Read Angguruk Yali YESAYA 56 Bible Online

YESAYA 56 - Angguruk Yali bible

YESAYA 56

¹NINIKNI Allahn ele urukon tu, ”Anden hit windat henebuhuk li horog teg. Anden fanowap henebuhuk ane folo-folo inam aruhu. Ari fahet hiren oho Anden tuk teg ane fahet komo heneptik iyahon hinine roho seneg lit fano ane eneg turuk lamuhup.

²Anden komo heneptik iyag ane hikit toho turukon arimano enehiyeg toho welamuhup. O sabir angge kel taruk lit wel naptuk sambil siyahap tuk fug angge ininggiken siyag ane turuk elehon arimano fano welamuhup,” uruk.

³Ap o winamon NINIKNI Allah apma welamuhuk perukon arimanowen, ”NINIKNI Allahn numalikisi sehelimu welaruhun fug ulug miyaloho hik niyahu,” puhup fug. Ap unuwali og eneptukon arimanowen, ”E ilimon hag toho welahi,” uhup fug.

⁴It unubam NINIKNI Allahn ele uruk lit, ”Ap unuwali og eneptukonen o sabir angge Allah wel tul ulug kel taruk lit Anden numalikisi men nininggik ahandip toho welamuhuk ulug sali imbiyahon hikit toho Anden fano peruk ane turuk lamuhup halug

⁵unubalmangge eleg angge re fobik welamuhubonen it ununuk onoluk teg lamuhup ulug An nibamen ununuk helep fam hahare fuhuk. Ununuk hahare fuhukon arimano ap misihen oho eleha fusuk fug tehen mondabi welamuhup ane ari palimu regma malik indag taruk ane we tot apma reg.

⁶Ap o winamon An napma welamuhuk perukonen namingmingangge roho wereg lit inindi nasuhen Anden numalikisi men nininggik ahandip toho welamuhuk ulug sali imbiyahon hikit toho nele holtuk lit o sabir angge Allah wel tul ulug kel taruk lamuhup halug

⁷Anden it arimano tom Sion fam hondog eneplug waruhuk. Waruhukmu An nubam sembahyang uruk ibamen An numalikisi men mangno atuk lit enehiyeg toho welamuhup. Iren An nibamen wam waroho yaltuk lit nolohotma hubu lahaptuk lamuhubon fahet nahiyeg haruk laruhuk. An nibam ari ap o pumbuk obog tohowen sembahyang uruk ibam suwaleg laruhu.

⁸An hit HINIKNI Allahn Israel hinap o kema-kema hik-hak hisaruson nin hebeloho palu henebik waharikikonen iminon tu holeg lamek: ”Anden sebe roho ap winon palu eneplug hit men welamuhuben hondog eneplug waruhuk,” uruk.

⁹NINIKNI Allahn ele uruk lit, ”Wam eli farema welahebon men olomene anggen ke welahebon menen An numalikisi fet enesug inap ununu wisal heheg nalihiben maniyek!

¹⁰An numalikisi fahet kahal enesug inap arimano inil hupnig lit inindi sohu roho wereg. Mene hilak turuk elehon hag toho wereg. Likiya hupmu noho inilen yinggig lit nei og harukmen eneg wereg.

¹¹Ap arimano meneyen mun angge man angge mag-mag narukmen enehum ouk atuk elehon hag toho wereg. An numalikisi fano roho fet enesug lalep angge famen sohu-sohu ane ruruk. It obog toho enemu-enemu laruk lit nininggikmu nenenggengge anggolo welalep peruk. Misihen oho ari roho timin fug perukon wereg eleg.

¹²It ekeyen eke fam, ’Ik olokon hinanggulteg ambiyeg narukmen eneg nenek tulen ma! O yoho nenehiyehen tul hag toho sono anggolo roho turuk lamuhuk,’ uruk,” ulug Allahn ele uruk.