Read Angguruk Yali YESAYA 54 Bible Online

YESAYA 54 - Angguruk Yali bible

YESAYA 54

¹”Yerusalem hinap nori, indam hiyap ibili reg lit malik indag ta fug angge wereg hag toho welatikip angge famen ketiya henehiyeg toho wereg lit henele hi roho sini yunggultuk lamek! Hiyap ahun werehonen umalikisi anggolo indag taruk angge famen hit hunumalikisi anggolo indag enebuhubon arimano men wirim teg lamuhup fug,” ulug NINIKNI Allahn ele uruk.

²O uwag ine roho pila felug o ilonggo su roho hiyale feruk lit pila yaron o ilonggo wirim toho tuwale fuhun! Obamangge eleg aruhu ulug hindi fibuk fug. O ilonggo suwon ino wirim toho tik yaron eke ahandip toho pug tuhun!

³Hat wereg ambeg o anggolo wibuhupmu hinggik pikit fil hare fil hiyal aruhu. Humalikisi humbusagsi arimano anggolo amuhupteg ap werehon enele wal taneg urukon yanggal eneptuk lit it ngi amuhup. O pumbuk ap eleg ambeg oho iren keleg toho welamuhup.

⁴Hat hinggaliyap habuhup fuhen hakol toho welam fug! Hindi inahan turuk lit lisag anggolo roho hinggali ha fug! Tuhum wereg lit hahun embeselug larikin ane hapeleg aruhumu yuwog toho wereg lit nilaheg peruk latikin ane oho eleg aruhu.

⁵Hat wal hapfahon ino hahun aruhu. NINIKNI Allah pohol kinang senehon inowen hat og habuhu. Israel inap Inikni fanowon inowen hat windat habuhu. Kinangma werehon obog toho Inikni ulug At unuk suwaleg.

⁶Hiyap tuhummu ahunen hilaruk angge famen fobik nirim ulug embeserukmu indi anggin anggolo haruk lit wereg hag toho hat welahen angge famen NINIKNI Allahn nambeg suhuloho ma ulug hat wol haptuk. Aren ele uruk lit,

⁷”Il misihim humbaharikikteg nindi anggolowen suhuloho nambeg ma ulug hondog haptuk lahi.

⁸Nolok ane timin ulug nelma lahik waharisimu il misihim nanduhun yig hitikik angge famen ketiya hat nalukema humbaharuk lit mondabi nindi hasug lit welaruhuk ulug An HIKNI windat haptuk lahiyonen nele uruk lahi.

⁹Atam Nuh weregma ik suwon fobik yenggeluhu fug ulug Anden tem toho iyag hag toho ketiya hat hubam nolok ane uruk lit pet habuhuk fug ulug tem toho uruk lahi.

¹⁰Tom yaron kusoho wamburukmu punu yuk tuhu angge famen An nindi hasug lahiyon eleg aruhu fug. Mangno roho welamuhuk ulug sali emberikik ane ino pisan aruhu fug,” ulug NINIKNI Allahn indi hasuhon inowen ele uruk.

¹¹Allahn ele uruk lit, ”Yerusalem, siyahon hubam atuk lit siyelu hag toho fu roho hubam atisiyon onggon habuk fug teg lahenon hubam nele imin. Anden nin suhuloho elehet o Yerusalem walinggoho kilabuhuk ulug helep ubule hag toho helep il fanowon yaho fuhukteg helep apma tuwale ferukon arimano il wiyukanggen hahon umbagpag turukon tuwaluhuk.

¹²Elehet ino helep fanowon fam waruk lit helep isagle il hulu reg lit umbagpag turukon oho-fuhuk. Elehet sok arimano fene helep ili rurukon topno rubuhuk.

¹³Hit elehet aru undama fil welahebon obog toho An ninggarehen milal heneptukmu holtuk lit hinindi yuwag toho wereg lit fano eneg welamuhup.

¹⁴Pikit ane eneg turuk lit hinine roho unduhuk lamuhup. Siyag ane aben hunubam tul perukon yatma welaruhumu henekol eleg angge welamuhup. Hit henekolap heneptukon arimano horogma wamuhup fugmu yuk lagmag uk fug angge welamuhup.

¹⁵Hit hunusul ulug wamuhubon arimano Anden peruk lahiyon fam tuhup fugmu hiren unusuhupmu war amuhup.

¹⁶Sehen wituk ahun Anden wal tiyagma aren indok munggale felug sehen wiri feruk. Sehen ino seneg lit unusuruk ahun ino oho Anden wal tiyag.

¹⁷Hit hunusul ulug sehen wituk lit minggin tog lahaptukon obog toho siyag aruhu. Aben alem unon hunubam lombog turuk halug hiren alem kong turuk ambehen enele si ane ehesa ulug hiyag isarukmu iren henele holtuk lit tem toho ehesa peruk lamuhup. An namingmingangge arimano ili og eneptuk lit fanowap enebuhuk,” ulug NINIKNI Allahn ele uruk.