Read Angguruk Yali YESAYA 49 Bible Online

YESAYA 49 - Angguruk Yali bible

YESAYA 49

¹Hit o pumbuk yat toho welahebon, anden uruk lahi ane aru holeg lamok! An nisingan uwan indag nabuk fugmu NINIKNI Allahn nunuk wol naptisi. Nisinga ahummu weregma namingmingangge welaruhun ulug mumal naptisi.

²Karog olokon hag toho an nambilikmu emberisireg At inggik indanggen apma numbaharisireg fet nasug lit wereg. Tog tolumon hag toho numbaharisireg aminggin tog hirap sehelimu kilap naptisi.

³Allahn nubam ele uruk lit, ”Israel nare, hat namingmingangge welahenon famen An Hikni nubabut fanowon ino inam aruhu,” irisi.

⁴Anden hebeloho nele uruk lit, ”Saplangge lisag anggolo harikikmu elehon fahet yuhun angge nine eleg atisi,” irikik angge famen NIKNI Allah nibil aruhuwon an noluk. Anden turuk lahiyon fahet onggo fet nasug lit wereg.

⁵NINIKNI Allahn nisinga ahummuwen namingmingangge aruhunteg Yakub umalikisi Israel inap suhuloho nambeg palu enebik waruhun ulug mumal naptisi. NINIKNI Allahn an fahet fano perisireg ine og nitisi. Allahn mumal naptisiyon inowen ele urukon tu,

⁶”Hat An namingmingangge wereg lit Israel inap ununuk nin su amag ulug Yakub umalikisiyen ondohowon we tot werehon arimano suhuloho palu enebik waruhunon ita we tor angge hiyag hitikik. Ap o pumbuk obog toho unubam seleg aruhu ulug hat iral hag toho unduhuk hubaharuk lahi. Anden ap obog toho fanowap enebik oho waruhukon ap kinang inditmu-inditmu werehon inindimu onoluk aruhu.”

⁷Allah amingmingangge ino fahet o pumbuk obog tohowen ninirim peruk lit inggaliyap turukmu ap suwon enemingmingangge hag toho wereg. At ino ubam IKNI Allah fanowon Israel inap windar eneptukon inowen ele uruk lit, ”Ap suwon kinang seneg inap arimanowen Anden hat windat habuhuk ane yet hahupteg in atuk lit hat hi haptuk lamuhup. Allah Israel inap Inikni ebe usa fulu rehon hat mumal haptisiyon inowen hat inggik kobog hiya fug angge palimuwap haptisi ulug ap suwonen halukema hur atlug wel haptuk lamuhup,” uruk.

⁸ NINIKNI Allahn umalikisi unubam ele urukon tu, ”Anden windat henebuhuk sambil hit henele uruk lamuhubon holuhuk. Anden numalikisi fanowap enebuhuk sambil hit let henebuhuk. Ap o pumbuk kema-kema werehon obog toho fobik An numalikisi amuhupmu An min mangno roho welamuhuk perikik. Ari perikikteg Anden hit tam mumal heneptikikteg fet henesug lahi. Henengginang fare laharisi ambeg Anden nin hebeloho og hisahukmu hit henebe wal taneg ngi amuhup.

⁹Anden ap ininggik hele waroho werehon unubam, ’Wilip amek!’ uruk lit hik teg ambeg werehon, ’Seleg tegma maniyek!’ ulug wol eneptuk laruhuk. It arimano kebunggalma laruk lit wam domban punumu nungge-nungge wilip atuk eleg ambehen oho hoholangge enehum toho naruk hag toho iren oho suburu anggolo naruk lamuhup.

¹⁰Suburu men ik men obok haruk lamuhup fug. Leimu laruk lit mo olok ha fug angge welamuhup. Nindi roho fer enesug lahiyon inowen ik eleruk fanoma hondoko umbusuhuk.

¹¹Tom fene funggalem fanowon yaho fuhuk. Numalikisi wamuhup ke hale fuhuk.

¹²Numalikisi yatman waharukon yet esemek! Ik eleruk filen eke hubula filen eke Sinim kinangmon[26] eke waharuk.

¹³Poholma werehon men kinangma werehon menen sini ik kuruk lamag! Tom fam welahebon oho hinindi henehiyeg toho welamuhup. NINIKNI Allahn umalikisi enehiyehap eneptuk lit siyag toho werehon indi enesug lit wereg.

¹⁴Yerusalem inaben enele uruk lit, ”NINIKNI Allahn nit nunumbaharisireg indimu apeleg atisi,” irikim

¹⁵Allahn hebeloho ele uruk lit, ”Hiyaben umalik fu angge apeleg am teg? Ninggarehen indag tarikik ulug indi harukon ino umbusuk teg? Hiyaben umalik apeleg am hag angge famen Anden hit napeleg am fug teg.

¹⁶An ninggik indanggenma hununuk hahareg lahi. Hinibam elehet walinggoho kilabehon yet haruk lahireg hit napeleg aruhu fug.

¹⁷Aben hinibam keron wit hisahuben kik waharukmu hinibam halog turusa inap hunumbahalug wilip amuhup.

¹⁸Hinilahe leko walinggoho yet esemek! Honori ninibam lul ulug hit henembeg luhaloho kik waharuk. Tik-tem toho Hinikni noluk welahiyonen nele uruk lahi: Ap waharukon arimano hit heneliliyangge amuk oho waharukmu nit nenebe anggolo atukuk ulug henehiyeg toho welamuhup.

¹⁹Aben hinibam halog turuk lit henengginang siyahap turusama ap eleg ambeg hag toho welatisi angge famen ketiya ap anggolo kik waharuk lit kinang keleg uhu. Hinibam pin kuruk latusa inap arimano yatma linggik-longgo uhup.

²⁰Hiyap malik indag taruk elehon hag toho welahe perikip angge famen hunumalikisi anggolo kik wamuhupteg enele hunubam uruk lit, ’Kinang tuma keleg irisimu nit welamuhuken kolo nesemek!’ uhup.

²¹Ari uhupmu hinindimuwen wenggel haruk lit, ’Malik aruma obog toho san indag nitisi? Numalikisi linggik-longgo urusama ibili atuk lit malik eleg angge welatikik fug? Ninggik hele waroho yanggal naptusa fug? Lin nubaharusama nuwag misig eneg welatikik angge famen it aruma keman kik waharusa? Malik aruma san kul eneptisi?’ puhup,” uruk.

²²NINIKNI suwon Allahn nin ele urukon tu, ”An ninggik leho ferukmu yet niyahupteg ap o pumbuk walinggoho werehonen hit hunumalikisi ap umaliket hiyap umaliket unumaloma ha eneplug wamuhup.

²³Ap suwonen hit hunumalikisi kul eneptuk lamuhup. Hiyap suwonen ag mon eneptuk lamuhup. It suwon arimanowen onorohole han kinangma ying atlug hi heneptuk lit hunuyugmu ololongge werehon milang heheg naruk lamuhup. An HINIKNI Allah welahiyon fahet hit hinindi anggar aruhu. An yet nasug lit werehon arimano ininggali hahup fug.”

²⁴Hiren henele uruk lit, ”Ap sehen seneg ahunen huhulangge hilarisiyon ari ap ekeyen taluk tuk teg? Ap olok ahunen hele waroho fer enesuhon ap ekeyen loluk teg?” uruk lahep.

²⁵NINIKNI Allahn ele uruk lit, ”Ap sehen seneg ahunen hele waroho fer enesuhon aben lol enebuhup. Ap olok ahunen huhulangge hilarisiyon aben taluk tahup. An namuwen eneg hit hunusuruk inap unusuruk lit hit hunumalikisi windar enebuhuk.

²⁶Hit siyahap heneptukon arimanowen ininggareg ununu wisal heheg nawag ulug Anden og isahuk. Ininggareg enemep nahupteg anggur ahaluwe olokon nalug nenek turuk hag toho nenek turuk lamuhup. An hit Israel hinap HINIKNIYEN numalikisi ininggik loloho welamag ulug windat heneptuk lit nine roho turuk lahiyon fahet ap kinangmon obog toho onoluk amuhup,” uruk.