Read Angguruk Yali IMAMAT 10 Bible Online

IMAMAT 10 - Angguruk Yali bible

IMAMAT 10

¹Welatfagma Harun umalikisi Nadab men Abihu men wal tanehen indok anggen kilaboho walug laruk angge iren tohon wibareg indok anggen kilaplug amben fano angge palimu imbibag. Ari roho tibag ane ari NINIKNI Allahn hiyag isibag fug ane turuk lit indok anggen hubu lahaptuk ambehen wa fug angge indok anggen amuwon NINIKNI Allah olohotma walug watfag.

²Walug watfagma NINIKNI Allah famen indok ambulpul wilip atfareg Harun umalikisi piren itano han wiyaloho war atfag.

³War atfareg lin urukmu yet isibareg Musa inowen Harun fam ele uruk lit, ”NINIKNI Allahn ele urukon: ’An niyabuk wituk lit niraham waharukon arimano onolohotman An nebe usa fulu nahunen nine roho turuk laruhuk, An numalikisi obog toho onolohotman An nebe umbagpag toho inam arik waharuk laruhuk,’ irisi ane ari ketiya hikir aha,” ibagma Harunen ele hebeloho ibag fug.

⁴Ibag fugmu Musa inowen Harun ikni ot Uziel umalikisi Misael men Elsafan men wol enepfareg hiyag isaruk lit, ”Hit honori wareg angge arima o sabo fanowon alukeman wak lalihipteg nit o sabo wiroho welahe ambehen wilip atug selma walug lalihip!” ulug hiyag isibag.

⁵Hiyag isibag ane ari hikit toho Misael men Elsafan menen Harun umalikisi wareg angge piren imamen wan teg asum wan turukon itano wak libareg o sabo wirig ambehen walug wilip atfareg selma hik isa libag.

⁶Hik isa libagma Musa inowen Harun men umalikisi Eleazar men Itamar men hiyag isaruk lit, ”NINIKNI Allahn hit piren oho hunusuruk lit Israel inap aruma obog toho unubam olok hahu rohon ulug honoruk kong tuk fug angge fesi lahaboho fong wabuhup fug. We honori Israel inap aruman eneg NINIKNI Allahn honori piren itano indok fam unusehekon fahet uba yatuk lamag.

⁷Hit NINIKNI Allah amingmingangge imam welamuhup ulug e zaitun ahaluwe hununggulmu are heneptikik angge re o sabo fanowon sok embeselug la fug. Sok ari embeselug laruk lit war amuhup tohon!” ulug hiyag isibag ane hikit toho turuk latfag.

⁸NINIKNI Allahn Harun fam ele uruk lit,

⁹”Hit war amuhup tohon hat humalikisi menen ik anggur ano ik olokon winon ano nalug o sabo fanowon An men Ambi Atuk Ambeg ino kik waharuk lamuhup fug! Anden emberuk lahiyon ari hit hunumalikisiyen endebuhubonen endebuhubon arimanowen oho senegman eneg welamuhup.

¹⁰Hiren te tu Allah men wirim teg, tu wirim teg eleg peruk lamuhup, ap fanowap eneptuk angge tu, ap siyahap eneptuk angge tu ulug haluk teg lamuhup.

¹¹An HINIKNI Allahn Israel inaben mun ane man ane turuk lamuhubon fahet Musa hiyag itikik ane arimano hiren honori seleg toho hiyag isaruk lamuhup,” ulug hiyag itfag.

¹²Hiyag itfagma Musa inowen Harun men umalikisi Allahn unusibag fuhon Eleazar men Itamar men unubam ele uruk lit, ”Aben roti anggen NINIKNI Allah fahet umbul ulug minggiroho winon yaltuk lit winon yaltuk lamuhup fuhon arimano hiren hilalug roti suwap turuk angge embeselug tag toho wiratuk lamuhupteg Allah olohotma embehesa angge nul ulug At fahet hubu lahaptuk ambeg irahamen naruk lamuhup.

¹³NINIKNI Allahn hiyag nitisi ane hikit toho hat humalikisiyen endebuhubonen endebuhubon arimanowen oho roti anggen aben NINIKNI Allah fahet emberukon minggiroho winon walug Allah olohotman naruk lamuhup.

¹⁴Israel inaben Allah olohotman wam nul ulug walug waharukon iliyapma men uyug men Allahn kong toho emberisi ane hikit toho hat humalikisiyet hilalug siyag teg eleg ambehen naruk lamuhup. Naruk lit humalikisi hiyabon oho naruk lamuhup.

¹⁵Wam uyug men iliyapma men nuk oho lit imamen wam sei obog toho men hubu lahaptuk ambeg alukema walug Allah olohotma leho feruk lamuhup. Leho fuhupteg wam uyug men iliyapma ino men imamen naruk lamuhup. Naruk lamuhubon ino fahet NINIKNI Allahn emberisi ane hikit toho hat humalikisiyen endebuhubonen endebuhubon arimanowen mondabi senegman eneg welamuhup,” ibag.

¹⁶Ari ibareg Musa inowen wam kambing uwaliyon Israel inaben siyag ane turuk latukukon Allahn elehap tukag ulug imbibahon ino yami ril libareg hol harukmen wam ino abirangge yalehesa urukmu holfareg indi olok toho Harun umalikisi Allahn unusibag fuhon Eleazar men Itamar men hiyag isaruk lit,

¹⁷”Nungge fahet wam ino Allah olohotman nenggep fug? Wam unu ino Allah fahet embehesa angge re o fanoman nelep. Hit imamen Israel inaben siyag ane turuk latuson elehap turuk lit An Allah nindi nahiyehap nabusa ulug At inowen wam unu ino hit og hesehek.

¹⁸Og hesehekma anden irikikon hikit toho o sabo owahalman nelep. Wam amep ino o sabo fanowon fam walug kelep halug eneg wam unu na fug angge abirangge indokma yaltep,” ulug komo yig isibag.

¹⁹Komo yig isibagma inikni Harun inowen Musa hebeloho hiyag utuk lit, ”Fano ehen. Israel inaben siyag ane turuk latukukon Allahn elehap tukag ulug wam waroho hubu lahaptuk lit wam eke waroho yalehesa. Yalehesaman an numalikisi men alem angginon yet hehenon ari nunubam aha. Alem ari nunubam teko laha angge re niren te wam unu ino nila halug NINIKNI Allahn fano pelep ano?” ulug hiyag itfag.

²⁰Ari ulug hiyag itfag ane Musan holfareg fano ehek pibag.