Read Angguruk Yali YESAYA 58 Bible Online

YESAYA 58 - Angguruk Yali bible

YESAYA 58

¹NINIKNI Allahn ele an hiyag nutuk lit, ”Hele ine anggolo roho imihin! Pinggong ele hum toho urukon hag toho uruk lit An numalikisiyen siyag ane turukon fahet hiyag isamihin!

²Iren likiya hupmu sembahyang An nubam uruk lit enembilik fam, ’Allahn peruk ane nonoluk toho welamuhuken yami rul,’ uruk. Inikni Allahn imbibahon sobir isa fug angge let-ler atuk inap wereg pukag ulug turuk lit alem fano roho haltuk ane fahet An kapal niyaruk. Enembilik fam eneg, ’Nenehiyehen Allah wel turuk lahe,’ uruk.

³It arimanowen enele uruk lit, ’Niren Hat hubam sembahyang ul ulug suburu na fug angge hiyang welahe angge famen nungge fahet Haren kim nisaruk lahen fug? Niren Hat holohotman nininggarehen wat taruk lahe angge famen nungge fahet Haren nit fahet wenggel haruk lahen fug?’ ulug kapal niyaruk. We tem, hit hiyang welahep angge famen hiyang welahep sambil hiniyabuk hininggareg fahet wit taruk lit let heneptuk inap arimano unubam henele olok toho mingming eneptuk lahep.

⁴Hiyang welahep anggeyen suwahal uruk lit hininggik yinggilig yik angge wat-war atuk lahep. Hiren ari roho turuk lit An nolohotma fano hiyang welahep fugmu An nubam sembahyang uruk lahebon Anden holuk fug teg lahi.

⁵Hiren, ’At ubam sembahyang ulen hiyang welamul,’ uruk lahep sambil suburu na fug angge hininggarehen wat taruk lit hununggul haliyup song teg hag toho kunuk atuk lahep. Sabe sum siyahon ulmu tuwale felug emberimu nohoruk lahep. Ari turuk lahebon fahet ’At olohotma hiyang welahe,’ uruk lahep? Hiyang welahebon ari fahet NINIKNI Allah ahiyeg toho wereg peruk lahep? Eleg-o, nori!

⁶Hiyang welamuhup ane Anden fano peruk lahiyon iminon tu: Aben onolok ane ap winon unubam turuk lit ininggik pug toho apmayap eneptukon arimano hiren fililak eneptuk lamuhup. Ap enemingmingangge roho weregma e paleg angginon unumaloma ha reberukon arimano sombo roho hik isaruk lamuhup.

⁷Hiren ap suburu obok toho werehon suburu kuroho og isaruk lamuhup. Ap inibam elehon hit hinibam hondoko kilap eneptuk lamuhup. Ap enesum eleg angge werehon sum og isaruk lamuhup. Honori let nenebusa ulug henembeg waharukon arimano let enepmin fug ulug hirag atuk lamuhup fug.

⁸Ari turuk lamuhup halug seleg fanowon o hil umbagpag turukon hag toho hit hunubam aruhumu yowilangge hunubam werehon arimano folo-folo eleg atuk laruhu. An HINIKNI Allah hit hinim wereg lit fanowap heneptuk laruhuk. An umbagpag turuk lahiyonen hit walinggoho fet henesug laruhuk.

⁹Hiren An nubam sembahyang uruk lamuhup halug Anden hebeloho hiyag hisaruk laruhuk. Hiren let nenebin ulug henele hi roho uruk lamuhupmu Anden let henepminen welahi uruk laruhuk. Hiren honori unumaloma e paleg angginon emberuk lit apmayap eneptuk ane umbusuhup. Hit honori men seliyap eneptuk lit it enebug uruk ane embeseruk lamuhup.

¹⁰Ap suburu obok toho werehon suburu og isaruk lit inindi anggin toho werehon seyap eneptuk lamuhup. Ari turuk lamuhup ane ariyen o hiken hit waling henesuhon ino unukoho seleg teg hag aruhu.

¹¹An HINIKNI Allahn hit kinang lilog teg ambeg weregma hinindi yuwahap heneptuk lit likiya hupmu let heneptuk laruhuk. Anden hinineyap heneptuk laruhukmu kinang ik wilip atuk ambeg hag toho amuhup. Ik eleruk ahik firig atuk eleg hag toho welamuhup.

¹²O pumbuk indam halog toho lin isibahon arimano hit honori menen nin wiri feruk lit olun hunumbasiyen oho fibag ambeg arimano hale feruk lamuhup. Hit honori men hunubahet aben, ’Elehet o walinggoho ohowon men o pumbuk halog toho lin isibahon men haltusa inap wereg,’ uruk lamuhup,” ulug Allahn ele uruk.

¹³Allah ele urukon tu, ”An HINIKNI Allahn o Hari Sabat An wel naptuk sambil fahet imbiyahon sobir isaruk lamuhup fug. Imbiyahon ino fahet henekol toho wereg lit o kema-kema laruk lamuhup fug. Hiniyabuk wit ta fug angge hininggarehen tohon fahet eneg henele sahaltuk lamuhup fug. O Hari Sabat ino hiren henehiyeg toho An wel naptuk lamuhup.

¹⁴Ari turuk lit An HINIKNI Allah numalikisi roho welahebon fahet henehiyeg toho welamuhup. Anden hit mondabi palimuwap heneptukmu ap kinang atogman atogma werehonen wel heneptuk lamuhup. Anden hit fet henesugmu kinang hunumba Yakub og itik iyahon ino fam wereg lit hinindimu henehiyeg toho welamuhup. An HINIKNI Allahn nambilik famen alem tu fahet hiyag hisihi.”