Read Angguruk Yali YESAYA 63 Bible Online

YESAYA 63 - Angguruk Yali bible

YESAYA 63

¹”O Bozra Edom kinang filen waharukon ari ap sa waharuk? At asum fanowon wan tohon ino il hulu regma ebe mondabi ine roho waharuk,” ulug elehet o pumbuk walinggoho ohowon sok foroho ahunen ap eke fam kapal harukmu ap inowen hiyag utuk lit,[30] ”Ap waharukon ino NINIKNI Allah ap ine roho windat eneptukon ino ili og henebuhuk ulug hiyag nisamisiyen waharuk,” ulug hiyag utuk.

²Hiyag utukmu sok foroho ahun inowen ele uruk lit, ”Nungge fahet ap sak watukon enesum hulu reg hag toho Hat hasum hulu reg angge waharuk lahen?” ulug kapal harukmu

³ NINIKNI Allahn hiyag utuk lit, ”Aben sak watuk hag toho Anden ap enele wal taneg urukon ninggiken ilahal waroho unusirikikteg waharuk lahi. It arimano Anden unusurukmu ap misig oho An niraham welatisi fug. Nolok anggolo haruk lit ap arimano ninggiken ilahal wat heheg unusurukmen enemep sililim toho nasum obog toho hulu atisi.

⁴An numalikisi windat enebuhuken it men seli roho wereg inap unusuhuk ulug wenggel haruk latikik sambil ino horog atisimu

⁵Anden yet harukmen ap misig oho let naptukon eleg latisi. Eleg latisimu An nindi su atuk lit nindimu ahe laharukon ariyen nolokap naptukmu ninggareg ninggik fahet An let naptukon wereg perikik.

⁶An nolok anggolowen nindi inahan turukmu ap enele wal taneg urukon ninggiken ilahal waroho lilibug heheg unusuruk lit it enemep kinangma hilili feserikik,” uruk.

⁷NINIKNI Allahn nit indi nisaruk lit fano ane nunubam turuk ane fahet anden ap hiyag isaruk lit At wel turuk lahi. Aren umalikisi Israel ninap fahet inilaheg ulug indi nenesug lit su roho let neneptuk latisi.

⁸NINIKNI Allahn ele uruk lit, ”It arimano we tik-tem toho An numalikisi werehen An nubahet awiya waruk lamuhup fug,” irisi. Ari irisireg it arimano alem siyahon eke hag eke hag unubam atukmu At inowen windat eneptuk latisi. Aren ap eke let enepmihin ulug monde fuk fug angge inggarehen ili og eneptisi. Inilaheg ulug indi isarisireg windat eneptisi. Atam Aren wanggi waroho fet enesugmen eneg welatisi angge famen

¹⁰it arimanowen At ele ying turuk lit ahime fanowon ino apmayap turuken At ino it men seli atisireg tog aptuk lit unusuruk latisi.

¹¹Ari turukmu it arimanowen NINIKNI Allah amingmingangge Musa welatfag li fahet wenggel haruk latusareg enele uruk lit, ”Allah umalikisi fet enesuhon Musa ino[31] ik suwon ahummu weregma windatfag ahun ino ketiya kema wereg? Ahime fanowon Musa og itfag ahun kema wereg?

¹²At inggik ineyonen Musa hondoholug laruk lit An nunuk ap obog tohowen palimuwap turukmen eneg welamuhup ulug Israel inap onolohotman ik ahum pul ke minggitfag ahun ino kema wereg?

¹³It arimanowen ik ahum yat toho yenggelehon paltukmu hondog enepfag ahun eleg latisi ano? Wam kuda anggenma laruk lit salog-malog angge turuk eleg hag toho it arimano unuyug kik tuk fug angge laruk latfag.

¹⁴Aben enembohom kinang wawag ulug tonggoma walug laruk hag toho NINIKNI Allah ahime fanowon inowen it arimano kel taruk ambeg fanoma hondoko embeseruk latfag. An nunuk palimu amag ulug indam At inowen umalikisi hondog eneplug laruk latfag,” ulug Israel inaben enele uruk.

¹⁵Israel inaben sembahyang uruk lit, ”NINIKNI Allah, Hat umbagpag turuk lahenon ap eke hiraham welam fug tegma poholma welahenonen pilap nisimin! Hat humalikisi hindi nenesug lahen ane indok ambulpul ulog turuk hahon ino eleg atisi ano? Hat hine roho welatikin ane ino longgo irisi ano? Inilaheg ulug hindi nisaruk latikin ane ino embeserikin? Haren hinggik kobog nisahun fug!

¹⁶Hat nit Ninikni fug? Abraham men Yakub menen nit nunubahet wenggel haruk elehen we Hat NINIKNI Allah hamu eneg Ninikni wereg peruk lahe. We Haren eneg indamen tulug ketiya oho nininggik pug toho weregma lol neneptuk lahen.

¹⁷NINIKNI Allah, nungge fahet An nabunggalem embeselug un ke lawag ulug nunumbaharuk lahen? Nungge fahet An nele holuhup fug ulug ninindi hareyap turuk lahen? Nit Hat hamingmingangge welaheyon fahet An numalikisi ngi reg lahiyon ulug hebeloho yet nisimin!

¹⁸Ket welatukuk li eneg nit men seli roho wereg inaben nit Hat humalikisi yanggal neneptuk lit Hat hunuk wel haptuk ibam unuyuhen sobit-sabar isaruk latusa.

¹⁹Haren nit nunubahet indamen tulug ketiya oho napma wereg eleg inap peruk lit turuk hag toho nit nunubam turuk lahen. Nit Hat humalikisi roho wereg eleg inap hag toho welahe.