Read Angguruk Yali YESAYA 60 Bible Online

YESAYA 60 - Angguruk Yali bible

YESAYA 60

¹Yerusalem hinap nori, NINIKNI Allah umbagpag turukon inowen seleg fanowon hit hunubam pilabik waharukmu honorohole seleg toho in atlihip!

²O hik inowen kinang atogman atogma hondo reg lit weregma ap ununggul unuk wal taneg werehon o hik tegma wereg angge famen hit hunubam NINIKNI Allahn seleg fanowon pilabik waharukmu At umbagpag turukon seleg ino mo hag toho hit welahebon palimu inam atuk.

³Seleg fanowon hit hunubam pilabik waharuken ap ununggul unuk wal taneg werehon mondoko henembeg waharukmu it onowesi suwonen oho seleg ino yet hul ulug waharuk lamuhup.

⁴Honorohole leko walinggoho yet esemek! Hit hunumalikisi suhuloho ninibam lahuk ulug luhal atuk. Hit hunumalikisi ap angge yatman waharukmu aben heneholani enehuwalma keleg toho og eneplug waharuk lamuhup.

⁵It waharukmu hiren yet isahupteg honorohole seleg atuk lit henehiyehen hinindi inahan turuk laruhu. Ap ununggul unuk wal taneg werehon enenggengge hit fahet walug waharukmu saho ahik walinggoho werehonen fano-fano angge forohowon anggolo roho walug wamuhubon hit ngi amuhup.

⁶Wam unta anggolo roho o Midian men Efa men filen waharuk lamuhupmu hit henengginangma keleg aruhu. O Syeba inaben umbagpag turuk angge emas men amben fano angge men walug waharuk lit NINIKNI Allahn hum ane turuk latisiyon fahet hiyag isaruk lamuhup.

⁷Wam domba o Kedar inaben tohon obog toho andog toho imbik wamuhup. O Nebayot inap enembohom domba oho og hisaruk lamuhubon arimano obog toho hiren waroho hubu lahaptuk lit Allah indi ahiyehap turuk lamuhup. Ari turuk lamuhup ane ari feneyen NINIKNI Allahn At wel turuk ibam ino unuk palimuwap tuhu.

⁸Kou ik ahum ke larukon arimano hina pohol ke laruk hag toho nungge fahet folo-folo waharuk? It arimano suwe yalma hahon inibam kurukon hag toho nungge fahet waharuk?

⁹Kou arimano fam Allah umalikisi o pumbuk yatma wal taneg hik isaruson suhuloho inibam waharukmu kou o Tarsis inaben tohon arimano tam waharuk. Iren umbagpag turuk angge emas men perak men walug waharuk lit Israel inap INIKNI suwon ebe usa fulu rehon inowen umalikisi palimuwap neneptisi ulug unuk suwap turuk.

¹⁰NINIKNI Allahn Yerusalem inap unubam ele urukon tu, ”Ap o winamon arimanowen elehet hinibam walinggoho ohowon siyag atisiyon ino nin suhuloho oho ferukmu it onowesi suwon hit henemingmingangge amuhup. Tam Anden nolok haruk lit hunusuruk latikik angge famen ketiya hinilaheg ulug nindi hisaruk lahi.

¹¹Elehet hinibam walinggoho ohowon sok kurukon arimano hubanggo unukoho husig lit weregman eneg ap enele wal taneg urukon enenggengge arimano hit fahet walug waharukmu it onowesi suwon oho ininggik hele waroho walug waharuk lamuhup.

¹²Ap enele wal taneg urukon arimano sehelimuwon sa hit henemingmingangge roho wereg lit let heneptuk eleg halug mondabi siyag amuhup.

¹³An nibam undama le ke haltukon men o Yerusalem An nuyug timi roho unduhuk ambeg fanowap teberukon men fahet e tom Libanon fam werehon ineyon arimano hit henembeg walug waharuk lamuhup.

¹⁴Hit apmayap heneptuk inap unumalikisi onorohole kunuk toho henembeg waharukmu hininggaliyap heneptusa inap oho hit hunuyug alma enelenggen fam hur atuk lamuhup. It arimanowen o pumbuk aru fahet ’Israel inap INIKNI Allah ebe usa fulu rehon ibam o Sion’ uruk lamuhup.

¹⁵Atam siyag ambeg ulug embeselug laruk lit ap misihen oho o pumbuk aru pen ha waharuk latusa fug angge famen ketiya Anden o aru suwap turuk lit unuk palimuwap tuhukmu o aru fam henehiyeg toho weregman eneg welamuhup.

¹⁶Isingan umalik ag mondotuk lit foroho hag toho ap enele winon urukon onowesi menen hit fet henesug lamuhup. Ari roho fet henesug lit weregma An fahet NINIKNI Allah let neneptukon wereg ulug honoluk aruhu. ’Nunumba Yakub Ikni Allah ineyon inowen windat neneptisi,’ uruk lamuhup.

¹⁷Anden tembaga we tot ili rurukon ubalmangge emas mondabi umbagpag turukon og hisahuk. Besi ili ruruk elehon ubalma ili ruruk angge perak og hisahuk. E ubalma tembaga ineyon, helep ubalma besi mondabi wirikon og hisahuk. Atam hit sen henesug inaben apmayap heneptuk latusa ane eleg aruhumu Anden it milal eneptuk laruhuk halug iren alem fano roho hale feruk lit weregma hinindi yuwag toho welamuhup.

¹⁸Israel inap enengginang fam onolok ane turuk lit inibam halog toho siyahap turukon fahet aben urukmu holuhup fug. Elehet o pumbuk walinggoho ohowon inowen hit walinggoho kilap henesugmu hinindi yuwag toho welamuhup. Elehet ohowon fam sok wirihon arimano aben yet haruk lit wel heneptuk lamuhup.[29]

¹⁹Hit fahet unukoho mo yabuk fug angge weregma hubanggo oho pikalem yatuk laruhu fug. An HINIKNI Allah umbagpag turuk lahiyon ino hit fahet seleg fanowon wereg lit hit hunubam yatukmen eneg welaruhuk.

²⁰Mo ubuk uruk lit pikalem hik atuk angge famen An HINIKNI Allah seleg fanowon wereg lit hit hunubam yatukmen eneg mondabi welaruhuk. Hiren uba yatuk lahebon eleg aruhu.

²¹Hit Israel hinap arimano obog tohowen Allahn peruk ane eneg turuk lit henengginang aru ngi reg lit senegman eneg welamuhup. Ap obog tohowen An wel naptuk lamag ulug ninggareg ninggiken wal heneptik iyareg yag heneptikikmu hit welahep.

²²Ap ununggul unuk toron aben apmayap eneptukon arimano su amuhupteg inine roho welamuhup. An HINIKNI Allahn tu sambil timin puhuk sul horog aruhumu Anden alem ihiyon tu folo-folo hale fuhuk,” uruk.