Read Angguruk Yali YESAYA 62 Bible Online

YESAYA 62 - Angguruk Yali bible

YESAYA 62

¹O pumbuk Yerusalem, hat fahet nindi angginen nele uk fug angge welahi ha fug teg. Anden Allah ubam nele urukmen warukmen eneg Allahn windat habuhumu seleg fanowon o hil umbagpag turukon hag toho hubam aruhu. Nele umbusuk fug angge Allah heng turukmen eneg Aren hat fanowap habuhumu iral o hik tegma hundutukon hag toho welaruhun.

²Allahn ili og habuhuwon fahet ap o pumbuk obog tohowen holuhup. Hat umbagpag turuk laruhunon ap suwon o kema-kema werehonen yet hiyahup. It arimanowen hat hunuk keron NINIKNI Allahn suwal habuhuwon eneg uruk lamuhup.

³Hat NINIKNI Allah fahet ap suwonen unggulmu lahaptuk angge fanowon hag toho welaruhun.

⁴Hat hunuk salikap toho ”Ahunen embeserisi he” ulug suwal haptuson uk fug angge hangginang unuk ”Ahun elehon” ulug suwaltuson nin uruk lamuhup fug angge famen NINIKNI Allahn nin hebeloho indi hasug lit hangginang oho ahunen uhe indi reg hag toho indi reg laruhu. Indi reg laruhumu hat hunuk ”Allahn indi rehon” ulug suwal haptuk lit hangginang unuk ”Ahun werehon” uruk lamuhup.

⁵Ap kabiniyon ekeyen hiyap tuhumon hilaruk hag toho wal hapfag ahun inowen hat og hasug laruhu. Ap inowen nuhe hilamin ulug ahiyeg haruk hag toho Ninikni Allahn oho hat fahet ahiyeg haruk laruhu.

⁶Elehet o Yerusalem walinggoho ohowon emberimu unduhuk lit sap teg lamuhup ulug ap hiyag isarikik. Ap arimanowen NINIKNI Allahn o Yerusalem fahet apeleg am nowen ulug hup hunduhuk unukoho hunduhuk At ubam enele urukmen eneg welamuhup. Sap teg lahep hinap nori, henele eleg angge welamuhup fug!

⁷Allah kel tahu rohon henele urukmen warukmen eneg Aren o Yerusalem nin hebeloho fanowap tuhumu ap kinang atogman atogma werehonen o Yerusalem fog turuk lamuhup.

⁸NINIKNI Allah inggik ineyon inowen ele tem toho uruk lit, ”Ketiya roti anggen hiren tohon ap seliyonen nawag ulug nin og isaruk laruhuk fug. Anggur anggen hiren lisag toho yatuk lahebon arimano ap o winamonen naruk lamuhup fug angge famen

⁹anggen tahantukon arimano hininggarehen naruk lamuhup. Roti anggen men anggur anggen men arimano An nibam owahalma walug wamuhupteg naruk lit An wel naptuk lamuhup,” uruk.

¹⁰O Yerusalem hinap nori, elehet hinibam walinggoho kilabehon sok ele keyen wilip atihipteg An numalikisi hik isarusa ambeg pok atuson suhuloho inibam wamuhuben kalem yag enebiyok! Enembilan heleben unusuhu ulug it wamuhup ke hale feruk lamek! An numalikisi inibam wamuhubon fahet ap o pumbuk obog tohowen onoluk amag ulug enehangge eke yaho fiyek!

¹¹ NINIKNI Allahn kinang atogman atogma ap obog tohowen holukag ulug hiyag isil lahup urukon tu, ”Yerusalem inap unubam henele uruk lit, ’Hit fano amuhup sambil horog teg. Allahn ap Anden tohon amuhup ulug windat eneptisiyon arimano hondog eneplug waharuk,’ iyek!”

¹²Ap hondog eneplug waruhuwon arimano ununuk ”NINIKNI Allahn anggengge windat eneptisiyon” ulug suwaleg lamuhupmu hat o pumbuk Yerusalem hunuk ”Humbaharisiyon famen hebeloho indi hasuhon” ulug suwal habuhup.