Read Angguruk Yali YESAYA 9 Bible Online

YESAYA 9 - Angguruk Yali bible

YESAYA 9

¹O pumbuk walinggoho wereg inap o hik tegma laruk latusa angge famen ketiya mondabi seleg fanowon yet haruk. It kinang hik teg ambeg werehon arimano seleg fanowon unubam atuk.

² NINIKNI Allah, Haren it inindi fanowap eneptikinmu enehiyeg anggolo haruk. Aben anggen tahantuk lit enehiyeg haruk hag toho Hat holohotman enehiyeg toho wereg. Aben huhulangge hilarukon fibituk lit enehiyehen yunggultuk hag toho Allahn fano ane tirisi ulug inindimu fano haruk.

³Haren numalikisi ap o winama werehon ininggikmuwen windat enepmin ulug e paleg angginon unumaloma ha rohon kong toho hik isarikin. Haren atam Midian inap sehen senehon arimano waroho apmayap eneptik inag hag toho humalikisi siyahap eneptuk inap arimano oho apmayap eneptikin.

⁴Ap seliyon sehen senehon unuyug hililip angge aplohok folung til larukon men enesum ap enemep yuhulihon men indokma yale fusuhup.

⁵Malik eke nit fahet indag atisi, malik ap angge misig nit fahet og nisarisi. Malik ino nit nonowe aruhuwen enehangge umaloma umbuhup. Aben at unuk uruk lamuhubon tu, ”Ap komo eneptuk lit fanowap eneptukon, Allah ineyon, Ninikni mondabi oluk werehon, Nonowe tog pilaptukon.”

⁶At ino umba Daud ubalmangge wereg lit kinang mondabi ine roho seneg laruhu. Aren ap let eneptuk lit alem obog toho fano roho haltukmen eneg ine eleg am fug angge welaruhu. Kinang aren senehon ino fam alem nungge-nungge inam am fug angge ketiya famen tulug fobik oho mondabi fano roho eneg welamuhup. NINIKNI Allah pohol ha kinang ha senehon inowen alem ari obog toho teko lawag ulug kong toho imbibag angge re obog toho tubuhu.

⁷Ninikni Allahn Israel inap unubam alem angginon umbuhuk irisi. Ele irisiyon ino Yakuben ondohowonen ondohowon unubam hikir atisi.

⁸Allahn irisiyon hikit toho nunubam tirisi ulug ap obog tohowen onoluk atisi angge famen Efraim inap men o Samaria inap men inindi winik-wonog toho hemet til laruk lit,

⁹”Ap seliyonen ninibam kinang tag toho wirihon halog toho lin-lan isarusama niren ubalma o helep fam wiri fuhuk. O uwag e wiyihon fala roho siyahap turusama ubalma e sahi hutuk tubuhuk,” urusa.

¹⁰Ari urusama NINIKNI Allahn ap seliyon inineyap eneptisireg Israel inap apmayap enebuhup ulug inindi kahal eneptisi.

¹¹Inindi kahal eneptisimu yali filen Siria inap, hubula filen Filistin inap waharusareg o Israel kinang mag-mag narusa. Ari obog toho teko larisi angge famen Israel inap arimano unusimin ulug Allahn inggik imbik wambuk fug angge lehoman eneg welatisi.

¹²Ari roho turuk lit Allahn alem angginon unubam emberisi angge famen Israel inap arimano Allah ambeg hebeloho wam fug angge NINIKNI Allah pohol ha kinang ha senehon yami ruruk latusa fug.

¹³Yami ruruk latusa fugmu NINIKNI Allahn ikan waroho unggul men ahaye tog men kong toho hik isaruk hag toho o misihim sambil eneg onowesi roho werehon men Allah amingmingangge nabi enele si ane urukon arimano men elehap eneptisi.

¹⁵Israel inap milal eneptukon arimanowen un ke lahup ulug inindi kahal eneptukmu unumalikisi inindi nonghong uruk.

¹⁶Ap obog tohowen Allah eleg ulug ininggik fam siyag ane turuk lit enembilik fam sohu-sohu ane eneg uruk. Ari fahet Ninikni Allahn Israel inap kabiniyon inindi enesug lam fug angge embeseruk lit malik suwarehon men hiyap yuwohon men let eneptuk eleg. Ari obog toho teko laruk angge famen Israel inap arimano unusimin ulug Allahn inggik imbik wambuk fug angge lehoman eneg wereg.

¹⁷Alog-alog angge harep nil laruk lit fare wilim teg ambeg narukmu hubu muhul mondotuk hag toho Allah eleg peruk lit hare ane turukon ariyen ap siyahap enebil laruk.

¹⁸NINIKNI Allah pohol ha kinang ha senehon inowen olok haruk ane ariyen Israel inap enebeyet enengginanget indoken narukon hag toho wereg. Ap obog tohowen onori inindi enesug lam fug angge siyahap eneptuk.

¹⁹Nonori ununu namin ulug ininggik pikit filon mag-mag pil isil laruk angge famen suburu obok toho wereg, ininggik hare filon mag-mag pil isil laruk angge famen enehum ouk atuk eleg.

²⁰Israel inap ununggul unuk Manasye inaben onori Efraim inap isag eneptuk, Efraim inaben Manasye inap isag eneptuk. Isag-isag atuk angge famen Yehuda inap isag enebul ulug Efraim inap men Manasye inap men mangno atuk. Ari obog toho teko laruk angge famen Israel inap arimano unusimin ulug Allahn inggik imbik wambuk fug angge lehoman eneg wereg.