Read Angguruk Yali YESAYA 57 Bible Online

YESAYA 57 - Angguruk Yali bible

YESAYA 57

¹Allahn ele uruk lit, ”An nele holtuk inap siyag atukmu ap misihen oho wenggel isaruk eleg. Fano ane turuk inap war atukmu ap obog tohowen hayen peruk. It unubabut fanowon war atukmu nin fobik siyag ane unubam aruhu fug.

²War atug nohoruk ambeg yinggig lit it kalem pikiron larukon arimano inindi yuwag toho weregman eneg welamuhup.

³Hit hal foroho hiyap umalikisi welahebon An nolohotma in arik maniyek! Hiren usangge wel eneptuk lit yaying-yaying angge ruruk lahep ane ariyen An nele ying naptuk lahep.

⁴Hiren te ap sa fahet inda yag utuk lahe ulug honoluk teg? Henele winik-wonog toho uruk lit henembilikanggen suwakan turuk lahep ane ariyen An nindi siyahap naptuk lahebon henepeleg ano? Hit ap unubabut onolokon enele si ane urukonen indag heneptuson welahep.

⁵Hunuwali inahan turuken e usa ahen alma sakoma kulug pabi-pabi ane turuk lahep. Fanggongma owik elma usangge hiren wel eneptuk lahebon fahet hunumalikisi waroho emberuk lahep.

⁶Usa ahalep ikma werehon fahet ik hilili feruk lit suburu yaltuk lahep angge re usa ahalep alma hit wareg angge kinangma sal henebuhup. Niren usane arimano obog toho turukmu yet nisalug Allahn indi imbik wambuhu peruk lahep ano?

⁷Tom atelma lahalug pabi ane ruruk lit usangge hiren wel turuk lahebon fahet wam waroho esetuk lahep.

⁸Hinibam sokolma men umbangguwag ke men owili po reg. Hiren An numbahalug tu Allah hag toho wereg ulug wel eneptuk lahebon hinindi enesug lit onggo og nisawag ulug hininggali eleg toho yaying turuk lahep.

⁹Nunumba Molokh wel tul ulug ambeg laruk lit e zaitun ahaluwe men amben fano angge ekeyon-ekeyon men at fahet emberuk lahep. Nit fahet usangge yami rik lalihip ulug honotsi mon eneptukmu yatma laruk lit ap warehon kinang apma weregma oho laruk.

¹⁰Fano welamuhukon yami rik lul ulug o kema-kema yatma larukmen eneg hinine eleg atisi angge famen, ’Saplangge laruk lahe,’ uk fug angge nin hebeloho hinineyap taruk lahep.

¹¹Hit ap sa fahet henekol toho wereg lit An nubam wenggel ha fug angge henele si ane uruk lahep? Anden yet isalug nolok ane unubam tuhuk tohon ulug norohole saloho nele uk fug angge welatikik angge famen hiren Allahn yet nisaruk eleg ulug An fahet henekol eleg toho welatikip.

¹²Hiren fano ane turuk lahe peruk lahep angge famen Anden saplangge turuk lahep ulug inamap tuhuk.

¹³Usangge anggolo foroho lahebon fam henele hi roho let nenebiyok ilihip! Ari roho urukmen usangge arimano inine elehen homhomowen walug lahu. Allahn let nenepmisi ulug An napma larukon arimanowen kinang aru ngi amuhupteg An antom fam yug toho welamuhup,” ulug Allahn ele uruk.

¹⁴Allahn ele uruk lit, ”An numalikisi suhuloho wamuhuben kalem yag eneptuk lamek! Unuyug salog-malog angge roho unusuhu rohon ulug it wamuhup ke hale feruk lamek!” uruk.

¹⁵At palimuwon lehoma heriyeg lit mondabi werehon unuk usa fulu reg ahun suwalehon inowen ele urukon tu holeg lamek: ”An palimu mondabi fanoma ap kuk fug teg ambeg heriyeg lahiyon famen ap inindi anggin toho mondabi siyag amuhuk peruk lit apma werehon iniraham wereg lit inineyap eneptuk lahi.

¹⁶Numalikisi Anden wal eneptik iyahon arimano siyag amuhup tohon ulug nindi noloken pet eneptukmen eneg welaruhuk fug.

¹⁷Mun angge man angge nininggikmu welalep perukon fahet nundama ahe laharisimu naluke yig isa fug angge unusirikik angge famen it inindi anggar am fug angge An numbahalug lul peruk ke laruk latusa.

¹⁸An numbahalug larukmu yet isarikikteg ketiya kalem fanowon lawag ulug hondog eneplug laruk lit ouk unubam werehon hihir enebuhuk. Ap uba yatukon arimano onggon eneptuk laruhuk.

¹⁹Anden let eneptuk laruhukmu enehiyehen sini yunggultuk lamuhup. It yatma werehon men horogma werehon men Anden fanowap enebuhuk. Numalikisi hihir enebuhuk ulug An HINIKNI Allahn uruk lahi.

²⁰An enembol yig nutuk inap arimano ik haglabut watukon hag toho wereg. Ik haglabut ine roho watil laruk lit sabelep men siyag-siyag angge men walug laruk hag toho iren oho turuk.

²¹An nele holtuk elehon arimano enebe fano wereg lit inindi yuwag toho welamuhup fug,” ulug Nikni Allahn ele uruk.