Read Angguruk Yali IMAMAT 13 Bible Online

IMAMAT 13 - Angguruk Yali bible

IMAMAT 13

¹NINIKNI Allahn Musa men Harun men unubam ele uruk lit,

²”Ap eke salukangge hahon ket ubam atuk lit ahap yanggo atukmu oho fitukmu oho ahamut warukmu oho imam Harun ambeg ano umalikisi enembeg ano hondoholug lahup.

³Hondoholug lahupmu imam inowen kim harukmen ahap nin atuk ambeg ino we tot unda fil yendetuk ambehen amenderuk il yanggo rehon wilibigmu kim hahureg salukangge wereg ulug oluk aruhumu ap tu siyag angge ubam tag teg ulug fag toho uhu.

⁴Imam inowen kim harukmen ahap nin atuk ambeg ino il yanggo reg angge famen unda fil yendeg elegma amenderuk oho yanggo reg eleg halug imam inowen ap ino hiyag utuk lit hat selma la fug angge olma weregman eneg hup sabirenam aruhu ulug hiyag uruhureg seneko umbuhu.

⁵Seneko umbuhureg weregman eneg hup sabirenam aruhumu imam inowen kim harukmen ahap yanggo reg ambeg ino su am fug angge tam welatisi hag toho weregma kim hahureg inggik pireneg angge ap ino seneko umbuhureg weregman eneg hup sabirenam aruhu.

⁶Hup sabirenam aruhumu imam inowen nin hebeloho kim haruk lit ahap yanggo reg ambeg ino su am fug angge il yanggowon ino oho eleg atukmu kim hahureg ap ino ebene yalimane eneg werehen anggin eleg ulug oluk aruhumu ap tu siyag angge ubam tag teg eleg ulug fag toho uhu. Ari uhumu ap inowen sum wan tehon ik umaho fuhu.

⁷Ik umaho fuhureg weregman yalimane ino su aruhu halug ap ino inggik pireneg angge imamen kim niyawag ulug ambeg lahu.

⁸Lahumu imam inowen kim hahureg yalimane su atisiyon aru salukangge wereg ulug oluk aruhumu ap tu siyag angge ubam tag teg ulug fag toho uhu.

⁹Ap eke ahap salukangge rohon imamen kim hawag ulug ambeg hondoholug lahup.

¹⁰Hondoholug lahupmu imam inowen kim harukmen ahap fituk ambeg il yanggo regma unu pintil heheg wilip atikim ahap nin atuk ambehen amenderuk il yanggowon wilibigmu kim hahureg

¹¹salukangge amusun toho ubam wereg ulug oluk aruhumu imam inowen siyag angge ubam tag teg ulug fag toho uhu angge famen ap ino seneko umbuhu fug.

¹²Umbuk fug angge wereg lit imam inowen kim harukmen salukangge ino su atuk lit unggul famen uyug fam ebe abirangge hondo regma kim hahureg

¹³imam inowen ap tu ahap obog toho yanggo rehen siyag angge ubam tag teg eleg ulug fag toho uhu.

¹⁴Imam inowen kim harukmen ahap yanggo reg ambehen unu pintil heheg wilip atukmu kim hahureg salukangge wereg ulug oluk aruhumu siyag angge ubam tag teg ulug fag toho uhu.

¹⁵

¹⁶Unu pintil heheg wilip atukon ino nin tot atuk lit il yanggo atuk halug ap ino nin hebeloho imamen kim niyawag ulug ambeg lahumu imam inowen siyag angge ubam tag teg eleg ulug fag toho uhu.

¹⁷

¹⁸Ap eke pot ubam urukon fano atuk angge famen

¹⁹fano atuk ambeg ahap fituk lit il yanggo atukmu oho il yanggowon men huluwon men mangno roho inam atukmu oho ap ino imamen kim niyawag ulug ambeg lahu.

²⁰Lahumu imam inowen kim harukmen ahap nin atuk ambeg ino we tot unda fil yendeg ambehen amenderuk il yanggowon wilibigmu kim hahureg pot famen salukangge atisi ulug oluk aruhumu ap tu siyag angge ubam tag teg ulug fag toho uhu.

²¹Imam inowen kim harukmen ahap nin atuk ambeg ino il yanggo reg angge famen unda fil yendeg elegma il yanggowon tor atukmu amenderuk oho yanggo reg eleg halug imam inowen ap ino hiyag utuk lit hat selma la fug angge olma weregman eneg hup sabirenam aruhu ulug hiyag uruhureg seneko umbuhu.

²²Seneko umbuhureg weregman eneg hup sabirenam aruhumu imam inowen nin hebeloho kim haruk lit ahap yanggo reg ambeg su atisi ulug kim hahureg salukangge wereg ulug oluk aruhumu ap tu siyag angge ubam tag teg ulug fag toho uhu.

²³Il yanggo reg ambeg su am fug angge welatisi hag toho welaruhu halug imam inowen pot irisireg fano atisi ulug oluk aruhumu ap tu siyag angge ubam tag teg eleg ulug fag toho uhu.

²⁴Ap eke ahap indoken naruk ambeg il yanggo atukmu oho yanggowon men huluwon men mangno roho inam atukmu oho

²⁵imamen kim hahu. Kim haruk lit ahap indoken naruk ambeg unda fil yendeg ambehen amenderuk il yanggowon wilibigmu kim hahureg salukangge wereg ulug oluk aruhumu ap tu siyag angge ubam tag teg ulug fag toho uhu.

²⁶Imam inowen kim harukmen indoken naruk ambeg ino unda fil yendeg elegma il yanggowon tor atukmu amenderuk oho yanggo atuk elegma kim hahureg imam inowen ap ino hiyag utuk lit hat selma la fug angge olma weregman eneg hup sabirenam aruhu ulug hiyag uruhureg seneko umbuhu.

²⁷Seneko umbuhureg weregman eneg hup sabirenam aruhumu imam inowen nin hebeloho kim haruk lit ahap yanggo reg ambeg su atisi ulug kim hahureg salukangge wereg ulug oluk aruhumu ap tu siyag angge ubam tag teg ulug fag toho uhu.

²⁸Il yanggo reg ambeg su am fug angge welatisi hag toho welaruhu halug imam inowen indoken narisi ambeg fano atisi ulug oluk aruhumu ap tu siyag angge ubam tag teg eleg ulug fag toho uhu.

²⁹Ap angge hiyap angge ununggulmu ano ap panisung wilip atuk ambeg ano yalimane reg halug

³⁰imamen kim hahu. Kim harukmen yalimane ino unda fil yendetukmu oruk selon yanggowon eneg wilibigmu kim hahureg salukangge unggulmu men iyahundema panisung wilip atuk ambeg men wereg ulug oluk aruhumu ap tu siyag angge ubam wereg ulug fag toho uhu.

³¹Ahap nin atuk ambeg ino yendeg elegman oruk selon eneg wilibigmu kim hahureg imam inowen ap ino hiyag utuk lit hat selma la fug angge olma weregman eneg hup sabirenam aruhu ulug hiyag uruhureg seneko umbuhu.

³²Seneko umbuhureg weregman eneg hup sabirenam aruhumu imamen kim harukmen ahap nin atisi ambeg ino su am fug angge welatisi hag toho wereg lit unda fil yendeg eleg ambehen oruk selon wilibig elegma kim hahumu

³³ap inowen oruk ahap nin atuk ambeg walinggoho wilip atukon paluhu. Paluhumu imam inowen ap ino inggik pireneg angge seneko umbuhureg weregman eneg hup sabirenam aruhu.

³⁴Hup sabirenam aruhumu imamen kim harukmen ahap nin atuk ambeg su am fug angge welatisi hag toho wereg lit yendetuk elegma kim hahureg ap tu siyag angge ubam tag teg eleg ulug fag toho uhu. Ari uhumu ap inowen sum wan tehon ik umaho fuhu.

³⁵Ari tuhureg weregman yalimane ino su aruhu halug

³⁶imamen kim niyawag ulug nin hebeloho ambeg lahu. Lahumu imamen kim hahureg oruk selon wilibig ano ulug yami ruk fug angge ap tu siyag angge ubam tag teg ulug oluk aruhu.

³⁷Yalimane ino su am fug angge welatisi hag toho weregma oruk singon wilibigmu kim hahureg imam inowen ahap nin atisi ambeg ino hebeloho fano atisi ulug oluk aruhumu ap siyag angge ubam tag teg eleg ulug fag toho uhu.

³⁸Ap angge ano hiyap angge ano enehap yanggowon inam atuk halug

³⁹imamen kim niyawag ulug ambeg lahu. Lahumu imam inowen kim harukmen ahap nin atuk ambeg tor angge yanggo regma kim hahureg hayen tehen ap tu, hiyap tu siyag angge unubam wereg eleg ulug oluk aruhu.

⁴⁰Ap eke unggul tilag teg halug siyag angge ubam tag teg eleg.

⁴¹Ap eke oruk orohole fil werehon eleg atuk halug siyag angge ubam tag teg eleg.

⁴²Oruk eleg ambeg unggul aluglugmu ano ilahuwagma ano ahap yanggowon men huluwon men mangno roho inam atuk halug imamen kim niyawag ulug ambeg lahu. Lahumu imam inowen kim hahureg ahap yanggowon men huluwon men mangno reg ambeg ino firigmu kim hahureg salukangge hag toho wereg ulug oluk aruhu.

⁴³

⁴⁴Oluk aruhumu imam inowen salukangge ap tu unggulmu werehen siyag angge ubam tag teg ulug fag toho uhu.

⁴⁵Salukangge enebene wereg inap arimano sum tararag tehon eneg wan teg lit onoruk paluk fug angge embeselug panisung saloho welamuhup. Ari reg lit ap an niraham waharuk lit sen nabuhup tohon ulug, ”Siyag angge nubam wereg, siyag angge nubam wereg,” ulug hi roho uruk lamuhup.

⁴⁶It enehap uwan fano am fugmu siyag angge unubam welaruhu. Siyag angge unubam werehen o sabo wirig ambehen wilip amuhupteg enemumu welamuhup.

⁴⁷Aben wan turuk asum sulumon men, wam domba oruk fam suwalehon men, hekel sulumon fam suwaleg angge winon men, wam domba oruk fam suwaleg angge winon men, wam ahap men, wam ahap fam yihik angge men il piyanuwon ano huluwon ano inam atuk halug lulunggun al het tehen[2] kim hawag ulug imam ubam unug ha laruk lamuhup.

⁴⁸

⁴⁹

⁵⁰Unug ha lahupmu imamen kim hahureg walug waruhu angge arimano wahureg amumu forohoman eneg hup sabirenam aruhu.

⁵¹Hup sabirenam aruhumu imam inowen inggik pireneg angge kim haruk lit il nin atuk ambeg ino su atisi ulug kim hahureg we tem toho lulunggun wereg ulug oluk aruhumu sum men wam ahap men siyag atisi ulug fag toho uhu.

⁵²Fag toho uhumu sum oho wam ahap ino oho indokma yaltuk laruhu.

⁵³Imam inowen kim harukmen sum ano wam ahap ano il nin atuk ambeg ino su am fug angge welatisi hag toho weregma kim hahu halug

⁵⁴imamen uhu ane hikit toho sum oho wam ahap ino oho ik umaho feruk lamuhup. Ik umaho felug hebeloho imam og utuk lamuhupmu at inowen inggik pireneg angge sum oho wam ahap ino oho amumu forohoman eneg hup sabirenam aruhu.

⁵⁵Hup sabirenam aruhumu imam inowen kim harukmen il nin atuk ambeg ino su am fug angge welatisi hag toho weregma kim hahu halug il nin atuk ambeg sum ano wam ahap ano unda fil werehon oho sel fil werehon ino oho we tem toho lulunggun wereg ulug oluk aruhumu indokma yaltihip ulug hiyag isaruk laruhu.

⁵⁶Sum ano wam ahap ano wam ahap fam yihik angge ano ik umaho feruk lamuhubon arimano imam inowen kim haruk lit il nin atisi ambeg ino il we tor atisi ulug kim hahu halug il nin atuk ambeg ino sum oho wam ahap ino oho famen lisoho hik isahu.

⁵⁷Fobik sum ino oho wam ahap ino oho wam ahap fam yihik angge oho il nin atuk ambeg inam aruhu halug siyag atisi ulug abirangge indokma yaltuk lamuhup.

⁵⁸Il nin atuk ambeg ino ik umaho ferukmu eleg atuk halug siyag angge mondabi eleg amag ulug ininggik pireneg angge ik umaho feruk lamuhup.

⁵⁹Anden imbihi ane ari hikit toho wan turuk asum sulumon men, wam domba oruk fam suwalehon men, hekel sulumon fam suwaleg angge winon men, wam domba oruk fam suwaleg angge winon men, wam ahap fam yihik angge men siyag angge ubam tag teg ano ulug fag toho uruk lamuhuben imbihi,” ulug Allahn Musa men Harun men hiyag isibag.