Read Angguruk Yali YESAYA 51 Bible Online

YESAYA 51 - Angguruk Yali bible

YESAYA 51

¹NINIKNI Allahn ele urukon tu, ”Hit NINIKNI Allahn windat nenebuhu ulug yami ruruk lahebonen An nele holeg lamok! Tom ayegma helep hag toho fele roho og heneptusa ambeg men kinang habuloho lit-heneptusa ambeg men yet homok!

²Hunumba Abraham men uhe Sara hit indag henepfahon men yet homok! Abraham amu eneg welatfagma wol tiyareg ineyap tiyagma umalikisi anggolo atfag.

³Anden Sion inap enehiyehap turuk lit inibam siyag atisiyon hal isahuk. Fare laharisi ambeg Eden yabuk fanowon hag toho tuhukteg lei reg ambeg An nangginang hag toho yabukap tuhuk. Yabukap tuhukmu enehiyeg toho wereg lit An wel nabul ulug sini yunggultuk lamuhup.

⁴Hit numalikisi welahebonen hinisanggo leho lit nele holeg lamek! Anden ap obog tohowen tuk hag teg ane fahet o pumbuk wal taneg hiyag isaruk lahi. Hiyag isaruk lahiyon ari iral umbagpag hag toho unubam aruhu.

⁵Ap enepelegma folo-folo fanowap enebik waruhuk. Let enebuhuk sambil horog teg. Mun ane man ane haloho umbuhuk ulug An ninggik ineyon fam o pumbuk obog toho sen enesug laruhuk. O pumbuk yatma werehon arimanowen oho An ninggik fam let nenebik oho waruhu ulug yet nasug lit wereg.

⁶Hinil poholma lahap hahupteg kinangma pilap hahup. Pohol hubu eleg atuk hag toho eleg aruhu. Kinang sum filik turuk hag toho filik aruhu. Ap kinang ino fam welamuhubon arimano elemiyaha hag toho eleg amuhup angge famen Anden windar enebuhukon mondabi ininggik hele loloho welamuhup. Fanowap enebuhukon mondabi fano welamuhup.

⁷Numalikisi welahebon, ari-ari turuk lamuhup ulug hiyag hisiyag ane hinindimu wenggel haruk lit tu fano tu siyag ulug honoluk teg lahebon holeg lamok! Aben hininggaliyap heneptuk lit pet heneptukmu yuk la fug angge henekol toho welamuhup fug.

⁸Sum siyahon filik tehon pak yeliyen il kong turuk hag toho it arimano serep-serep ina wamuhup. Anden fanowap eneptuk lahiyon mondabi fano welamuhup, windar eneptuk lahiyon arimano welatfahonet welamuhubonet mondabi ininggik hele loloho welamuhup,” uruk.

⁹Allah NINIKNI in atmihinteg hinggik ine roho leho lit let nenebik watmihin! Indam hine roho in atik inag hag toho ketiya oho in atmihin! Haren pisanggo humon Rahab[27] kong toho watuk lit ahako folok toho watik inag fug?

¹⁰Ik humon haglabut miyaloho waharukon sipuk toho firiha fisinagma ap Haren windar eneptik inahon arimano kolo reg keyen ik fumag libag fug?

¹¹Sion inap Allahn windar enebuhuwon arimano inibam fil waharuk lit Allah sini yunggultuk lit enehiyeg toho mondabi welamuhup. Inindi anggin eleg angge ngesekum tuk fug angge enehiyeg toho welamuhup.

¹²Allah ele uruk lit, ”An Hinikniyen hinindi henehiyehap heneptuk lahi. Ap hoholangge halo ruruk hag toho war atuk. Nungge fahet it unubahet henekol toho welahep?

¹³HINIKNI hit werehap heneptuk lit pohol lahapfareg kinang pilapfahon ino nungge fahet henepeleg toho welahep? Ap seliyonen onolok toho siyahap henebuk oho turukmu nungge fahet henekolen hunuwag elek turuk lahep? Ap seliyon inindimu ahe laharuk lit onolok perukon arimano kema wereg?

¹⁴Ininggik hele waroho werehon arimano lol amuhupmu suburu obok ha fug angge wereg lit mondabi war amuhup fug.

¹⁵HINIKNI Allah An welahi. Anden ik ahum ke haglabut watuk nahun nunuk te HINIKNI pohol ha kinang ha senehon welahi.

¹⁶Anden pohol lahaptuk lit kinang pilaptuk lahiyon inowen Sion hinap hunubam, ’Hit An numaliki welahep,’ uruk lahi. Anden nawene fanowon ap hiyag isaruk lamuhup ulug henembilikmu emberuk lit ninggiken mapmu henesug lahi,” uruk.

¹⁷Hit Yerusalem hinap in atlihipteg yet teg lamok! Allah ambilik ahe olokon ik kubag elma kila ferisireg hinang hisarisimu narikip. Ik inil fulug turuk ahik hinang hisarisimu lup toho obog narikip.

¹⁸Hunumaliki anggolo indag eneptikip angge famen misihen oho hininggik sen heneplug kebunggalem fanowon larukon hiyag hisarisi fug.

¹⁹Ap seliyonen pin kuruk lit karog fam hunusurusama hinibam olun atisimu suburu oboken war atuk lahepma ap san onggon henebuhu? Alem piren ihiyon ari hunubam atisimu ap san hit fahet uba yatuk laruhu?

²⁰Wam eli yep turukmu kulug wareg hag toho hunumaliki inine elehen ke ilanma ying atuk. Allahn ambilik ahe olokon unubam atisimu in am fug teg lit wereg.

²¹Hit siyahap heneptusama ik olokon nalug inil fulug turuk hag toho hinil fulug tirisi.

²²HINIKNI suwon Allahn hit At umalikisi welahebon ili og heneptukon inowen ele urukon tu holeg lamok, ”An nambilik ahe olokon ik kubag elma kila ferikikteg hinang hisarikikon hininggikmuwen uwag oko hilahuk. Ik inil fulug turuk ahik hinang hisarikikon nin fobik eke nahup fug.

²³Ap hit siyahap heneptuson arimano eneg kubag fam ik ino hinanggoho ininggikmu og isahuk. It arimanowen tam hit hunubam enele uruk lit, ’Nunuyuhen sobit husulen honorohole han yinggig latlihip,’ irikim hit henembol kinangma tuwal atisimu henembol onggok funggalem ap larukon hal atisi,” uruk.