Read Angguruk Yali YESAYA 50 Bible Online

YESAYA 50 - Angguruk Yali bible

YESAYA 50

¹NINIKNI Allahn ele urukon tu, ”Ahunen uhe yanggaltuk hag toho Allahn nit yanggal neneptisi peruk lahep? An nuhe welaruhu fug ulug suwesingga haharoho emberikikon ino kema wereg? Numbali sa anggengge paleg lahiyon fahet hit ayeg waroho og isarikik? Hit hininggarehen siyag ane turuk latikibon ari fahet hit ayeg waroho og isarusa. Hininggarehen tuk fug ane turuk latikibon ari fam yanggal atikip.

²Nungge fahet An waharikikon ap elegma waharikikteg wol heneptikikmu henele irikip fug? Inggik horog teg lit windat nenebuk fug teg, ine elehen let nenebuk fug teg peruk lahep? An nambilik fam eneg wiliptukon ariyen ik ahum suwon firig atuk lit ik wirig atukon teng uhureg yinggi am teg. Yinggi atukmu ik oboken ikan waroho lin uhup.

³Anden pohol hina fam hililip turuk lit aben fesi wan turuk hag toho anggulog singon fam hililip turuk lahi.”

⁴”Ap inine elehon hele unubam uruk lit inineyap eneptuk laruhun,” ulug NIKNI suwon Allahn nambilikanggen ot yuhon hag toho og nitisi. An ot hag toho nele holmisi ulug Allahn hundig-hundig hubet nisanggo sok hut naptuk.

⁵Aren nindi anggarap naptisimu nirim ulug nambol yig utuk latikik fug.

⁶Aben e paleg fam nuwabul ulug waharuson nambol yig isarikikteg panisung fil-nabukag ulug norohole unug isarikik. An ninggaliyap naptuk lit wasubag sup niyarukmu norohole hirag tarikik fug.

⁷NIKNI Allahn let naptuk lit weregma an mondabi ninggali roho welaruhuk fug. Ninggali roho welaruhuk fug ulug nindimu noluk tehen nindi helep ineyon hag toho welaruhuk.

⁸Aren an nahap siye napmin ulug nibil atukon ino horogma werehen san an nim suwahal imin ulug waruhu? Nit ambiyeg unggum walug lulen ma! Ap san unggum nubam embemin perukon ino niraham wamag!

⁹NIKNI suwon Allahn let nabik oho waharukmu ap san un ane lombog nabuhu? Lombog nabuhup inap arimano sum filik turukon pak yeliyen il kong turuk asum hag toho welamuhup.

¹⁰Hit welahebon san NINIKNI Allah fahet akol toho wereg lit amingmingangge ele holtuk? Ap sa hik teg ambeg weregma seleg ubam waharuk eleg halug at inowen IKNI Allah unuk fam wenggel haruk lit Allah ubam himbit aruhu.

¹¹O harep pisabul ulug indok hunduko hik tik laruk lahebon inowen hebeloho hininggareg hina waruhu. NINIKNI Allah inggarehen hit siyagma hik hisahumu in am fug angge yinggig lit welamuhup.