Read Angguruk Yali YESAYA 59 Bible Online

YESAYA 59 - Angguruk Yali bible

YESAYA 59

¹NINIKNI Allah inggik horog teg angge re nit windat nenebuk fug teg, isanggo lareg lit hol nisa fug teg peruk lahep ano?

²Hiren siyag ane turuk lahebon ariyen hit men Hinikni Allah men hili roho welahep. Honolok ane turuk lahebon ari fahet Allahn ambol yig hisaruk lit holtuk eleg.

³Henembilik fam henele si ane uruk lit hininggiken ap unusuruk lahep.

⁴Ap alem unubam elegman unggum kong turuk lit alem weregma pikit toho haltuk lahep fug. Henele sibiling-sibiling ane uruk lit alem elehon fahet wenggel haruk lahep. Hit henehummu ap enele ying eneptuk ane foroho lit honolok ane indag tahup.

⁵Pisanggo olokonen anggen endetuk hag toho hiren oho turuk lahep. Ap pisanggo anggen narukon arimano war atuk. Ap ekeyen anggen arimano sog turukmu pisanggo umalik sup turuk. Hiren turuk lahebon men hephep ahalonggok pundu rurukon men wirim teg.

⁶Ahalonggok hiren tohon fam sum ebemon men hililip toho nohoruk asum men uk fug teg angge famen ahalonggok arimano yebangge yep teberuk lit ap sen eneplug unusuruk lahep.

⁷Honolok eleg toho welam fug angge likiya hupmu siyag ane tul peruk lahep. Ap siyag ane turuk elehon unusul ulug hunuyug lebe roho laruk lahep. Aben tuk fug ane eneg wenggel halug o kema-kema laruk lit mun angge man angge halog til laruk lahep.

⁸Nonori men mangno roho welamuhuk ulug yami ruk fug angge honori siyahap enebil eneg laruk lahep. Kalem pikiron hareyap turuk lahep angge re ap sa kalem arimano laruk halug fano aruhu fug.

⁹Ari roho turuk lahepma alem haloho emberuk ane eleg latisimu fano am fug teg lahe. Nunubam seleg aruhu ulug wenggel harukuk angge famen o hik tegma laruk lahe.

¹⁰Ninil hupnig hag toho wereg lit o ubahat fatil laruk lahe. Unukoho famen hubanggo hag toho nunuyug salog-malog angge roho mako wamburuk lahe. Ap warehon hag toho o hik tegma welahe.

¹¹Wam watukmu enele hung turuk hag toho uruk lahe. Ninindi siyahen yalma inowen une uruk hag toho nenele nginuk ane uruk lahe. Allahn ili og neneptuk lit windat nenebuhu perukuk angge famen let neneptuk eleg.

¹²Niren anggoloenam nenembol yig hutuk lit siyag ane hubam turuk latukuk. Haren telep fug peruk lahen ane anggolo turukukon ariyen nunubabut siyahon inam atisi. Hat hindi siyahap haptuk lit alem nunubamap tarukuk ulug nit nonoluk.

¹³Hat NINIKNI Allah hele ying haptuk lit Hat fahet nenepeleg atuk hag toho turukuk. Hat hombolim laruk ane embeselug hele sobir isarukuk. Allah imbisiyok ulug nonori eneleyap eneptukmu ap siyahap eneptuk ane nit sehelimu su atisi. Nenehummuwen hareyon foroho lit nenele si ane indag taruk lahe.

¹⁴Unggum pikit toho kong turuk ane men alem haloho emberuk ane men miyaloho hikip teberukuk. Enele tem toho uruk ane ayeg waroho waruk ambehen longgo irisi. Pikir ane turukon fahet ninirim uruk lahe.

¹⁵Enele tem toho uruk ane mondabi eleg atisimu ap siyag ane timin fug perukon arimano onoriyen siyahap eneptuk lit enenggengge obog toho hilaruk. Niren siyag ane til-wil norukmu NINIKNI Allahn yet nisaruk lit nungge fahet alem haloho emberuk eleg ulug nirim peruk.

¹⁶Allahn yet nisarukmen ap misihen oho hal enepmin perukon wereg elehen Allah indi su atuk lit ninggareg ninggik An let naptukon weregma mun ane man ane haloho umbuhuk peruk.

¹⁷Sing wan turuk hag toho alem haloho emberuk ane wan teg lit ununggul asum langguk taruk hag toho ap windat eneptuk ane wan taruk. Ap seliyon ayeg waroho unusuruk ane ari sum ebemon hag toho weregma indi inahanen mun ane man ane siyahon elehap turuk ane sum hililip toho wan turukon hag toho wan taruk.

¹⁸Allah men seli roho werehon siyag ane turuk latuson ayeg waroho olok ane unubam tuhu. At fahet inirim teg inaben turuk latusa ane hebeloho ininggareg unubam umbuhu. Yatma ik saho ahik ayegma werehon oho unusuhu.

¹⁹NINIKNI Allahn siyelu monde fik waharuk lit ik fu waharuk hag toho ap seliyon unusuhu. Unusik waharukmu yet hahupteg ap mo lahik waharuk filen ubuk uruk fil werehon obog tohowen NINIKNI Allah umbagpag turukon fahet enekol haruk lamuhup.

²⁰ NINIKNI Allahn umalikisi hun Yakuben ondohowonen ondohowon tom Sion fam werehon unubam ele uruk lit, ”An numbahalug larikip ane embeselug suhuloho nambeg waharuk lahebon Anden windat henebuhuk,” uruk.

²¹NINIKNI Allahn an nubam nin ele uruk lit, ”An numalikisi hunubam sali emberuk lahiyon tu: Nahime fanowon Anden hat og hitikikon men nawene fanowon ap hiyag isaruk laruhun ulug hambilikmu emberikikon men Anden uwag oko hilahuk fug. Ketiya haren enderuhunon famen indag amuhubonen oho An nawene senegman eneg welamuhup,” ulug NINIKNI Allahn ele uruk.