Read Angguruk Yali YESAYA 7 Bible Online

YESAYA 7 - Angguruk Yali bible

YESAYA 7

¹Hun Uzia amloho Yotam inowen ondohowon Ahas inowen Yehuda inap fet enesug latfag li Siria inap onowe Rezin men Israel inap onowe hun Remalya amloho Pekah ino menen Yerusalem inap unusul ulug watfag angge famen o pumbukmu kuk fug teg latfag.

²Yehuda inap onowe Ahas inowen hol harukmen, ”Siria inap Israel inap men mangno urusareg Israel kinang fam o saboma wereg,” urukon hol hibareg Ahas umalikisi Yehuda inap men enekol anggolowen e farema siyeluwen fu rurukmu yuk turuk hag toho unuwag elek turuk latfag.

³Ari turukmu NINIKNI Allahn hun Yesaya hiyag utuk lit, ”Hamloho Syear Yasyub[7] men hun Ahas ambeg lalihip. Lalihipteg o pumbuk palimu ik yenggelehon ino famen sul angge hale feruson ambiyangma sum uruk inap wereg ambeg itan Ahas men salkal ilihip.

⁴Salkal ilihipteg Ahas ubam hiyag utuk lit, ’Hindi yuwag toho wereg lit sap teg latmihin! Israel inap onowe Pekah men ap suwon Rezin umalikisi Siria inap menen onolok haruk ane we indok ambiyang famen hubu wilip atukon hag toho werehen hindi anggin toho wereg lit hakol ha fug!

⁵Siria inaben ap suwon Pekah umalikisi Israel inap men enele sahaltuk lit,

⁶’Yehuda inap men tog aptuk lit hit men mangno amul ukag ulug enekolap enebuhukteg Tabeel amloho Yehuda inap onowe lahabuhuk,’ ulug enele sahaltuk latusa angge famen

⁷An HINIKNI Allahn nele uruk lahiyon tu: Iren peruk ane hikit toho teko lahu fug.

⁸Siria inap inine reg lalep angge famen it onowe Rezin wereg ambeg Damsyik ino wiyig tegma Rezin oho ine reg elehen hakol ha fug. Mo ilig am wirig am turukmen teng hinahanam 65 lahumu Israel inap oho hik-hak isahupmu it ununggul unuk Israel inap urukon eleg laruhu.

⁹Israel inap inine welalep angge famen it onowe Pekah ino wereg ambeg Samaria ino wiyig tegma Pekah oho ine eleg. Hit hinindi wirik toho An nubam wenggel haruk lamuhup fug halug hinine roho unduhuk lamuhup fug!” ulug NINIKNI Allahn hiyag itfag ane hikit toho Yesaya inowen ap suwon Ahas hiyag itfag.

¹⁰NINIKNI Allahn nin eke ap suwon Ahas fam hiyag utuk lit,

¹¹”An HINIKNI Allahn hiyag hirihi ane fahet tem toho hiyag nerehek pemihinen, ’Enehangge apma fil ap warehon wereg ambehen ano, pohol filen ano wal hamihin,’ ulug heng napmihin,” ulug Yesaya feneyen hun Ahas hiyag itfag.

¹²Hiyag itfagma Ahas inowen ele uruk lit, ”Anden NINIKNI Allah wal ha fug teg lahireg heng timin fug,” ibagma

¹³Yesaya inowen hebeloho hiyag utuk lit, ”Hat ap suwon Daud inowen ondohowonen ondohowon welahenma iminon tu holeg lamin: Hiren ap enele ying eneptuk lahebon fahet tot teg peruk lit an Nikni Allah ele oho ying turuk lahep?

¹⁴Ari fahet NINIKNI Allah inggarehen enehangge misig teko lahuwon fahet hiyag hitmisi: Hiyap tuhumon misig malik ahummu fet taluhon inowen malik ap angge indag tahureg unuk Imanuel[8] suwaluhu.

¹⁵Malik inowen wam sapi ag humu men kin ahaluwe men naruk lit su aruhureg fanowon tu, siyahon tu ulug oluk teg laruhu.

¹⁶Malik inowen fanowon tu, siyahon tu ulug uwan haloho umbuk fugmu ap suwon hat hakolap haptukon piren enengginang wal toho senehon itano ap eleg ambeg hag aruhu.

¹⁷Fobik NINIKNI Allahn Asyur inap onowe suwon hit henembeg monde fuhumu hat huhe malik men hotsi Yehuda inap men asengseng haruk lit weregman eneg hup anggolo aruhu. Asengseng hahup ane ari hahon Yehuda kinang men Israel kinang men minggir atfag liyen tulug ketiya oho yet harikip fug.

¹⁸Ari teko lahu li NINIKNI Allahn Mesir inap ik Nil wilip atuk ambeg werehon[9] men Asyur inap men wol enebuhumu ap arimano sobon men kin ami men hag toho mondoko wamuhupteg

¹⁹fanggongma kiling elma men wam lalma alog wereg ambeg men hililip teg lamuhup.

²⁰Ninikni Allahn Asyur inap onowe suwon ik Efrat fimag filen wol tuhureg, ’Israel inap onoruk men enemenderuk men unumbanisung men fili fam her enebuhun,’ ulug mingming turuk laruhu.

²¹Ari tuhu li ap misig-misig enebe wal tanehen we wam sapi heyon misig men wam domba piren men eneg foroho lamuhup angge famen

²²wam itanowen ag humu anggolo atukmu enehum ouk toho naruk lamuhup. We tik-tem toho ap tor angge kinang aru fam welamuhubon itanowen ag humu men kin ahaluwe men naruk lit fano welamuhup.

²³Ari tuhu li yabuk hom ei teng-teng angge 1.000 yabuk teg ambeg[10] onggo warukon uang perak teng-teng angge 1.000 wirim teg ambeg arimano famen alog-alog angge wilip aruhureg keleg teg lamuhup.

²⁴Ari reg ambeg arimano aben suwe pak wabul ulug sehen seneko eneg kuruk lamuhup. Kinang aru atogman atogma alog-alog angge wilip aruhureg hondo reg laruhu.

²⁵Ari regma tom alem ke yabuk wituk ambeg oho alog angge keleg tehen ap enekolen laruk lamuhup fug. We wam sapi men domba men eneg wereg lit unuyuhen lilibug turuk lamuhup,” ulug hiyag itfag.