Read Angguruk Yali YESAYA 52 Bible Online

YESAYA 52 - Angguruk Yali bible

YESAYA 52

¹Hit Sion hinap, in amuhupteg yet teg lamok! Hinine sum keron wan turuk hag toho wan turuk lamuhup. Hit Yerusalem hinap Allahn ngi reg ambeg welahe ulug heneliliyangge lahaboho welamek! Ap ambilahap paleg elehon, Allah wene enepelehon arimano henembeg nin fobik kuhup fug.

²Yerusalem hinap in atuk lit ololo hunubam werehon ho roho pila fisiyok! Sion hinap hininggik hele waroho welahebon henenggolop ke hele warehon lole fisiyok!

³NINIKNI Allahn ele urukon tu, ”Hit fahet onggo wa fug angge og heneptusama hiren oho ayeg wat isa fug angge hinibam wamuhup.

⁴Indam numaliki o Mesir libareg ap pohon hag toho welatfagma fobik Asyur inaben alem elegman enele ying eneptuk latfag.

⁵Ketiya Anden yet isarukmen Babel inaben ayeg wabuk fug angge hit hininggik lisoho og heneptusareg sen henesug ane fahet ininggareg wel taruk lit likiya hupmu An fahet nabug uruk.

⁶Anden fanowap henebuhuk sambil ino An nunuk honoluk atuk lit An nele ihiyon fahet Allahn ele irisi ulug hinindi anggat aruhu.”

⁷Punu keyen ap eke wene fanowon hiyag isik oho waharukmu yet haruk lit Sion inap enehiyeg toho wereg. At inowen, ”Tog embesehesareg mangno ahasama hinindi yuwag toho welamuhup,” ulug hiyag isa waharuk. ”Hinikni Allahn windat henebehek. Hinikni Allah ap obog toho fahet Inikni suwon in aha,” ulug hiyag isaruk.

⁸Elehet sok foroho inap inilen NINIKNI Allah ibam Sion waharukmu yet haruk lit enele enehiyeg toho urukon hol esemek!

⁹Hit Yerusalem hinap hinibam halog turuk lit siyaha feserusa angge famen ketiya henehiyeg toho yunggultuk lit welamek! HINIKNI Allahn windat heneptuk lit hinindi seyap heneptuk.

¹⁰Ap o pumbuk obog toho wereg inap onolohotma NINIKNI Allahn inggik fanowon leho ferisi. Aren hit windat heneptukmu kinang atogman atogma werehon obog tohowen yet hahup.

¹¹O Babilonia henembol fil embeselug wilip amek! Allah wene uruk ibam wereg angge paya roho waruk hinaben Allahn senetep fug peruk angge sen ha fug angge hinindi puhun toho wereg lit wilip amek!

¹²HINIKNI Allah walinggoho fet henesug lit hinim larukmu henekolen pupu angge laruk lamuhup fug.

¹³Allahn ele uruk lit, ”An namingmingangge ulug yabuk hiyag utuk lahiyon we tem toho fano wiri feruk laruhu. Wiri feruk lit palimu aruhureg lehoma weregma aben wel turuk lamuhup.

¹⁴Ap anggolowen at yet harusareg yuk lagmag urusa. Yet harukmen orohole mondabi siyag teg latisimu ap aru ap hag toho fug perusa angge famen

¹⁵ketiya ap o pumbuk anggolowen ap aru nangginoho palimu atisi ulug enekol hahup. Ap suwon arimanowen at yet hahupteg enekolen enembilik lat amuhup. Aben it unubam hiyag isarusa fuhon inisanggowen holtusa fuhon inam aruhumu yet hahup.