Read Angguruk Yali YESAYA 66 Bible Online

YESAYA 66 - Angguruk Yali bible

YESAYA 66

¹ NINIKNI Allahn ele urukon tu, ”An lehoma heriyeg ambeg pohol weregma An nuyug ahongge kinang wereg. O ke hahon An nubahet wibuhuk peruk lahep? Kema hag ambeg An kel ta reg ulug yami ruruk lahep?

²Pohol men kinang men obog toho An ninggareg ninggiken laltik iyag. Anden nindi isaruk lahi inap fahet iminon tu: Ap siyag ane turukonen nenembiken turukuk ulug apmayap taruk lit An fahet enekol toho werehen An nele holtukon arimano Anden nindi enesug lahi angge famen

³ap arimanowen iren peruk ane hikit toho alem fanowonet siyahonet mangno roho turuk. An fahet wam sapi waroho hubu lahaptuk anggeyen nunumbasi ulug wel eneptukon fahet ap waroho emberuk. An fahet wam domba waroho yaltuk anggeyen niniknisi ulug fog eneptukon fahet mene anggolop sengge roho ware feseruk. An fahet suburu emberuk anggeyen usangge iren tohon fahet wam amep hilili feruk. An fahet e ahaluwe amben fanowon yaltuk anggeyen usangge alem elehon fahet tu Allah hag toho wereg ulug wel eneptuk. Iren An numbahalug ininggarehen lul peruk ke laruk lit An me napeyap naptuk angge fahet enehiyeg haruk.

⁴Anden wol eneptikikmu enele urusa fug. Anden komo eneptikikmu iren An nele holoho embeserusa. Anden telep fug peruk lahiyon turuk lit nindi siyahap naptuk ane fahet enehiyeg haruk latusa. Enehiyeg harusama Anden oho it siyahap eneptuk ane fahet nahiyeg haruk lit enekolap eneptuk laruhuk,” ulug Allahn ele uruk.

⁵Hit Allah ele urukon fahet henekol toho welahebonen Aren hiyag hisamisiyon tu holeg lamek: ”Hiren An nawene seneg lit nunuk palimuwap naptuk lahep ane fahet honori winonen ninirim ulug miyal heneptuk. Iren enele uruk lit, ’Niren yet hulen NINIKNI Allah ineyon inowen fano ane hunubam turukmu hinindimu henehiyeg toho welamag,’ ulug hininggaliyap heneptuk angge famen it ininggareg siyag amuhupteg ininggali haruk lamuhup,” ulug Allahn ele uruk.

⁶Holiyok! O pumbukmu Allah ibamen enele ngik-ngog turuk. NINIKNI Allahn At men seli roho wereg inap ayeg waroho unusuruk ane ariyen aplohok hum toho urukon hol hemek!

⁷ NINIKNI Allahn ele urukon tu, ”O Yerusalem aru hiyap malik enderik oho lit tanggusi uwan na fugmu malik pikit toho indag tarukon hag toho wereg.

⁸Ari roho indag taruk ane misihim oho teko larisimu holtikip ano, yet harikip ano? Ap o pumbuk suwon enebe anggolo werehon hup misig fam eneg indag am teg? Eleg-o, nori! Ap enele teng uruk ambeg misihim eneg ap anggolo keleg am fug teg! We o pumbuk Yerusalem aru eneg asengseng haruk ane we ket ak turuk li itano unumalikisi anggolo indag enebuhu.

⁹NINIKNI Allahn malik indag amag ulug sok husuruk angge famen hiren te indag atmisi fug ulug sok latuk peruk lahep ano? Anden o Yerusalem inap winon hik isarusa ambeg pok atuson arimano suhuloho inibam hondog eneplug waharuk ane ak tirikikteg ir oho inibam wamag ulug sok laruhuk fug. An HINIKNI Allahn nele uruk lahi.

¹⁰Hit o Yerusalem hinindi reg lit at siyag toho welatisi ane fahet hinindi anggin haruk latikibon, Anden o Yerusalem aru fanowap enebuhukmu henehiyehen henele hi roho uruk lamuhup.

¹¹Isingan umalik ag mondotukmu ahiyeg toho naruk hag toho o Yerusalem umbagpag turuk laruhuwon fahet hinindi henehiyeg haruk lamuhup.

¹²An HINIKNI Allahn iminon tu: Iken kinang seiyap turuk hag toho Anden o Yerusalem fanowap tuhukmu o Yerusalem inap arimano enebe fano roho inindi yuwag toho welamuhup. Ik fu waharuk hag toho ap o pumbuk winon arimanowen fano-fano angge forohowon arimano walug waharuk lamuhup. Hit malik fuwon isingan indi rehon hag toho welamuhup. Isingan umalik inggiken helmako walug laruk lit ahoma walinggig lit weregma ag owe toptop narukon hag toho henehiyeg toho welamuhup.

¹³Isingan umalik uba yatukmu onggontuk hag toho Anden hit hinindi seyap henebuhuk. O Yerusalem fanowap tuhukmu hit hinindi se roho welamuhup.

¹⁴Ari roho teko larukmu yet hahupteg hinindi henehiyeg toho wereg lit henebe oho yatuk angge fano wilip atukon hag toho welamuhup. An HINIKNI Allah ninggik ineyonen An namingmingangge An wel naptukon arimano windat enepmin ulug inam arik waharuk lit An men seli roho wereg inap unubam nolok ane tuhuk,” ulug Allahn ele uruk.

¹⁵We tem toho NINIKNI Allahn indok ambulpul unubam pilap isa waruhu. Wam kudan lisoho walug laruk angge fam lahalug laruk hag toho siyelu sehelimu waruhu. Olok anggolowen indi inahan turukmu ele ululu sipuk turuk hag toho uruk lit lebeglu unubam lebeg til waruhu.

¹⁶Ap obog toho kinangma werehon alem unubam werehon kong timin ulug unusuhumu ap anggolo roho indok men karog menen waroho lin uruk lamuhup.

¹⁷NINIKNI Allahn ele eke urukon tu, ”Aben usane tulen nunubabut haloho welamul ulug puhunap taruk lit usa ahun ombolim usama lalug wam pak ap inindimu siyahap eneptuk angge winon Allahn na fug ulug imbibahon saliyog naruk inap arimano misihim eneg siyag amuhup.

¹⁸Iren siyag ane wenggeltuk lit Anden telep fug peruk lahi ane turukon An noluk teg lahireg it obog toho unusuhuk,” ulug Allahn ele uruk. Allahn ele uruk lit, ”Anden ap o pumbuk obog toho enele wal-wal urukon palu enebuhukon horog teg. It arimano obog toho An nambeg wamuhupteg An nine roho wereg lit umbagpag turuk lahiyon yet niyahuben

¹⁹it sehelimu enehane turuk laruhuk. Enehane tuhukteg Anden windat enebuhuk inap sehelimuwon hiyag isaruk lit, ’Ap Anden nine roho turuk lahi ane yet niya fug anggeyen nawene holtusa fuhon arimanowen An nunuk palimu reg lahiyon fahet holukag ulug ap o pumbuk kema-kema werehon hiyag isil lahup. O Tarsis Spanyol kinangma, Libia kinangma, Lidia kinangma, o Mesekh, o Ros, o Tubal men, Yunani kinangma lahupteg kinang atogma ik saho ahik ayeg ke wereg inap oho An nawene hiyag isaruk lamuhup,’ ulug mon enebuhuk.

²⁰Mon enebuhukmu lahupteg suhuloho waharuk lit ap o winon arimanowen hit honori oho hondog eneplug wamuhup. Honori obog toho o kema-kema yanggaloho pilili-palala isarusa ambehen suhuloho hondog eneplug waharuk lit wam kuda keledai unta fam laruk lir oho, e paya roho og eneplug laruk lir oho, wam kudan lisoho walug laruk angge fam lahalug laruk lir oho waharuk lamuhup. Hit Israel hinaben An nubahet roti anggen umbul ulug kubag puhun toho umahowon fam hinanggoho An nibam walug waharuk lahep hag toho ap o winon arimanowen honori NINIKNI Allah fahet umbul ulug An antom o Yerusalem werehon fam hondog eneplug waharuk lamuhup.

²¹Wamuhupmu ap o winonen oho An nibamen yabuk wituk lamuhup ulug it sehelimuwon imam inap men Lewi inap men in enebuhuk ulug An HINIKNI Allahn nele uruk lahi.

²²Anden pohol kinang keron wal teberuk lahiyon tu An nine welahiyon nolohotman eleg am fug angge mondabi welaruhu hag toho hit Israel hinaben endebuhubonen endebuhubon oho eleg lamuhup fug.

²³Mo ilig am wirig am turukmu hundig-hundig pikalem keron ebenam atuk sambil men o sabit sambil men ap kinang atogman atogma werehon obog toho An nolohotma kunuk toho hur atug nubam sembahyang uruk lamuhuben nambeg waharuk lamuhup.

²⁴Ap arimano nin hebeloho o Yerusalemen wilip amuhupteg ap An enembol yig nutuk latuson waroho lin urukmu yet isahup. Waroho lin urukon arimano imbalo war atuk elehonen narikim indok war am fuhon fam mondabi narukmen eneg welamuhup. Ari roho weregma yet isahupteg ap obog tohowen amben mondabi siyag ulug enehap homhombuk turuk lamuhup,” ulug Allahn ele uruk.