Read Angguruk Yali IMAMAT 15 Bible Online

IMAMAT 15 - Angguruk Yali bible

IMAMAT 15

¹NINIKNI Allahn Musa men Harun men unubam ele uruk lit,

²”Hiren Israel inap hiyag isahubon fahet iminon tu: Ap ayeman mulen wiliptuk halug siyag angge ubam tag teg laruhu.

³Mulen ino ik hag toho wiliptuk halug oho arik tehen folo wilip am fug angge wereg halug oho siyag angge ubam tag teg laruhu.

⁴Ap ino nohoruk ambeg oho hur atuk ambeg oho siyag angge ubam tag teg laruhu.

⁵Ap san ap ino nohoruk ambeg tung haruk halug at ebe men sum wan tehon men ik umaruhu angge famen siyag angge ubam weregman eneg o hup aruhu.

⁶Ap sa ap ino hur atuk ambeg hur aruhu halug at ebe men sum wan tehon men ik umaruhu angge famen siyag angge ubam tag tegman eneg o hup aruhu.

⁷Ap ayeman mulen wiliptukon ino tung haruk inap men, ap inowen wasubag sup isarukon men, ap ino heriyeg ambeg tung harukon men seneko walug larukon men, ap inowen inggik ik umabuk fug angge sen isaruk inap menen enebe men sum wan tehon men ik umabuhup angge famen siyag angge unubam tag tegman eneg o hup aruhu. Ap ino wam kuda fam lahalug laruk lit olombik iyangge tuwalehon fam hur atuk ambeg oho siyag angge ubam tag teg laruhu.

¹²Kubag kinang fam wirihon ap inowen tung harukon arap toho hik isahup.

¹³Ap ayeman mulen wiliptukon ino fano aruhu halug ebe fano weregman eneg hup sabirenam aruhumu sum wan tehon ik umaho felug ebe oho ik elerukmuwen ik umaho fuhu. Ik umatukmu siyag angge ubam tag tehon ino eleg aruhu.

¹⁴O likin angge ap inowen suwe yalma piren ano pel hahon piren ano wahureg NINIKNI Allah fahet embemin ulug o sabo fanowon sokolman imam og irik waruhu.

¹⁵Og irik waruhumu imam inowen ap tuwen siyag ane tirisiyon Allahn ambolmayap tukag ulug suwe misig waroho hubu lahaptuk lit misig ino Allah fahet waroho yaluhu. Ari roho turuk laruhu ane ari imam inowen ap tu siyag angge ubam tag tehon NINIKNI Allahn elehap tukag ulug turuk laruhu.

¹⁶Ap eke nohorukmen ayenggol wilip atuk halug ebe abirangge ik umaruhu angge famen siyag angge ubam tag tegman eneg o hup aruhu.

¹⁷At ayenggol ino sum men wam ahap fam yihik angge men fene wamburuk halug ik umaruhu angge famen sum ino men wam ahap fam yihik angge men siyag angge ubam tag tegman o hup aruhu.

¹⁸Ap eke hiyap men nohorukmen ayenggol wilip atuk halug it pirenet enebe ik umabuhup angge famen siyag angge unubam tag tegman eneg o hup aruhu.

¹⁹Hiyap ekeyen pikalem sap turuk lit mep wiliptuk halug siyag angge ubam tag tegman eneg hup sabirenam aruhu. Ap san hiyap ino tung haruk halug siyag angge ubam tag tegman eneg o hup aruhu.

²⁰Hiyap ino hur atuk ambeg men ying atuk ambeg men siyag angge ubam tag teg laruhu.

²¹Ap san hiyap ino nohoruk ambeg tung haruk halug at ebeyet sum wan tehonet ik umaruhu angge famen siyag angge ubam weregman eneg o hup aruhu.

²²Ap sa hiyap ino hur atuk ambeg tung haruk halug at ebe men sum wan tehon men ik umaruhu angge famen siyag angge ubam tag tegman eneg o hup aruhu.

²³Ap san hiyap ino nohoruk ambeg ano hur atuk ambeg ano nungge-nungge emberuk angge tung haruk halug siyag angge ubam tag tegman o hup aruhu.

²⁴Ap sa hiyap mep wiliptukon men nohoruk halug ar oho siyag angge ubam tag tegman eneg hup sabirenam aruhu. Ap ino nohoruk ambeg oho siyag angge ubam tag teg laruhu.

²⁵Hiyap ekeyen mep hup anggoloenam wiliptuk halug oho pikalem sap turuk eleg li mep hup-hup angge wiliptuk halug oho pikalem sap turuk li siyag angge ubam tag teg hag toho welaruhu.

²⁶Hiyap ino nohoruk ambeg men hur atuk ambeg men siyag angge ubam tag teg laruhu.

²⁷Ap san hiyap ino nohoruk ambeg men hur atuk ambeg men tung haruk halug siyag angge ubam tag teg laruhu. Ap inowen ebeyet sum wan tehonet ik umaruhu angge famen siyag angge ubam tag tegman eneg o hup aruhu.

²⁸Mep ino eleg aruhu halug hiyap ino weregman eneg hup sabirenam aruhumu siyag angge ubam tag tehon eleg aruhu.

²⁹O likin angge hiyap inowen suwe yalma piren ano pel hahon piren ano wahureg o sabo fanowon sokolman imam og irik waruhu.

³⁰Og irik waruhumu imam inowen hiyap tuwen siyag ane tirisiyon Allahn ambolmayap tukag ulug suwe misig ino waroho hubu lahaptuk lit misig ino Allah fahet waroho yaluhu. Ari roho turuk laruhu ane ari imam inowen hiyap tu siyag angge ubam tag tehon NINIKNI Allahn elehap tukag ulug turuk laruhu.

³¹Israel inap arimano siyag angge unubam tag tegman An nibam o sabo fanowon hit sehelimu wirihon ino horogma laruk lit siyahap turukmu war amuhup tohon ulug Anden hiyag hisihiyon hikit toho turuk lamuhuben Israel inap milal eneptuk lamuhup.

³²Anden imbihi ane ari ap ayeman mulen wiliptukon men, ap nohorukmen ayenggol wilip atukon men,

³³hiyap pikalem sap turuk lit mep wiliptukon men, ap hiyap ahaluwe eke hag eke hag wiliptukon men, ap hiyap pikalem sap turukon men nohorukon siyag angge unubam tag teg ane fahet kong toho imbihi,” ibag.