Read Angguruk Yali IMAMAT 14 Bible Online

IMAMAT 14 - Angguruk Yali bible

IMAMAT 14

²”Ap ahap salukangge rohon hebeloho fano atukon unubam turuk lamuhup ane fahet kong toho emberuk lahiyon tu: Ap ino imamen ap tu siyag angge ubam tag teg latisiyon eleg atisi ulug fag toho uhuwen o sabo wirig ambeg iraham hondoholug lahup.

³Hondoholug lahupmu imam ino o sabo wirig ambeg embeselug ap ino iraham lalug kim hahureg ahap salukangge rohon hebeloho fano atisi ulug oluk aruhumu

⁴ap hiyag isaruk lit, ’Ap ari fano atmisiyen suwe olukon Allah fahet umbuk tehon piren men e sahi palehon men polu men musan inggila men wak lalihip,’ ulug hiyag isahu.

⁵Hiyag isahu angge arimano walug wamuhupmu imamen hiyag isaruk lit, ’Suwe misig ino kubag kinang fam wirihon ik elerukmuwen hinanggoho werehon palimuwen ware felihip,’ ulug hiyag isahu.

⁶Hiyag isahureg e sahi palehon ino men polu men musan inggila men suwe olukon misig ino men oko walug suwe ino amep fam pilabe fuhu.

⁷Pilabe fuhureg mep ino tor angge oko walug inggik sabirenam ap ahap fano atukon ebene hililuhureg ap tu siyag angge ubam tag tehon ino eleg aha ulug fag toho uhu. Ari uhureg suwe olukon ino anggenma lam-lam lawag ulug inggik kobog isahu.

⁸Kobog isahumu ap ahap fano atukon inowen sum wan tehon ik umaho felug oruk obog toho paltuk lit ebe abirangge ik umaho fuhu. Ik umaho fuhureg siyag angge nubam tag teg latisiyon eleg aha ulug o sabo wirig ambeg lahu angge famen ibam kuk fug angge selma weregman eneg hup sabirenam aruhu.

⁹Hup sabirenam aruhumu inggik pireneg angge oruk obog toho paltuk lit panisung oho ilahandin oruk oho paluhureg sum wan tehon men ebe abirangge men ik umaho fuhumu siyag angge ubam tag tehon obog toho eleg aruhu.

¹⁰O likin angge ap inowen wam domba umalik yuhambukon siyag teg elehon piren men, wam domba heyon mo misig famon siyag teg elehon misig men, Allah fahet emberukon roti anggen fano roho lilibug tehon kubag misig e zaitun ahaluwe men mangno roho tag tehon men, e zaitun ahaluwe kubag toron misig men walug waruhu.

¹¹Walug waruhumu imam inowen at ebeyet walug waruhu anggeyet NINIKNI Allah olohotma o sabo fanowon iraham hondoholug lahu.

¹²Hondoholug lahureg ap tuwen Allah indi siyahap tirisireg At og umon og irik waha ulug imam inowen wam domba yuhambukon misig men e zaitun ahaluwe kubag toron ino men oko walug NINIKNI Allah fahet embemin ulug At olohotma leho fuhu.

¹³Leho fuhureg wam domba ino o fanoman ware fuhu. Wam Allah og umon ino aben siyag ane turukon eleg amag ulug walug waharuk ambohom hag toho NINIKNI Allah fahet emberuk angge re mondabi fano wereg. Wam mondabi fanowon imamen naruk lamuhubon ino o yuhunon famen wabuk fug angge wam aben siyag ane turukukon Allahn elehap tukag ulug walug waharukon men, wam Allah fahet waroho yaltul ulug walug waharukon men watuk ambehen wam mondabi fanowon ino oho ware fuhu.

¹⁴Ware fuhureg wam amep tor angge oko walug ap ahap fano atukon isanggo muluk pikit filon men inggik fuwap pikit filon men uyug tum pikit filon fene are rubuhu.

¹⁵Are rebelug e zaitun ahaluwe kubag toron ino tor angge inggik hare filon indanggenma hilili fuhu.

¹⁶Hilili fuhureg inggik tum uhanehon pikit filon fam e zaitun ahaluwe inggik indanggenma werehon tor angge oko walug NINIKNI Allah olohotma inggik sabirenam ketne isahu.

¹⁷Ketne isahureg e zaitun ahaluwe inggik indanggenma werehon tor angge oko walug ap ino ahapma wamep are reg ambeg are rubuhu.

¹⁸Are rubuhureg e zaitun ahaluwe inggik indanggenma umbuhuwon obog toho ap ino unggulmu hilili fuhu. Ari roho imam inowen turuk laruhu ane ari siyag ane ap ino ubam tag teg latisiyon NINIKNI Allahn elehap tukag ulug turuk laruhu.

¹⁹Ari tuhureg imam inowen ap tu siyag angge ubam tag tehon Allahn fanowap tukag ulug wam domba waroho hubu lahabuhureg wam domba misig eke Allah olohotman yaltul ulug ware fuhu.

²⁰Ware fuhureg wam ino men roti anggen walug waruhuwon men hubu lahaptuk ambeg indokma yaluhu. Ari roho imam inowen turuk lit siyag angge ap ino ubam tag tehon elehap turuk laruhumu ap ino hebeloho fano aruhu.

²¹Ap ahap salukangge rohon hebeloho fano atukon ino anggengge we tor angge welaruhu halug Allah indi siyahap tirikikteg nin hebeloho fanowap timin ulug wam domba yuhambukon misig men, Allah olohotma yaltukon roti anggen fano roho lilibug tehon kubag toron misig e zaitun ahaluwe men mangno roho tag tehon men, e zaitun ahaluwe kubag toron misig men walug waruhu.

²²Walug waharuk lit suwe yalma piren ano pel hahon piren ano walug waruhu. Suwe walug waruhuwon misig ino anden siyag ane tirikikon Allahn ambolmayap tukag ulug waroho hubu lahapmin perukon men, misig ino Allah fahet waroho yalmin perukon men walug waruhu.

²³O likin angge walug waruhu angge arimano obog toho Allah olohotma imbik lamin ulug o sabo fanowon sok irahamen imam og irik waruhu.

²⁴Og irik waruhumu imamen wam domba yuhambukon ino men e zaitun ahaluwe kubag toron ino men wahureg NINIKNI Allah fahet embemin ulug At olohotma leho fuhu.

²⁵Leho fuhureg ap tuwen Allah indi siyahap tirisimu nin hebeloho ahiyeg amag ulug wam ino ware fuhu. Ware fuhureg wam amep men e zaitun ahaluwe kubag toron walug waruhuwon ino men wahureg tam ihiyon hikit toho turuk laruhu. Ari tuhureg suwe walug waruhuwon misig ino wahureg ap tuwen siyag ane tirisiyon Allahn elehap tukag ulug waroho hubu lahabuhu. Lahabuhureg suwe pirenehon ino men roti anggen walug waruhuwon men Allah olohotma indokma yaluhu. Ari roho turuk laruhu ane ari imam inowen siyag angge ap ino ubam tag tehon NINIKNI Allahn elehap tukag ulug turuk laruhumu ap ino nin hebeloho fano aruhu.

³²Ari roho turuk laruhu ane ari ap enehap salukangge rohon enenggengge elehon fahet kong toho emberuk lahi,” ibag.

³³NINIKNI Allahn Musa men Harun men nin hiyag isaruk lit,

³⁴”Hit kinang Kanaan Anden og hisahuk ambeg kuhupteg weregman Anden lulunggun monde fik waruhukmu hinibam misig ubahat siyahap tuhu.[3]

³⁵Siyahap tuhu halug o ngi ahun ino imam ambeg lahureg hiyag utuk lit, ’An nibam lulunggunen siyahap turuk,’ ulug hiyag uruhu.

³⁶Hiyag uruhumu imam inowen ap ino hiyag utuk lit, ’An uwan hibam wam fugmu mun angge man angge haren foroho lahen angge obog toho siyag aruhu rohon hibamen wilipmihin,’ ulug hiyag uruhu. Hiyag uruhu ane ari hikit toho tuhumu imam ino waruhureg at ibam kuhu.

³⁷Kuhureg kim harukmen o ubahat lapno reg ambeg il piyanuwon ano huluwon ano weregma kim hahu halug

³⁸o inowen wilip atug sok lare fuhumu sok ino lareg lit weregman eneg hup sabirenam aruhu.

³⁹Hup sabirenam aruhumu imam inowen o ino nin kim hamin ulug waruhureg kim haruk lit o ubahat siyag atuk ambeg ino su regma kim hahu halug

⁴⁰imam inowen uhu ane hikit toho helep ubahat wirihon siyahon arimano heneko walug o pumbuk ilanma siyag angge hik isaruk ambeg hik isa laruk lamuhup.

⁴¹Hik isa lahupteg ubahat obog toho walinggoho seng til larukmu wambuhuwon arimano ho roho o pumbuk ilanma siyag angge hik isaruk ambeg hik isa lahup.

⁴²Hik isa lahupteg helep heneko hik isahubon ubalma helep winon kilabuhup. Kilabuhupteg ubahat fene kinang tag toho hondo ruruk lamuhup.

⁴³Ari tubuhupmu ubahat ino fene nin eke lulunggun eke inam aruhu halug

⁴⁴imam inowen waruhureg kim harukmen lulunggun ino anggolo atuk ulug kim hahureg lulunggun ariyen o tu siyahap tuhu ulug oluk aruhumu o ino siyag angge ubam tag teg laruhu.

⁴⁵Siyag angge ubam tag tehen o helebet e palehet ubahat fam kinang tag toho hondo rehonet halog tubuhupteg o pumbuk ilanma siyag angge hik isaruk ambeg hik isa lahup.

⁴⁶O ino uwan halog tuk fugmu imamen sok lare fuhu angge famen ap san sok husoho kuhu halug siyag angge ubam tag tegman eneg o hup aruhu.

⁴⁷Ap sa o ino sok laregman husoho kuhureg suburu nahu ano nohoku ano halug siyag angge ubam tag tehen sum wan tehon ik umaho fuhu.

⁴⁸O eke fam lulunggun inam aruhumu nin hebeloho fanowap turuk lit ubahat fene kinang tag toho hondo ruruk lamuhupmu imam ino fobik waharuk lit kim harukmen lulunggun eleg laruhu halug o ino fano atisi ulug oluk aruhumu siyag angge ubam tag teg eleg ulug fag toho uhu.

⁴⁹Ari uhureg o tu mondabi fanowap timin ulug suwe piren men e sahi palehon men polu men musan inggila men wahureg

⁵⁰suwe misig ino kubag kinang fam wirihon ik elerukmuwen hinanggoho werehon palimuwen ware fuhu.

⁵¹Ware fuhureg e sahi palehon ino men polu men musan inggila men suwe olukon misig ino men oko walug suwe ino amep fam pilabe fuhu. Pilabe fuhureg mep ino tor angge oko walug inggik sabirenam o ino fene hililoho hik isahu.

⁵²Hililoho hik isahureg suwe olukon ino anggenma lam-lam lawag ulug inggik kobog isahu. Ari roho turuk laruhu ane ariyen siyag angge o ino ubam tag tehon ino elehap tuhumu nin hebeloho fano aruhu.

⁵³

⁵⁴Anden imbihi ane ari ap ahap salukangge rohon men, yaliahun tohon men, ahap firig ambeg men, ahamut waruk ambeg men, ahap yanggo reg ambeg men, sum filik teg ambeg men, o filik turukon men fahet imam arimanowen ap hiyag isaruk lit siyag angge ubam tag teg ano eleg ano ulug fag toho hiyag isaruk lamuhuben imbihi,” ulug Allahn Musa men Harun men hiyag isibag.