun angge man angge wal tiyahon ino namuwen pohol leho fiyag, kinang hondo ribiyag. Ap misihen oho An let napfag fug.

²⁵Aben fobik aruhu ane fuluwap tehe peruk angge famen Anden elehap turuk lahi. Nei fulu roho waruk inap Anden enele ying eneptukmu inindi sohu roho welamuhup. Mun ane man ane onoluk inap Anden apmayap eneptuk lit ninindi anggat teg lahe perukon inindi nonghonga feseruk lahi.

²⁶An namingmingangge enele ineyap eneptuk lit[23] Anden mon eneptuk lahiyon enele teko lawag ulug unduhuk feruk lahi. Anden nele uruk lit, ’O Yerusalem inap suhuloho kik wamuhupteg Yehuda walinggoho o pumbuk olunap tibibahon arimano ubalma keron wibuhup,’ ulug hiyag isaruk lahi. An ninggarehen o halog toho siyahap tibibahon arimano nin hebeloho wiri fuhuk.

²⁷Anden ik ahum yaron firig amin uhukmu firig aruhu. Ik suwon wirig atukon eleg amin uhukmu eleg aruhu.

²⁸Ap suwon unuk Kores ino fam, ’Haren numaliki fer enesug laruhun,’ ulug hiyag utuk lahi. Anden peruk lahi ane aren turukmu teko laruk laruhu. At inowen, ’O Yerusalem nin wituk lit Allah ibam olun oho fuhupteg uwag pilabuhup,’ ulug hiyag isaruk laruhu.”