Read Angguruk Yali YESAYA 48 Bible Online

YESAYA 48 - Angguruk Yali bible

YESAYA 48

¹Hit Yakuben ondohowonen ondohowon wereg lit hununuk Israel hinap suwaleg lahebonen anden iminon holeg lamek! Nunumba Yehuda inowen endetfahonen ondohowon welaheyonen NINIKNI Allah unuk fam sali emberuk lit Israel ninap Ninikni Allah wel turuk lahe ulug henewelwel tubat taruk lahep angge famen At ubam hinindi isanggoman wenggel haruk lit Aren fano perukon turuk lahep fug.

²Hiren ninibam Allahn mumal tibag ambeg wereg ninap welahe uruk lit Israel ninap NINIKNI Allah unuk pohol ha kinang ha wal tibag ahun suwalehon famen welahe ulug palimuwap taruk lahebonen holiyok!

³NINIKNI Allahn ele urukon tu, ”Alem teko laruk latfahon Anden indam hiyag hisarik iyag. Alem arimano uwan teko la fugmu nambiliken tem toho hiyag hisarukmu hiren holtik ibag. Hiyag hisarik iyag ane hikit toho helep sipuk turuk hag toho turuk latik iyag.

⁴Hit hununggul uwag arik teg lit hinindi imbik wamburuk lahebon An noluk teg lit

⁵fobik teko laruk ane atam hiyag hisarik iyag. Hiren henele uruk lit, ’Nit nunumbasi e men ine angge besi men fam wit tarukukon arimanowen hiyag nisaruk ane hikit toho mun ane man ane teko laruk,’ uhup tohon!

⁶Anden tam hiyag hisarik iyag ane hikit toho teko larukmu hiren yet harik ibag angge re tem toho hiyag nisibag ulug fag toho iyok! Ketiya famen Anden alem keron henepelehon Anden hirako foroho lahiyon hiyag hisaruk laruhuk.

⁷Alem keron ari indamen oho wal tiyag fureg ketiya eneg wal tihi angge re hiren alem ino fahet tam holtukukteg nonoluk atisi uk fug teg lahep.

⁸Hit hinisanggo lareg lit nungge-nungge holtikip fureg Anden turuk lahiyon fahet hinindi anggar atuk eleg. An nele holuk fug angge henenduhun yig nutuk lahep ane fahet hununuk salikap toho ’Inisinga ahummuwen wilip atusa sulen Allah ele ying turukon’ suwaleg lahebon An noluk.

⁹Ari fahet Anden hit elehap heneple angge famen Anden sali iyahon fahet wenggel haruk lit nindimu nolok haruk lahi ane hondo rebeseruk latikik. An nunuk wel naptuk ane eleg aruhu rohon ulug hit siyahap heneptikik fug.

¹⁰Melei indok olokon fam puhun tebeseruk hag toho Anden hit hik hisarikikteg asengseng toho wereg ane ari feneyen puhunap enebuhuk ulug wal hisarikik. Wal hisarukmen siyag angge hunubam ine roho tag tehen eleg am fug angge hunubam tag tegma kim hisarikik. Hit siyag hinap welahepma kim hisarikik angge famen An numalikisi welamuhup ulug mumal heneptikik.

¹¹Nit nunubabut fano werehen Allah nit ninibil atuk puk fug! An namuwen fano peruk lahi ane hikit toho let henebuhuk. An nunuk siyag aruhu rohon ulug windat henebuhuk. An nubam umbagpag turukon ap ekeyen hila fug teg. Aben An wel naptuk hag toho usangge winon wel enebuk fug teg,” ulug Allahn ele uruk.

¹²Allahn ele uruk lit, ”Israel hinap nori, hun Yakuben ondohowonen ondohowon welahebon Anden numalikisi welamuhup ulug wol heneptikikon, Anden iminon holeg lamek! We An namu eneg Hinikni Allah welahi. An tam welatik iyag nahun weregman eneg fobik oho mun ane man ane eleg aruhumu we An eneg welaruhuk.

¹³An ninggik nineyonen kinang ahongge yaho fiyareg pohol ungga hag toho sale fiyag. An nele fam wal tirik iyagma pohol ha kinang hayen An nele holtuk.

¹⁴Hit Israel hinap obog tohowen Anden iminon holtihiben palu arik maniyek! Ketiya teko laruk ane ap san hiyag hisarisimu holtikip? We Anden eneg tam hiyag hisarikik. An HINIKNI Allahn ap misig nindi reg lahiyonen Anden fano peruk lahi ane hikit toho turuk lit Babilonia inap arimano apmayap enebuhu.

¹⁵We Anden eneg nele uruk lit ap nindi reg lahiyon ino wol tirikik. An nele famen eneg hun ari waruhumu aren tuhuk puhu ane obog toho fano teko lahu.

¹⁶Anden hiyag hisaminon fano holtihiben An niraham maniyek: Indamen tulug ketiya oho Anden nele hirako uruk latikik fug. An mondabi welahiyonen nele uruk lahiyon ari indamen tulug ketiya oho teko laruk,” ulug Allahn ele uruk. Ari urukon hiyag isaruk laruhun ulug NIKNI Allahn an mon naptuk lit At ahime fanowon an nubam emberisi.

¹⁷Nit Israel ninap NINIKNI Allah usa fulu reg ahun nit windat neneptukon inowen ele urukon tu, ”Hit HINIKNI Allah An welahi. Anden hit fano welamuhuben milal heneptuk lit kebunggalem lahup ke yag heneptuk lahi.

¹⁸Anden ari-ari turuk lamuhup ulug komo heneptik iyahon hiren seneg lalep halug ik suwon firig am fug angge laruk eneg hag toho hit henebe fano roho wereg lit hinindi yuwag toho welalepma mun ane man ane fano roho haleg lalep.

¹⁹Hiren endebuhubonen endebuhubon arimano ik yinggi mondeg hag toho ap misihen oho winag isa fug teg lalepma Anden it ununuk eleg amag ulug nambol yig esele fug,” ulug Allahn ele uruk.

²⁰O Babilonia kinangman wilip amuhup! Wilip atuk lit henehiyehen henele hi roho, ”NINIKNI Allahn nit Yakuben ondohowonen ondohowon At amingmingangge welaheyon windat nenebehek,” ulug hiyag isil lahupmu ap obog tohowen kinang atogman atogma holtuk lamuhup.

²¹NINIKNI Allahn wiliboho lei keyen hondog eneplug larukmu ik obok haruk lamuhup fug. Ik nawag ulug helep pul ke pilang tuhumu ik narukon wilip aruhu.

²² NINIKNI Allahn ele uruk lit, ”An nele holtuk elehon arimano enebe fano wereg lit inindi yuwag toho welamuhup fug,” uruk.