Read Angguruk Yali YESAYA 61 Bible Online

YESAYA 61 - Angguruk Yali bible

YESAYA 61

¹ NINIKNI suwon Allah ahime fanowon ino an nubam wereg lit nineyap naptuk. NINIKNI Allahn mumal naptisireg hiyag nutuk lit, ”Ap inine elehon An nawene fanowon hiyag isaruk lit ap inindi ouk toho werehon fanowap eneptuk laruhun,” ulug mon naptisi. Hininggik pug toho welahebon fililak heneptuk lit ap hele waroho kilaptuk ambeg hag toho welahebon lol henebuhup ulug hiyag isaruk laruhuken monde nubaharisi.

²”NINIKNI Allahn umalikisi obog toho indi enesug lit it men seli roho wereg inap arimano hebeloho unusuhu li horog teg ulug hiyag isaruk lit ap uba yatukon obog toho onggon eneptuk laruhun,” ulug hiyag nitisi.

³”O Yerusalemen ap inindi anggin toho werehon inindi seyap eneptuk laruhun,” irisi. Iren fesi lahaptusa angge famen ketiya niren yunggultul ulug eneliliyangge lahaptuk lit wam ahaluwe enebene are ruruk lamuhup. Inine eleg atisiyon arimano ketiya enehiyeg toho wereg lit sini yunggultuk lamuhup. It arimano e NINIKNI Allah inggiken yatukon hag toho wereg lit Allahn fano peruk ane eneg turuk lamuhup. Ari turuk lamuhupmu NINIKNI Allahn fano ane tehek ulug aben At wel turuk lamuhup.

⁴O pumbuk indam halog toho lin isibahon arimano nin hebeloho wituk lamuhup.

⁵Ap enele winon urukon arimano hit henemingmingangge wereg lit henembohom foroho lamuhup. It arimanowen hele anggur yatuk ambeg men hiniyabuk winon men wit hisaruk lamuhup.

⁶Ari roho turukmu hit NINIKNI Allah amingmingangge weregma aben hit hunubahet ”At olohotma unduhuk inap imam” uruk lamuhup. Ap enele wal taneg urukon enenggengge hit ngi amuhupteg aben angge anggolo nit atukuk ulug henehiyeg toho welamuhup.

⁷Aben ininggaliyap enebul ulug hit honolohotma anggoloenam wasubag sup hisaruk lit apmayap heneptuk latusa angge famen ketiya hiren kinang anggolo ngi amuhupteg henehiyeg toho weregman eneg welamuhup.

⁸NINIKNI Allahn ele urukon tu, ”Ap let-ler atukon fahet Anden nindi reg lit onolok ane turukon men yoholiyangge hilarukon men fahet nirim peruk lahi. An numalikisi ninggik kobog isamin fug ulug hit siyag toho welahebon fahet ayeg waroho onggo fanowon og hisaruk laruhuk. Anden hit fet henesugmen eneg welaruhuk ulug sali hunubam umbuhuk.

⁹Hit hunumalikisiyen endebuhubon arimano ununuk o kema-keman onoluk teg lit it fahet fano peruk lamuhup. Ap winonen yet isahupteg it fahet ’INIKNI Allahn inineyap eneptuk inap,’ ulug fag toho uruk lamuhup.”

¹⁰Yerusalem inaben enele uruk lit, ”NINIKNI Allahn fano ane nunubam turukon fahet ninindimu nenehiyeg toho wereg lit At wel turuk lahe. Aben enebe sum hililip toho wan teg hag toho Allahn nit ninibil atuk lit windat neneptukon inowen hililip toho fet nenesug lit wereg. Ap men hiyap men og-og amul ulug enehiyehen eneliliyangge lahaptukon hag toho nit nenehiyeg toho welahe.

¹¹Aben eiyangge yatukmu kinangman wilip atlug su atuk hag toho NINIKNI suwon Allahn umalikisi windat eneptuk ane inam aruhumu ap o kema-kema werehonen At wel turuk lamuhup,” uruk.