Read Angguruk Yali YESAYA 53 Bible Online

YESAYA 53 - Angguruk Yali bible

YESAYA 53

¹Alem ari fahet hiyag nisarukmu holtuk laheyon ari ap san tem toho hiyag nisaruk puhu? NINIKNI Allah inggik ineyonen ap ari hahon windatisi ulug san wenggel hahu?

²Allahn peruk ane hikit toho amingmingangge ino hali ahanuk kinang lilog teg ambeg wilip atuk hag toho su atisi. Ebe fano wereg lit aliliyangge lahaboho welalepma ninilen kilaboho lala angge famen ebe fano reg elehen ninirim perukuk.

³Ouk anggolo ubam werehen siyag teg ahun tu ulug aben inggaliyap turuk lit enembol yig utusa. Siyag ahun tu yet hul fug ulug nonorohole sal taruk lit at unuk urukuk fug.

⁴Ouk nit nunubam atlebon at ubam atisireg nit nunubam alem angginon werehon aren ha ririsi. Allahn unggum ubam emberuk lit ebe watuk lit siyaha feserisi perukuk angge famen

⁵niren siyag ane turuk latukukon fahet at ahako folok toho watusa. Niren nonolok ane turukukon fahet al sahaloho watusa. Alem angginon at umaloma emberuson ari famen nit windat atukuk. Mep toho watuson ari famen nit fano atukuk.

⁶Wam domba enemu-enemu laruk lit longgo urukon hag toho welatukuk. Siyag ane niren turuk latukukon NINIKNI Allahn at umaloma emberisi.

⁷ At watukmu an fano nuwabukag peruk lit nele imin fug ulug weregma watusa. Domba umalik ebe wabul ulug walug larukmu ele uk fug angge wereg hag toho domba isinga oruk kong turukmu ele eleg angge wereg hag toho ar oho ele eleg angge weregma watusa.

⁸Inggik hele watuk lit ebe wabukag ulug unggum kong turusareg hondoholug laruk lit pinggi ware feserusama ap at men welatfahon misihen oho at fahet wenggel harusa fug. Nonori arimanowen siyag ane turuk latuson fahet ap onolukon wereg ambehen mondabi lawag ulug sok latusa.

⁹Ambilik fam ele si uk fug angge siyag ane tirisi fug angge famen war atisimu onolok ane turuk inap sal eneptuk ambeg saltusa.[28]

¹⁰NINIKNI Allahn fano al sahaloho wabukag perisi. Ari perisimu at ino iren siyag ane turuson fahet ayeg waroho an nuwabukag ulug inggarehen apmayap tarisimu wam Allah fahet emberukon hag toho ware feserusa. Ware feserusa angge famen fobik aren umalikisi umbusagsi yet isaruk lit amusun toho welaruhu. NINIKNI Allahn peruk ane aren turukon ari famen teko lahu.

¹¹Asengseng harisireg seleg yet hahureg alem nungge fahet nuwatusa ulug oluk atuk lit indimu yuwag aruhu. Allahn ele urukon tu, ”An namingmingangge inowen Anden peruk ane hikit toho turuk lit ap anggolowen siyag ane turuk latuson aren ha ririsimu alem angginon it unubam aruhu fug.

¹²Ap winonen at fahet siyag ane turuk ahun urusama inggarehen nuwabukag perisimu ware feserusa. Ari fahet Anden ap suwon enesehelimu welaruhun ulug palimuwap tuhukmu ap inine werehon menen huhulangge minggiroho hilahu. Ap anggolowen siyag ane turuson aren ha ririsireg tuk fug ane turuk latusa inap fahet sembahyang uruk latisi.”