Read Angguruk Yali YESAYA 8 Bible Online

YESAYA 8 - Angguruk Yali bible

YESAYA 8

¹NINIKNI Allahn an hiyag nutuk lit, ”Helep anggeyon suwon eke wamihinteg helep ino fene seleg toho hahatuk lit, ’Huhulangge folo-folo hilarukon,’ ulug hahare femihin,” irisi.

²Irisimu anden hahatmin ane yet haluson ulug ap piren inindi wirik tohon itano misig Allah olohotma unduhuk ahun imam Uria, misig hun Yeberekhya amloho Zakharia men wol eneptikik.

³Wol eneptikikteg wereg lit an nuhe men nohorukukmu malik ahummu atisireg malik ino ap angge indag atisimu NINIKNI Allahn nubam ele uruk lit, ”Malik aru unuk ’Huhulangge Folo-folo Hilarukon,’ suwalmihin.

⁴Malik aruwen niyon, hina uk fugmu Damsyik inap enengge men Samaria inaben tohon men Asyur inap onowe suwon inowen huhulangge hilaruk laruhu,” ulug NINIKNI Allahn hiyag nitisi.

⁵NINIKNI Allahn nin eke nubam ele uruk lit,

⁶”Yehuda inaben ik Syiloah aplohok eleg angge larukon ino fahet ninirim ulug embeseruk lit[11] ap suwon Rezin men Pekah men itano onolohotman enekolen unuwag elek turuk.

⁷Ari fahet An Hinikniyen Asyur inap onowe suwon men otsi sehen senehon obog toho men Yehuda inap unusuhuben wol enebuhukmu Asyur inap arimano ik Efrat ino fu waharuk lit fimag-fimag miyaloho laruk hag toho wamuhup.

⁸Wamuhupteg ik fu waharuk lit kinang ahakoma laharuk hag toho ap arimanowen Yehuda kinang atogman atogma miyaloho laruk lit mun angge man angge hondo ruhup,” ulug NINIKNI Allahn hiyag nitisi. Allah nit men wereg! Suweyen aherabul apma umalik fet enesug hag toho Allahn kinang aru atogman atogma welaheyon obog toho fet nenesug.

⁹Hununggul unuk wal taneg welahebonen nit fano nunusuhuben mangno iyek! Hit mangno amuhup angge famen henekolen yuk lahup. Kinang atogman atogma welahebonen holeg lamek! Tog abul ulug wep toho welamek! Wep toho welamuhup angge famen henekolen yuk lahup.

¹⁰Tuhup ane fahet henele sahaltuk lit kong toho iyek! Allah nit men werehen hiren tul peruk lahep ane teko lahu fug.

¹¹Misihim sambil NINIKNI Allah inggik ineyonen sen naptisireg, ”Hori Yehuda inap laruk abunggalem hat lahun fug,” ulug komo naptisi.

¹²Komo naptuk lit, ”Yehuda inaben enele enekol nim-nim uruk lit, ’Siyahap neneptuk inaben nunusuhuk ulug hirahoman enele sahaltuk,’ urukon holtuk lamuhup fug. It enekolap eneptukon fahet hit henekol ha fug angge yuk lahup fug!

¹³An HINIKNI Allah pohol ha kinang ha seneg lahiyon fahet At ebe usa fulu reg ulug honoluk toho wereg lit An nubahet eneg henekolen hinindi yuk toho welamuhup.

¹⁴An Allah nebe usa fulu reg lahireg helep atog kema sap tohon hag toho sap teg laruhukmu Yehuda inap men onori Israel inap men larukmen unuyug kik toho mako wambuhup. An yebangge hag toho welaruhukmu Yerusalem inap arimano luhur amuhup.

¹⁵Ap anggolo yebangge elman luhur amuhupteg yowilangge anggolo reg amuhupteg mondabi siyag amuhup.

¹⁶Allahn ap komo eneptuk laruhun ulug hiyag nutuk latisi ane hit an notsi milal heneptuk lahi. Milal heneptuk lahi ane ari hiren seneg lit fano roho foroho lamuhup.

¹⁷NINIKNI Allahn hun Yakuben ondohowonen ondohowon unubam aluke yig isaruk eleg angge famen anden At fahet we tem peruk lit Aren eneg fanowap nenebuhu ulug wenggel haruk lahi.

¹⁸An men numalikisi Allahn og nitisiyon men NINIKNI Allah pohol ha kinang ha senehon tom Sion fam werehon inowen Israel inap fahet enehangge welamuhup ulug nunumbaharisiyon welahe.

¹⁹Aben hit hunubam enele uruk lit, ”Ap warehon enehime men enembol fam angge men enele ahuri roho enenggolop elman urukon arimanowen teko lahu ane fahet hiyag nisalusan wol eneplihip,” uhupteg nin eke hiyag hisaruk lit, ”Nit nonoluk welaheyon nunubam hiyag nisalusan ap war atukon enehime unubam fano heng eneptuk lahe,” ulug hiyag hisaruk lamuhup.

²⁰Ari roho hiyag hisaruk lamuhup halug hiren ap arimano hebeloho hiyag isaruk lit, ”NINIKNI Allahn komo neneptuk ane eneg holtuk lamuhup! Ap san Allahn komo neneptuk ane hikit toho uruk eleg halug at ino ubam fanowon welaruhu fug,” ulug hiyag isaruk lamuhup.

²¹Fobik ap inindi anggin toho wereg lit suburu obok haruk lit kinang aru fam la wam turuk lamuhup. It arimano suburu obok toho wereg lit onoloken inindi ahe laharuk lit it onowe suwon ino men Inikni Allah men huluwap eneptuk lamuhup. Iren pohol fil lahap ha

²²kinang fil pilap ha turuk lit nungge-nungge fanowon yet ha fug angge asengseng toho turuk lit hik tegma eneg laruk lit inindi mako pug toho wereg lamuhup. It arimano hik teg ambeg hik isahup angge famen

²³ap kinang aru fam werehon hik tegman eneg mondabi asengseng toho welamuhup fug. Ununggul unuk Zebulon inap men Naftali inap men enengginang fahet aben atam apma reg peruk latfag angge famen fobik hebeloho kinang itano saho ahik ayegma werehon men Yordan fimag fil werehon men Galilea kinang ap o winamon anggolo wereg ambeg men palimu reg laruhu.