Read Angguruk Yali YESAYA 6 Bible Online

YESAYA 6 - Angguruk Yali bible

YESAYA 6

¹Ap suwon raja Uzia war atfahon mo ino fam anden yet harukmen NINIKNI Allah hur atuk angge yaron fam lehoma heriyegma asum yaron atog inowen eneg NINIKNI Allah ibam ino obog toho keleg tegma yet harikik.

²Ap poholmon indok ambulpul turukon hahon At walinggoho unduhukmu yet isarikik. It arimano enebe wal taneg eneherabul falfaliken wilibigmu eneherabul pirenen onorohole salegma pirenen enebe hililip teg lit pirenen fililoho laruk latusa.

³It arimanowen it-it enele ine roho uruk lit, ”NINIKNI Allah pohol ha kinang ha senehon ino usa ahun, usa ahun, usa ahun wereg. Kinang atogman atogma werehon obog tohowen At palimu werehon ino fog turuk,” ulug wel turuk latusa.

⁴Iren enele ine roho wel turukmu Allah ibam uwag kinangma yinggihon yuk turukmu o ino indok hubuwen keleg teg latisi.

⁵Ari regma anden nele uruk lit, ”Yihi, an siyag atmin! Nori Israel inap enembilik fam NINIKNI Allah olohotman un ane uruk inap sehelimu wereg lit an oho nambiliken siyag ane uruk nahun welahi angge famen nil fam Ap suwon palimuwon NINIKNI Allah pohol ha kinang ha senehon ino yet haruk lahi,” uruk latikik.

⁶Ari urukmen ap poholmon arimano sehelimuwon misihen indok anggen Allah fahet hubu lahaptuk ambehen fa fam hambo roho inggikmu seneg angge fililoho an nambeg waharisi.

⁷Waharisireg indok anggen ino fam nambilikmu tung teg lit an nubam ele uruk lit, ”Indok anggen aru fam hambilikmu tung tegma siyag ane turuk latikinon eleg aha, alem hubam werehon ino NINIKNI Allahn elehap tehek,” ulug hiyag nitisi.

⁸Hiyag nitisimu anden hol harukmen NINIKNI Allahn ele uruk lit, ”Ap sa Anden monde fuhuk? Ap san Niren uruk laheyon ap hiyag isa laruk laruhu?” irisimu anden hebeloho hiyag utuk lit, ”An welahiyon tu mon nabuhun!” irikik.

⁹Irikikmu NINIKNI Allahn nin eke nubam ele uruk lit, ”Hat lamihinteg hori Israel inap unubam hiyag isaruk laruhunon tu: Hiren Allah wene holtukmen eneg welamuhup angge famen hinindi anggar aruhu fug. Mun ane man ane teko larukmu hiren yet haruk lamuhup angge famen alem nungge fahet teko laruk ulug hinindimu seleg aruhu fug ulug hiyag isaruk laruhun.

¹⁰It inindimuwen fano ane wenggel hahup tohon inindi hareyap tebesuhun. It inisanggo fam holuhup tohon inisanggo lare fusuhun. It inilen yet hahup tohon inil hupni fusuhun. An nalukema suhuloho wamuhupteg fano amuhup tohonen!” ulug NINIKNI Allahn hiyag nitisi.

¹¹Hiyag nitisimu anden hebeloho kapal haruk lit, ”Nikni, ehen ane hikit toho weregman eneg noenam welamuhuk?” ulug kapal harikikmu NINIKNI Allahn hebeloho hiyag nutuk lit, ”Anden ihi ane hikit toho weregman eneg o pumbuk obog toho arimano olun aruhumu ap olma werehon mondabi eleg amuhupteg ap enele teng uhup. It enengginang ino oho lekma hag aruhu.

¹²An HINIKNI Allahn ap aruma yatma imbisik lahukmu kinang aru fam ap eleg lamuhup.

¹³Ap we tor angge kinang aru fam onoluk welamuhup halug ir oho siyahap enebuhup. It arimano e suwon aben mutuk lit irat embeserukon hag toho welamuhup angge famen e irat ino famen asimit wilip atuk hag toho ap we tor angge welamuhubon itano famen nin eke An Allah numalikisi su roho wereg lamuhup,” ulug NINIKNI Allahn hiyag nitisi.