Read Angguruk Yali IMAMAT 16 Bible Online

IMAMAT 16 - Angguruk Yali bible

IMAMAT 16

¹Harun umalikisi piren itanowen Allah ele sobir isaruk lit iraham larukmen war atfagma NINIKNI Allahn Musa fam ele uruk lit,

²”An e seng toho wirihon peti Wene Numen haharehon undama kilabeg angge ele latukon ino palimu hina fam wambik waharukmu howe Harun ino An yet niyalug war aruhu rohon An Allah inam atuk ambeg unuk ”Mondabi Fanoma” suwalehon fam sum tuhuloho pilabehon pisan toho saplangge kuk fug ulug hiyag itmihin.

³An nambeg sum ino pisan toho undama fil kik oho lit siyag ane an nubam werehon ino eleg amag ulug wam sapi kabiniyon misig waroho yale felug Allah fahet embemin ulug wam domba abon eke yaltug eneg kuruk laruhu.

⁴Mondabi Fanoma kik oho lit Harun ahap ik fano roho umatug sum imamen wan turukon ebemonet uyugmonet hekel fam yihikon wan tebelug pahaluk alunggu ke pug tebelug sum unggulmu sambun teberuk laruhu.

⁵Ari roho wan turuk laruhumu Israel inaben siyag ane nit nunubam werehon elehap timisiyon ulug wam kambing abon piren men An Allah nubahet emberukon wam domba abon misig men og irik waharuk lamuhup.

⁶Harun inggareg uhe malik men nunubam siyag ane werehon eleg amag ulug wam sapi kabiniyon ino emberuk laruhu.

⁷Wam kambing piren Israel inaben og irik wamuhubon itano An Allah men Ambi Atuk Ibam sok iraham imbik laruk laruhu.

⁸Imbik lalug wam misig An HINIKNI Allah fahet, misig mungguwat Azazel[4] fahet ulug enehangge piren wam fam hik isaruk laruhu.

⁹Hik isahumu wam kambing enehangge An Allah faheron ubam aruhuwon ino siyag ane Israel inap unubam werehon elehap timisi ulug An nubahet yaltuk laruhu.

¹⁰Wam kambing enehangge Azazel faheron ubam aruhuwon ino An HINIKNI nolohotma oluk angge imbik watlug siyag ane Israel inap unubam werehon eleg amag ulug lekma Azazel wereg ambeg yanggaloho imbisik laruk lamuhup.

¹¹Harun inowen wam sapi kabiniyon ino an nuhe malik men nunubam siyag ane werehon elehap timisi ulug ware felug

¹²hubu lahaptuk ambeg palimu indok anggen kubag fam kilaboho werehon walug amben fano angge inggik pirenam kubag ino fam kilabe felug olma walug kuruk lit sum po rehon pisan toho laruk laruhu.

¹³Lalug e seng toho wirihon peti ele latukon ino yet halug war aruhu rohon amben fano angge ino e seng toho wirihon olohotma yale fuhumu hubuwen e ino hililip tuhu.

¹⁴Hubuwen hililip turukmu Harunen wam sapi amep inggik tum fam tot oko walug e seng toho wirihon ele latukon umbangguwag fene hik isalug e ino olohotma pila ke inggik sabirenam hik isaruk laruhu.

¹⁵Ari tebelug Harunen siyag ane Israel inap unubam werehon elehap timisi ulug wam kambing ino ware felug amep walug e seng toho wirihon peti wereg ambeg kuhureg sapi amep hik isahu hag toho kambing amep oho hik isaruk laruhu.

¹⁶An men Ambi Atuk Ambeg Israel inap enesehelimu weregma iren An nele sobir isaruk lit siyag ane eneg turukon ariyen o ino siyag atuken o inowet peti ino wereg ambehet Harunen mep ari fam fanowap turuk laruhu.

¹⁷Siyag ane Harun uhe malik men Israel inap obog toho unubam werehon fahet Harun peti ino wereg ambeg kuhureg uwan wilip am fugmu ap misig oho o ino welamuhup fug. Aben yet ha fugmu siyag ane it unubam werehon mep fam elehap tuhureg

¹⁸wilip atug hubu lahaptuk ambeg sokma werehon ino fanowap timin ulug iraham laruk laruhu. Iraham lalug wam sapi men kambing men enemep tot oko walug hubu lahaptuk ambeg ambiyang fima-fima werehon are rebelug

¹⁹nin inggik tumen mep oko hubu lahaptukon pali ke sabirenam hik isaruk laruhu. Israel inaben Allahn peruk eleg ane turukon ariyen hubu lahaptuk ambeg siyag atuken Harunen wam mep fam fanowap turuk laruhu,” ulug Allahn Musa ino hiyag itfag.

²⁰Allahn Musa fam ele uruk lit, ”Harun inowen An men Ambi Atuk Ibam men e seng toho wirihon peti wereg ambehet hubu lahaptuk ambeg sokma werehonet wam amep fam fanowap tuhureg wam kambing olukon ino walug watlihip ulug hiyag isaruk laruhu.

²¹Walug wamuhupmu Harun inggik pirenet wam kambing ino unggulmu embelug Israel inaben An nele pisan isalug siyag-siyag ane turukon fag turuk lit siyag ane arimano obog toho wam ino unggulmu emberuk laruhumu wam ino yanggaloho imbisik lamihin uhubon inowen lekma lawag ulug siloho imbisik laruk laruhu.

²²Larukmu kambing inowen Israel inaben siyag-siyag ane turukon obog toho ap eleg ambeg lekma walug laruk laruhu.

²³Walug larukmu Harun ino An men Ambi Atuk Ambeg kuhureg sum imamen tohon tam Mondabi Fanoma kik oho lit wan turuk laruhuwon ino nonggoloho embelug wilip atuk laruhu.

²⁴Wilip atlug Harun ino imamen enehap umatuk ahik fam ahap umatlug sum inggarehen tohon wan taruk laruhu. Wan talug siyag ane at men Israel inap obog toho unubam werehon eleg amag ulug wam eke waroho An nubahet yaltuk lit

²⁵wam sei amu hubu lahaptuk ambeg palimu yaltuk laruhu.

²⁶Ap wam kambing ino Azazel wereg ambeg lekma siloho imbisik lahu ahun inowen oho suhuloho kuk fug angge ahap men asum men ik umatlug eneg laruk laruhu.

²⁷Wam sapi abon men kambing men siyag ane elehap timisi ulug waroho enemep olma walug e seng toho wirihon peti wereg ambeg kuruk laruhuwon itano enebe Israel inap wereg ambehen walug wilip atlug ahabet unuwet alet obog toho ap ekeyen yale feseruk laruhu.

²⁸Yale feselug ap ino suhuloho kuk fug angge ahap men asum men ik umatlug eneg laruk laruhu,” ibag.

²⁹Allahn Musa fam nin ele uruk lit, ”Anden nele emberuk lahiyon aru hiren senegman eneg welamuhup. Siyag ane Israel inap unubam werehon eleg amag ulug mo ilig am wirig am turukmu pikalem sabiron fam hup numen atukmu wam amep fam fanowap turuk lamuhup. Fanowap turuk lamuhup sambil ino Israel inap men ap pohon men suburu na fug angge, o yabuk wibuk fug angge welamuhuben usayap tuhup.

³²Harun amloho eke ikni ubalmangge An namingmingangge imam suwon welaruhuwen unduhuk fuhubon inowen eneg Israel inap siyag ane unubam werehon wam amep fam fanowap turuk laruhu. Sum imamen tohon wan teg lit

³³An men Ambi Atuk Ibam men e seng toho wirihon peti wereg ambehet hubu lahaptuk ambehet imam arimanowet Israel inap obog toho mep fam fanowap eneptuk laruhu.

³⁴Mo misig fam misihim Anden ihi ane hikit toho turukmen eneg welamuhup,” ulug NINIKNI Allahn Musa hiyag itfag ane hikit toho turuk latfag.