Read Angguruk Yali IMAMAT 17 Bible Online

IMAMAT 17 - Angguruk Yali bible

IMAMAT 17

¹NINIKNI Allahn Musa fam ele uruk lit,

²”Haren Harun umalikisi men Israel inap obog toho men hiyag isahunon tu: NINIKNI Allah umalikisiyen tuk teg ane fahet kong toho emberisi ane iminon tu holiyek!

³Israel ahun ekeyen wam sapi ano domba kambing ano ware femin peruk halug o sabo ambolman ano anggenman ano watuk lamuhup fug.

⁴Wam ino NINIKNI Allah fahet embemin ulug o sabo fanowon alukema walug lahureg sokolman waruhu. O ino sokolman waruhu fug halug ap ware feseruk hag toho tehek ulug ap ino Israel hinap sehelimuwen elehap tuhup.

⁵Israel inaben wam anggenman watuk latusa angge famen ketiya wam arimano NINIKNI Allah olohotman nul ulug o sabo fanowon sokolma imam ambeg walug wamuhupteg watuk lamuhup.

⁶Wabuhupmu imam inowen wam amep ino hubu lahaptuk ambeg o sabo fanowon alukema werehon fam hililoho hik isahureg wam sei NINIKNI Allahn amben fano pukag ulug indokma yaluhu.

⁷Hiren hiyap yaying turukonen turuk hag toho turuk lit Allah embeselug mungguwat wereg ulug henekol toho wenggel haruk lahebon unubahet wam watuk lamuhup fug. NINIKNI Allahn kong toho emberisiyon ari hiren endebuhubonen endebuhubon arimanowen oho mondabi senegman eneg welamuhup.

⁸Ari fahet haren hiyag isahunon tu: Israel hinap obog toho men ap pohon hit sehelimu werehon menen NINIKNI Allah fahet wam waroho yaltul peruk lamuhup halug oho Allah olohotman wam waroho nul peruk lamuhup halug oho o sabo fanowon sokolman eneg watuk lamuhup. Ap san wam arimano o sabo fanowon sokolma walug waruhu fug halug ori sehelimuwen elehap tuhup,” ibag.

¹⁰ NINIKNI Allahn Musa fam ele uruk lit, ”Israel inap sehelimuwon ekeyen ano ap pohon it sehelimu werehon ekeyen ano wam amep naruk halug An norohole olok toho yet hahukteg ap ino ori sehelimuwen elehap tuhuk.

¹¹Mep fam himengge werehen mep fam eneg siyag ane aben turukon elehap turuk. Ari fahet mep fam siyag ane hunubam werehon elehap turuk lamuhuben mep obog toho An nubahet hubu lahaptuk ambeg walug waharuk lamuhup ulug emberikik.

¹²Ari fahet Anden hit Israel hinap hiyag hisaruk lit, ’Hit sehelimuwon misihen oho ap pohon hit sehelimu werehonen oho mep nahup fug,’ ulug hiyag hisarikik.

¹³Hit Israel hinap men ap pohon menen lebe ruruk angge na hahon wam eli ano pak ano suwe ano warik lahup halug wam pak suwe wabuhubon amep obog toho wilip aruhumu kinangma sale fuhup.

¹⁴Lebe ruruk angge obog toho amep ino himengge werehen Anden mep nahup fug ulug hiyag hisarikik. Ap san mep nahu halug war aruhu.

¹⁵Israel ahun ekeyen ano ap pohon ekeyen ano wam pak suwe wareg angge ano olomeneyen watukon ano nahu halug ebeyet sum wan tehonet ik umaruhu angge famen siyag angge ubam tag tegman eneg o hup aruhu.

¹⁶Ebe men sum wan tehon men ik umaruhu fug halug alem siyahon ubam tag tegman eneg welaruhu,” ibag.