Read Angguruk Yali YESAYA 5 Bible Online

YESAYA 5 - Angguruk Yali bible

YESAYA 5

¹An nare nindi reg lahiyon inowen hom yabuk witisiyon fahet sini eke iminon holeg lamek![5] An nareyen tom alem ke yabuk kinang fanoma hom yabuk witisi.

²Aren kinang habultuk lit helep eneko wili feserisi. Hom fano ahom en heheg yaho ferisi. Yabuk aru ap ekeyen foroho laruhu ulug o yaron misig pulmu wiri ferisi. Hom ebe endetlug aling hik isaruk ambeg fahet kinang habuli ferisi.[6] Ebe fano wilip amag ulug an nareyen nangno rurukmen hom ino osir ahom ele rurukon wilip atisi.

³Ketiya an nareyen ele uruk lit, ”Nori, Yerusalem hinap men Yehuda hinap men welahebonen an men nahom asan men fahet alem hale fiyek!

⁴Yabuk aru fahet anden nungge tirikik fug? Obog toho fano witikik angge re nin fobik eke nungge wiruhuk? Anden ebe fano umbukag ulug nangno rurukmen nungge fahet hom ino osir ahom ele rurukon eneg wilip atisi?

⁵Ari fahet ketiya anden yabuk aru fahet tuhuk ane hiyag hisamin: Anden elehet walinggoho kilaptikikon ino halog toho hik-hak isahukmu abet wamet kuhupteg unuyuhen sobit-sabar isaruk lit ebe obog toho nahup.

⁶Hoholangge siyahon yabuk aru fam anggolo wilip aruhu. Wanggun fam kinang habuloho sarongge enetuk laruhuk fugmu alog ahele anggolo wilip atuk lit fare humon lahaku. Anden, ’Osit yabuk aru fam pilabik wam fug,’ ulug hina fam hiyag isahuk,” ulug an nareyen ele uruk.

⁷Yabuk aru ngi ahun NINIKNI Allah pohol ha kinang ha senehon ino wereg. Yabuk uruk lahiyon ino Israel hinap men Yehuda hinap aruma hunubahet uruk lahi. Hit aruma NINIKNI Allahn ahiyeg toho yag heneptisi hinap welahep. NINIKNI Allahn te iren alem weregma fano roho kong turuk lamuhup perukmen hit-hit kong-kong atuk lahep. Allahn it-it let-ler atuk lamuhup perukmen hit-hit wat-war atuk lit ya nga uruk lahep.

⁸Yabuk ayeg waroho hilil laruk lit o anggolo witil larukon arimano siyag amuhup! Ari roho turukmen eneg it enemuwen eneg kinang obog toho ngi reg lamuhupmu ap misig oho kinang elehen it iniraham welam fug teg laruhu.

⁹Ari fahet NINIKNI Allah pohol ha kinang ha senehon inowen anden holeg lit weregma sali emberisiyon tu, ”O suwon fanowon arima fam ap welamuhup fug. O anggolo arima halog toho lin uhup.

¹⁰Iniyabuk anggur yaho ambeg numen fam anggur anggen kubag misig eneg yihik fuhu. Eiyangge teng uhan yaho felug anggen numen eneg yahaluhup.”

¹¹Hubet-habet in atug ik olokon nul ulug yami ruruk lit ik olokon narukmen eneg o hup atukmu oho ying aptuk lit umahayeg eneg turuk. Nunundama inahan amag ulug ik anggur ahaluwe narukon arimano siyag amuhup!

¹²Onori men ik olokon naruk lit pinggong puhuli waruk men enele urukmu hol haruk angge famen NINIKNI Allahn inggik ineyon fam turuk ane wenggel haruk eleg.

¹³Ari fahet Allahn ele urukon tu, ”An numalikisiyen mun ane man ane fahet wenggel haruk elehen ininggik hele waroho hondog eneplug o winama imbisik lahup. Onowesi roho werehon arimano suburu oboken inine eleg aruhumu unumalikisiyen ik obok haruk lamuhup.”

¹⁴War atuk ane inowen ap arimano mag-mag pil isamin ulug ambilik ila reg. Pil isahumu fanik-fano angge o Yerusalem werehonet enehiyehen ngik-ngog turukonet mondabi eleg amuhup.

¹⁵Ap obog toho apmayap enebuhumu apma kunuk toho welamuhup. Hemet til larukon arimano ininggaliyap enebuhu.

¹⁶NINIKNI Allah pohol ha kinang ha senehon ino eneg palimu wereg lit unggum haloho umbuhu. Allah ebe usa fulu ahunen sali imbibag ane hikit toho alem kong turuk laruhu.

¹⁷Ap siyag amuhubon inibam halog toho lin uhubon seheli ke wam domban hoholangge nil laruk lamuhup. Tung inaben lin isahup angge wam kambing arimanowen naruk lamuhup.

¹⁸Enele si ane uruk lit siyag ane turukon siyag amuhup! Wam kumbi fam lisoho walug laruk hag toho alem siyahon lisoho unubamap taruk.

¹⁹Iren enele uruk lit, ”Allahn tuhuk peruk ane ninilen yet hulen folo-folo tukag! Israel ninap Ninikni ebe usa fulu rehonen alem angginon unubam umbuhuk ulug kong toho emberisiyon fahet nonoluk atmisiyen folo-folo nunubam amag!” uruk.

²⁰Siyag ane fahet fano, fano ane fahet siyag urukon siyag amuhup! Hik tehon fahet seleg, selehon fahet hik teg uruk, unduk sig tehon fahet unduk fano, unduk fanowon fahet unduk sig teg uruk.

²¹Ininggareg fahet ninindi anggat toho wereg lit mun ane man ane nonoluk ninap welahe perukon siyag amuhup!

²²Enehako roho ik olokon naruk lit enembong se roho amben angge eke hag eke hag ik olokon fam kilaptukon siyag amuhup!

²³Siyag ane turuk inaben onggo og isarukmu iren it inibil atuk lit alem unubam emberuk eleg, siyag ane turuk elehon siyag ane tirikip ulug un ane unubam lombog eneptuk.

²⁴Ap arimanowen NINIKNI Allah pohol ha kinang ha senehonen alem ari-ari turuk lamuhup ulug komo nenepfag ane fahet ninirim peruk lit Israel ninap Ninikni Allah ebe usa fulu rehonen ele urukon sobir isaruk. Ari fahet ulu angge indoken narukmu mondabi eleg atuk hag toho ir oho mondabi siyag amuhup. E umanggen filik atukmu owil halo urukon homhomowen fu isarikim olohulong hag toho linggik-longgo uruk hag toho ir oho longgo uhup.

²⁵NINIKNI Allahn umalikisi fahet olok haruk lit unusimin ulug inggik leho lit wereg. Unusirikim tom yuk elek turukmu ap waroho lin-lan isarukon sal enebuk fug angge weregma aben hik isaruk angge hag toho kalemma yinggig lamuhup. Ari obog toho teko lahu angge famen Allahn olok haruk ane eleg aruhu fugmu numalikisi unusimin ulug inggik imbik wambuk fug angge lehoman eneg welaruhu.

²⁶An numalikisi men tog abik wamuhup ulug enehangge eke yaho felug ap o pumbuk yatma werehon wol enebuhu. Wol enebuhumu ap seliyon arimano kinang atogman pupu angge wamuhup.

²⁷Wamuhubon arimano inine anggolo reg lit misig oho salog-malog angge roho wat ta fug angge wamuhup. Saren kel taruk lit nohul puk fug angge pahaluk enelunggu ke pug tehon men unuyug hililip angge men nonggoloho la fug angge wan toho wamuhup.

²⁸Enentog fano kiyarehon seneg lit enesehen inggila saloho wamuhup. Enembohom kuda unuyug helep arikon hag toho weregma kereta wam arimanowen lisoho walug laruk angge fam siyelu waharuk hag toho folo-folo wamuhup.

²⁹Mene olokonen hilak turuk hag toho enele ngik-ngog il wamuhup. Olomeneyen ele ngu ruruk lit pak wat talug walug larukmu ap misihen oho pak ino taluk toho wa fug teg hag toho ap seliyon arimanowen Allah umalikisi unusik wamuhup.

³⁰O ino sambil ik hul salalang tik wamburuk lit aplohok hum toho tung turuk hag toho unubam tuhumu yet harukmen hina singonen o seleg hikap tirikim o hiken kinang atogman atogma hondo reg laruhumu ap obog tohowen enekol haruk lamuhup.