Read Angguruk Yali YESAYA 46 Bible Online

YESAYA 46 - Angguruk Yali bible

YESAYA 46

¹Allah ele uruk lit, ”Babilonia inaben tu Allah hag toho wereg perukon Bel men Nebo men itano mako wamburuk lit kinangma fuk toho yingguruk. Usangge Bel men Nebo men enebe wirim toho wirihon itano Babilonia inaben tam sat toho ha roho laruk latuson arimano ketiya ap seliyonen hilahup tohon ulug wam keledai kuda men enemberimu imbik laharukmu wam arimanowen anggin toho ha rulug laruk lit sat haruk.

²Usangge Bel men Nebo men itano fuk toho yinggurukmu iren let enebuk fug teg. Usangge itano oho ap hele waroho hik isaruk ambeg imbisik laruk.

³Israel hinap we tot welahebon obog tohowen An nele holeg lamek! Hit hinisingasi enehummuwen indag heneptuk latfag sambilen tulug ketiya oho An ninggiken mako pug toho fet henesug lahi.

⁴An HINIKNI Allah weregman eneg hit sabal amuhup. Anden hit walinggoho fet henesugmen eneg honoruk hubulu wilip amuhup. An wal heneptik iyag nahunen wanggi waroho fet henesug lit windat heneptuk laruhuk.

⁵Hiren An Allah ap sa men wirim tul peruk lahep? An men wirim tohon eke wereg ano?

⁶Ap enesum famen umbagpag turukon emas hinanggo feruk lit ili ruruk angge perak anggin wirim halug emas wituk ahunen emas perak tu fam usangge wit nisawag ulug onggo og utuk. Usangge ino wiri ferukmu iren enelenggen fam hur atuk lit usangge ino wel turuk.

⁷Wel turuk inaben usangge ino unumaloma ha roho walug imbik laruk. Emberuk ambeg itano unduhuk lit amu hihiloho la fug teg. Aben enele ine roho at ubam uruk angge famen aren hebeloho ele uk fug angge ap asengseng harukon arimano windat enebuk fug teg.

⁸Hit siyag ane turuk hinaben alem tu fahet hinindimu wenggel haruk lamuhup!

⁹Atam teko laruk latfag ane fahet hinindi honoluk toho welamek! An eneg Allah welahireg An hahon eke wereg elehen hinindi anggat toho welamek!

¹⁰Anden fobik inam aruhu ane fahet atam hiyag isarik iyag. Alem uwan teko la fugmu Anden indam hiyag isarik iyag. Kong toho emberuk lahi ane hikit toho teko larukmu nindimuwen peruk lahi ane Anden turuk laruhuk ulug An nele uruk lahi.

¹¹Anden ap misig mo lahik waharuk filen wol turuk lahimu at inowen kong toho emberuk lahiyon turuk laruhuwen yat filen suwe tunguni hag toho waharuk. Anden nambilik fam uruk lahiyon ninggiken waruk laruhuk. An nindimuwen wenggel haruk lahiyon ninggiken teberuk laruhuk.

¹²Allahn let nenebuhu sambil yatma wereg ulug An nubahet ninirim peruk lahebonen An nele tu holeg lamek:

¹³Anden hit ili og henebuhuk li horog teg. Anden windat henebuhuk sambil yatma wereg puk fug. Anden o Yerusalem windatuk lit Israel hinap mondabi palimuwap henebuhuk,” ulug Allahn ele uruk.