Read Angguruk Yali IMAMAT 18 Bible Online

IMAMAT 18 - Angguruk Yali bible

IMAMAT 18

¹NINIKNI Allahn Musa fam ele uruk lit,

²”Israel inap hiyag isahunon fahet iminon tu: Hit HINIKNI Allah An tu welahi.

³Mesir kinangma welatikip ambehen yug inap arimanowen turuk ane hikit toho hiren turuk lamuhup fug. Kanaan kinang Anden hit hondog heneplug lahuk ambehen yug inap arimanowen oho turuk ane hikit toho hiren turuk lamuhup fug.

⁴An hit HINIKNI Allah welahireg Anden tu men ari men turuk lamuhup ulug hiyag hisarikik ane hikit toho turuk lamuhup.

⁵Ap san Anden komo heneptikik ane ari seneg laruhu halug ebe fano oluk welaruhu. An HINIKNI Allahn nele tu uruk lahi.

⁶Hit sehelimuwon misig oho erek men ambi amuhup fug. An HINIKNI Allahn nele tu uruk lahi.

⁷Hat hisinga men ambi atuk lit hikni siyahap tuhun fug. Nisinga wereg ulug haren sen ha fug.

⁸Hat hikni uhe eke men ambi atuk lit hikni siyahap tuk fug.

⁹Hat herek hikniyen indag tarukon men hisingan indag tarukon men hat hibam wereg halug oho ap winon ibam wereg halug oho it men ambi am fug.

¹⁰Hat hinggareg siyahap tahun tohon ulug hilani malik hat hamlohowen indag tarukon men hat hahalohowen indag tarukon men ambi am fug.

¹¹Hat hikni uhe ekeyen indag utukon men ambi amuhup fug. An nerek wereg ulug haren sen ha fug.

¹²Hat hikni uwan men ambi amuhup fug. An nikni amep minggirig ulug haren sen ha fug.

¹³Humum men ambi amuhup fug. An nisinga amep minggirig ulug haren sen ha fug.

¹⁴Hat hikni are uhe men ambi amuhup fug. An nisinga wereg ulug sen ha fug.

¹⁵Hat hiyamalhe men ambi amuhup fug. An namlohowen tohon wereg ulug sen ha fug.

¹⁶Hat hare uhe men ambi atuk lit hare siyahap tuk fug.

¹⁷Hiyap hat men ambi atukon ahaloho men umbusag men ambi am fug. Hiyap an men ambi atukon amep minggirig ulug amben siyahon ari tuk fug.

¹⁸Hat huhe oluk weregma at ehe men ambi amuhup fug. Nuheyen ehe fahet nandelahe uhu rohon ulug at ehe sen ha fug.

¹⁹Hiyap pikalem sap turukmu siyag angge ubam tag tehen at men ambi am fug.

²⁰Siyag angge an nubam tag aruhu rohon ulug hare uhe men ambi am fug.

²¹An HINIKNI Allah nunuk siyahap tuhuk tohon ulug aben tu Allah hag toho wereg perukon Molokh fahet humalik eke indokma yaluhun fug. An HIKNI Allahn nele tu uruk lahi.

²²Hiyap men ambi atuk hag toho ap angge men ambi atuk lit amben siyahon tuk fug.

²³Siyag angge unubam tag aruhu rohon ulug ap men hiyap menen wam yarohuk fug. Me nenepeyen ulug ari tuhup fug.

²⁴Anden tuk fug ihiyon ari ap o pumbuk obog toho Anden hit honolohotman yanggal enebuhukon arimanowen turuk. Hir oho siyag angge hunubam aruhu rohon ari hag toho turuk lamuhup fug.

²⁵Ap o pumbuk arimanowen turuk ane ariyen enengginang siyahap turusama aben me wituk hag toho ap arimano enengginangman wilip atuk. Ari fahet iren amben siyahon turuk hag toho hit men ap pohon hit sehelimu werehon menen oho turuk lamuhup fug. Anden tu men ari men turuk lamuhup ulug emberikikon ino seneg lit Anden komo heneptikikon hikit toho turuk lamuhup.

²⁸Aben me wituk hag toho ap o pumbuk arimano enengginangman wilip atuk hag toho hiren oho fobik kinang ari siyaha feselug wilip amuhup tohon!

²⁹Ap san amben siyahon Anden ihiyon ari turuk halug ori sehelimuwen elehap tuhup.

³⁰Kinang ino hit ngi am fugmu seneg inaben enesupmu roho amben siyahon turuk ane hiren turuk lit siyahap ta fug angge An nolohotman tuk teg ane eneg turuk lamuhup. An hit HINIKNI Allahn nele tu uruk lahi,” ibag.