Read Angguruk Yali IMAMAT 12 Bible Online

IMAMAT 12 - Angguruk Yali bible

IMAMAT 12

¹NINIKNI Allahn Musa fam ele uruk lit,

²”Israel inap hiyag isahunon tu: Hiyap ekeyen malik ap angge indag taruk halug pikalem sap turuk li hag toho siyag angge ubam tag teg laruhu. Tag teg lit weregman eneg hup sabirenam aruhu.

³O likin angge malik ino ambilahap paluhup.

⁴Paluhupmu isinga ino olma weregman eneg o teng misigmen nubam hilag falfaliken 33 aruhumu ahap puhun aruhu. Ahap uwan puhun am fugmu Allah fahet emberuk angge senetuk lit Allah ibam iraham laruk laruhu fug.

⁵Hiyap ekeyen pikalem sap turuk lit wereg hag toho hilani umalik indag talug siyag angge ubam tag tehen hup nunggul huriken aruhu. Aruhumu sali teng pirenman nubam hilag nisanggowen 66 olma weregman eneg ahap puhun aruhu.

⁶Hiyap inowen ap umalik ano hilani umalik ano indag talug olma weregman eneg ahap puhun aruhumu Allah fahet waroho yaltukon wam domba mo misig famon eke men siyag ane an nubam werehon Allahn elehap tukag ulug yaltukon suwe yalma ano pel hahon ano o sabo fanowon sokolma walug Allah amingmingangge imam og irik waruhu.

⁷Og irik waruhumu imam inowen wam ino men suwe ino men NINIKNI Allah olohotma waroho hubu lahaptuk lit siyag ane hiyap ubam werehon ino elehap tuhu. Elehap tuhumu hiyap ino ebe nin hebeloho puhun toho welaruhu. Ari hag toho hiyaben ap umalik ano hilani umalik ano indag tarukon arimanowen turuk lamuhup.

⁸Hiyap ino inggikmu elehen wam domba eke wa fug teg laruhu halug suwe yalma piren ano pel hahon piren ano walug waruhureg suwe misig ino Allah olohotma waroho yaltukon men, misig ino siyag ane an nubam werehon Allahn elehap tukag ulug yaltukon men imam og uruhumu imam inowen suwe piren itano waroho hubu lahaptuk lit siyag ane hiyap ubam werehon ino elehap tuhu. Elehap tuhumu hiyap ino ebe nin hebeloho puhun toho welaruhu,” ibag.