Read Angguruk Yali YESAYA 65 Bible Online

YESAYA 65 - Angguruk Yali bible

YESAYA 65

¹ NINIKNI Allahn ele urukon tu, ”Anden numalikisi enele urukon holuhuk peruk latikik angge famen iren An nubam sembahyang uruk latusa fug. Anden it fano nambeg wamag peruk latikik angge famen iren An yami naptuk latusa fug. An nele uruk lit let henepminen An tu welahi ele angge famen numalikisiyen An nunuk wol naptuk latusa fug.

²Numalikisi nambeg wamusa ulug nangno enesugmen eneg welatikik angge famen it enemuwen wenggel haruk ane eneg turuk lit kalem fanowon embeselug An enembol yig nutuk latusa.

³Iren An nolohotma siyag ane eneg turuk lit An nindi siyahap naptuk. It arimano usama laruk lit ap winonen tu Allah hag toho wereg ulug wel eneptukon fahet wam waroho hubu lahaptuk lit usa ahalep fam amben fano angge yaltuk.

⁴Hubanggo ap warehon sal eneptuk ambeg men owik ele ke men arimano lalug ap warehon enehime fam komo nenebiyek ulug heng eneptuk. It arimanowen wam Allahn na fug ulug imbibag angge arimano naruk lit usa ambohom ahaluwe oho saliyog naruk.

⁵Iren ap winon unubam enele uruk lit, ’Niren usa ane turuk lit mondabi fano ninap welahereg nenehap sen nisahup tohon nit horogma fug,’ uruk lit yanggal eneptuk. Obog toho turuk ane ari indok hubu hag toho An nambiyangma lahik waharukon fahet An nolok haruk ane indok ambulpul war am fug tohon hag toho mililang turuk,” ulug Allahn ele uruk.

⁶Iren siyag ane turukon An napeleg am nowen ulug suwesingga fam haharoho emberikik. An kel ta fug angge weregman eneg it men iniknisi menen An nindi siyahap naptuk latusa ane wirim toho alem angginon unubam umbuhuk. Iren punumuwen nunumbasi ulug wel eneptukon fahet hubu lahaptuk lit An ninggaliyap naptuk latusa. Indamen tulug ketiya oho An nolohotman siyag ane til-wil norukon Anden wirim hahukteg ayeg waroho unggum unubam umbuhuk ulug An HINIKNI Allahn uruk lahi.

⁸Anden nin iminon tu holeg lamek: Aben anggur anggen we tot siyahon hik eselep angge famen ahaluwe fanowon we tor angge elma werehen hik isamin fug peruk hag toho Anden oho numalikisi obog toho unusele angge famen it sehelimu namingmingangge An wel naptukon werehen unusuhuk fug.

⁹Anden hun Yakub men Yehuda menen ondohowonen ondohowon arimano inineyap eneptukmu fobik indag amuhubon oho An nangginang fam yug toho welamuhup. An namingmingangge welamuhup ulug mumal eneptikikon arimanowen An nantom arimano ngi reg lamuhup.

¹⁰Numalikisi An yami naptukon arimanowen kinang fanoma hiyaleg ambeg seneg lamuhup. Enembohom domba o Saron tonggoma endetuk lit o Akhor tonggo ke enembohom sapi foroho lamuhup.

¹¹Hit winonen An HINIKNI Allah henembol yig nutuk lit An nantom fam wel nabik waharuk lahep fug. Hiren nunumba Gad ulug wel turuk lahebon fahet nungge-nungge fanowon emberuk lit ninikni Meni ulug fog turuk lahebon fahet ik anggur ahaluwe hilili feruk lahep.

¹²Anden hit wol heneptukmu henele irikip fug. Anden komo heneptukmu hiren An nele holoho embeserikip. Hinindiyen Anden telep fug peruk lahiyon turuk lit An nindi siyahap naptuk lahep. Ari roho turuk lahepma Anden hit ap seliyon ininggikmu hunumbahakukmu hit it onolohotman kunuk toho hur atikim karog fam hunusuhup.

¹³Ari fahet An HINIKNI Allahn iminon tu holeg lamek: An namingmingangge arimanowen suburu naruk lamuhup angge famen hit An fahet hinirim tohon suburu hunik welamuhup. It ik naruk lamuhup angge famen hit ik obok haruk lamuhup. It enehiyeg toho welamuhup angge famen hit hininggali haruk lamuhup.

¹⁴An namingmingangge arimano inindi fano roho sini yunggultuk lamuhup angge famen hit hinindi angginen uba yatuk lit mondabi siyag ahe ulug ya nga uruk lamuhup.

¹⁵An HINIKNI Allah palimu welahiyonen hit hunusuhukmu numalikisi Anden mumal taruk lahiyon arimanowen hit hununuk uruk lit ap seli roho werehon huluwap eneptuk lamuhup angge famen namingmingangge An wel naptukon arimano Anden ununuk keron fanowon suwal enebuhuk.

¹⁶Ununuk keron suwal enebuhukon arimano An nangginang fam wereg lit Allah nit men werehon unuk fam hi haptuk lahi ulug hi-hi atuk lamuhup. Enele uruk lamuhubon fahet tem toho ehep ano ulug kapal isaruk lamuhupmu iren Allah inggik kobog nisa fug angge werehon unuk fam ihi uruk lamuhup. Tam asengseng toho welatusa ane ari Anden elehap tuhukmu sat haruk latusa ane fahet wenggel haruk lamuhup fug,” ulug Allahn ele uruk.

¹⁷ NINIKNI Allahn ele urukon tu, ”Anden pohol keron men kinang keron men wal turuk lahi. Indam teko libag ane fahet aben wenggel haruk lamuhup fug.

¹⁸Anden wal turuk lahiyon fahet henehiyeg toho wereg lit wel naptukmen eneg welamuhup. Anden o Yerusalem keron wal teberuk lahiyon fam aben enehiyehen yunggultuk lamuhup.

¹⁹O pumbuk Yerusalem men numalikisi men fahet An ninggareg nahiyeg haruk laruhuk. O Yerusalem keron fam uba yatukon men let nenebiyek ulug enele hi roho urukon men mondabi eleg laruhu.

²⁰Malik ket indag atlug war atuk ane men ap sabalon hubulu uwan wilip am fugmu war atukon men eleg laruhu. Ap mondabi sabal atuk lit simbuk atlug war atukon fahet aben, ’Kabiniyon war aha,’ uruk lamuhup. Ap uwan mondabi sabal am fugmu war atukon fahet aben, ’Huluwap turusama war aha,’ uruk lamuhup.

²¹Aben o wit taruk lamuhubon arimano ap winonen ngi am fug angge weregma ininggareg eneg o arimano fam welamuhup. Iren anggur yatuk ambeg men yabuk winon men wit taruk lit weregma ap winonen ebe yahal ta fugmu ininggarehen eneg yahal talug naruk lamuhup. An numalikisi mumal tarikikon arimano e olukon wereg hag toho amusun toho wereg lit ininggareg ininggik fam wit tarukon naruk lamuhup.

²³Iren sat toho yabuk wituk lamuhubon obog toho fano teko laruk laruhu. Unumalikisi indag taruk lamuhubon folo-folo war amag ulug indag taruk lamuhup fug. It arimano An INIKNI Allah numalikisi weregma it unumalikisiyen endebuhubon men Anden inineyap eneptuk laruhuk.

²⁴Iren An nubam uwan nungge-nungge heng nabuk fugmu Anden tam nele hiyag isaruk laruhuk. An nubam sembahyang uruk lit obog toho uk fugmu iren wenggel haruk ane obog toho An tam noluk atuk lit let eneptuk laruhuk.

²⁵Olomene olokon men wam domba umalik men inggilangge ambiyeg naruk lamuhup. Mene singa olokon inowen wam sapiyen naruk hag toho hoholangge naruk laruhu. Pisanggowen kinang al eneg naruk lit olok eleg toho welaruhu. Tom Anden ngi reg lahiyon fam werehon misihen oho olok ane tuk fug angge ori siyahap eneptuk laruhu fug,” ulug Allahn ele uruk.