Read Angguruk Yali YESAYA 64 Bible Online

YESAYA 64 - Angguruk Yali bible

YESAYA 64

¹Nungge fahet Hat pohol piya roho wambik waharuk lahen fug? Hat halukeman tom obog toho yuk tukag ulug wambik watmihin!

²Indoken esele naruk lit ik putput turuk hag toho folo-folo watmihinmu ap ununggul unuk wal taneg werehon Hat halukeman enekolen unuwag elek turuk lamag! Hat men seli roho werehonen Hat hine roho welahenon fahet inindi anggar aruhu!

³Niren Allahn tuhu fug peruk ane Haren turuk lit ap enekolap eneptuk laruhun! Hat halukeman tom obog toho yuk tukag ulug wambik watmihin!

⁴Allahn fanowap nenebuhu ulug nangno haptuk inap Haren let eneptuk lahen. Haren let eneptuk lahen ane ari hikit toho turukon Hat hahon winon eke weregma ap misihen oho indamen tulug ketiya oho isanggo fam holtuk lit ilen haruk eleg.

⁵Haren peruk ane hikit toho wenggel haruk lit enehiyeg toho fano ane eneg turukon unubam Haren oho fano ane eneg turuk lahen angge famen niren siyag ane eneg turuk latukuk. Haren nunubam holok haruk latikin angge famen nit ninindi anggar am fug angge indamen tulug ketiya oho Hat hele ying haptuk lahe.

⁶Niren siyag ane turuk lahe ane ariyen nit obog toho Hat holohotma wam fug teg ninap welahe. Fano ane tul peruk laheyon oho siyag ane teberuk lahe. Inggila lilohon siyeluwen walug laruk hag toho niren nonolok ane turuk laheyon ariyen mondabi siyag amuhuk.

⁷Hat hunuk uruk lit, ’Nikni, let nabin,’ ulug hubam sembahyang urukon misig oho wereg eleg. Hat haluke yig nisa fug angge ininggarehen siyag ane turukon fahet siyag amag ulug hambol yig nisaruk latikin angge famen

⁸NINIKNI Allah, Hat eneg nit Ninikni welahen. Kubag wituk ahunen kinang fam kubag wituk ane hikit toho nit kinang hag toho welahereg lal neneptuk hahun hinggikmu welahe. Nit obog toho Hat hinggiken wal neneptikinon welahe.

⁹Niren siyag ane turuk laheyon Hat hindimu forohoman eneg holok anggolo roho pet neneptuk laruhun fug! Nit obog toho Hat humalikisi welahereg kim nisaruk laruhun!

¹⁰O pumbuk Haren ngi reg lahenon arimano fare atisimu o Yerusalem oho ap enele teng irisi.

¹¹Haren ngi reg ibam fanowon nunumbasiyen Hat hunuk wel haptuk latfag ambeg ino indoken narisi. Niren ninindi reg latisi ambeg arimano oho halog toho lin isarusa.

¹²NINIKNI Allah, Haren obog toho arimano yet haruk lit let enepmin ulug wenggel haruk lahen fug? Nungge fahet Haren nit alpal neneptuk lahenma asengseng-pasengseng toho welahe?” ulug sembahyang uruk latfag.