Read Angguruk Yali IMAMAT 19 Bible Online

IMAMAT 19 - Angguruk Yali bible

IMAMAT 19

¹NINIKNI Allahn Musa fam ele uruk lit,

²”Israel inap hiyag isahunon tu, ’An HINIKNI Allah fano welahireg hit An numalikisi oho fano welamuhup.

³Hit obog tohowen hiniknisi hinisingasi enele holtuk lamuhup, o sabir angge An wenggel niyaruk lit kel taruk lamuhup. An HINIKNI Allahn nele tu uruk lahi.

⁴Ap winonen nunumba ulug wel eneptukon arimano hiren wel eneptuk lamuhup fug. Besi ineyon fam wiri felug tu Allah hag toho wereg ulug wirim turuk lamuhup fug. An HINIKNI Allahn nele tu uruk lahi.

⁵Hiren An nolohotma wam esetuk lamuhup halug Anden fano puhuken hiyag hisarikik ane hikit toho esetuk lamuhup.

⁶Wam esebuhubon ino wabuhup sambil ino ano likiyamon ano naruk lamuhup. O hinahaneg angge nin tot wereg halug indokma yale feseruk lamuhup.

⁷O hinahaneg angge naruk lamuhup halug tam esebuhubon ino fahet nirim puhuk.

⁸Ap san o hinahaneg angge naruk laruhu halug An fahet emberukon saliyohap tuhuwon fahet alem ubam aruhu. Ap ino An numalikisi enesehelimu welaruhu fug.

⁹Hiren roti anggen paltuk lit hiniyabuk ilan ke werehon arimano paltuk lamuhup fug. Roti anggen paluhup ambeg nin fobik hebeloho ondolik laruk lamuhup fug.

¹⁰Anggur anggen tahantuk lit yabukmu umbusuhubon fobik tahamin ulug suhuloho laruk lamuhup fug. Anggur anggen tahanoho wamburukon arimano ondoltuk lamuhup fug. Ap enengge elehon men pohon men fahet embeseruk lamuhup. An HINIKNI Allahn nele tu uruk lahi.

¹¹Aben tohon hirag taruk lamuhup fug! Henele si ane uruk lit ap enele ying eneptuk lamuhup fug!

¹²An nunuk siyahap naptuk lamuhup tohon Allah unuk fam sali emberuk lahi ulug henele si ane uruk lamuhup fug. An HINIKNI Allahn nele tu uruk lahi.

¹³Hiren honori fam iren tohon og numag ulug honolok ane turuk lamuhup fug. Enenggengge yoholiyangge hilahup fug. Ap ekeyen yabuk wit hisaruk halug onggo sono og uruhuk puk fug angge we ino sambil og utuk lamuhup.

¹⁴Ap inisanggo larehon huluwap enebuk fug angge inil hupnihon fuk toho wabukag ulug kalemma e yinggi feruk lamuhup fug. HINIKNI Allah An namu welahireg An fahet henekol toho welamuhup.

¹⁵Alem kong turuk lit fano roho haltuk lamuhup. Ap tu anggengge elehon, tu anggengge werehon ulug ap misig oho inibil am fug angge alem unubam wereg ane hikit toho kong turuk lamuhup.

¹⁶Honori enebug il o eke la eke la turuk lamuhup fug! Alem kong turuk ambehen honori fahet war amag ulug henele ine roho uruk lamuhup fug. An HINIKNI Allahn nele tu uruk lahi.

¹⁷Honori men hili roho wereg lit ninirim peruk ane hunundama forohoman eneg alem siyahon hunubam aruhu rohon hunubam wereg ane haltuk lamuhup.

¹⁸Honoriyen siyag ane hunubam turukon fahet anggolo wenggeltuk lit niren oho hebeloho siyag ane unubam tul peruk lamuhup fug! Hininggareg hinindi reg lahep hag toho honori winon oho hinindi enesug lamuhup ulug An HINIKNI Allahn uruk lahi.

¹⁹An nele uruk lahiyon hinine roho seneg lamuhup! Hit henembohom arimano lebe ruruk angge winon wam men ambi reg elehon fam uwali lahaptuk lamuhup fug. Wen misig fam suburu ei men hom ei men sebe roho yatuk lamuhup fug. Hekel moholop men yanggik men mangno roho sum misig uruk lamuhup fug.

²⁰Ap ekeyen are fam an namingmingangge huhe tamon men telahe roho hilahunen og huruhuk ulug sali umbuhu angge famen areyen onggo uwan paluk fugmu ikni ino amingmingangge men nohoruk halug it pirenet alem unubam emberuk lamuhup angge famen hiyap ino amingmingangge wereg ulug pinggi wabuhup fug.

²¹Ap inowen An nele pisan isalug siyag ane tuhuwon fahet wam domba abon misig An men Ambi Atuk Ibam sokolma imbik waharuk laruhu.

²²Siyag ane tuhuwon ino eleg amag ulug wam domba ino Allah fahet hubu lahaptuk ahun imam inowen waroho yaltuk laruhumu Anden siyag ane ino nambolmayap turuk laruhuk.

²³Hit o Kanaan kuhupteg e anggen narukon yabuhupmu Allahn it nahup fug peruk ulug anggen na fug angge weregman eneg mo ilig am wirig am turukmen hinahan aruhu.

²⁴Mo uhanehon fam e anggen obog toho NINIKNIYEN og nisarisiyon ulug An nubahet emberuk lamuhup.

²⁵Mo fuwabon fam eneg e anggen naruk lamuhup. Anden hiyag hisaruk lahiyon hikit toho turuk lamuhup halug e anggen anggolo uruk laruhu ulug An HINIKNI Allahn nele tu uruk lahi.

²⁶Wam mebet angge naruk lamuhup fug. Pamongge unusuk fug angge wereg lit fulu ane turuk lamuhup fug!

²⁷Ap war atukon fahet enehangge honoruk men panisung men kong tuk fug angge henehap ke fili fam kiriring tuk fug angge hinisanggo paltuk lamuhup fug ulug An HINIKNI Allahn nele uruk lahi.

²⁹Ap winonen Allah hag toho wereg ulug wel eneptuk angge foroho ibam hit heneholani yaying turuk lamag ulug imbisik laruk lit siyahap eneptuk lamuhup fug![5] Ari turuk lamuhubon ariyen hiyap obog tohowen Allah hag toho wereg perukon onolohotman yaying turukmen eneg henengginang ari siyahonen keleg uhu rohon.

³⁰O sabir angge An wenggel niyaruk lit kel taruk lamuhup! An wel naptuk ambeg fano roho foroho lamuhup ulug An HINIKNIYEN uruk lahi.

³¹Nit welamuhuk ane hiyag nisawag ulug ap warehon enehime wol eneptuk inap wereg ambeg laruk lamuhup fug! Hiren ari roho turuk lamuhup halug An men ambiyeg welamuhup fug ulug An HINIKNI Allahn uruk lahi.

³²Ap sabalon palimu weregma nit enepma welahe ulug let eneptuk lit An nubahet henekol toho welamuhup ulug HINIKNI Allahn uruk lahi.

³³Ap pohon henengginang fam werehon unubam siyag ane turuk lamuhup fug.

³⁴Honori unubam fano ane turuk lahep hag toho ap pohon unubam oho turuk lit hininggareg hinindi reg lahep hag toho ir oho hinindi enesug lamuhup. Hit o Mesir wereg lit ap pohon hag toho welatikip ane fahet wenggel haruk lamuhup ulug An HINIKNIYEN hunubam uruk lahi.

³⁵Suburu we tor angge sum fam fani rurukmu anggin eleg angge famen anggin ulug henele si ane uruk lamuhup fug! Wam tot teg angge famen hele alunggu ke wirim tulug henele si su reg uruk lamuhup fug!

³⁶Wirimangge hele men anggin fam emberuk angge men kubag men fam wirim atukon hikit toho eneg hiyag isaruk lamuhup. An HINIKNI Allah hit o Mesiren og heneplug wilip atikikon inowen nele tu uruk lahi.

³⁷Ari roho turuk lamuhup ulug hiyag hisaruk lahi ane hinine roho seneg lamuhup. An HINIKNI Allah welahiyonen nele aru ihi,” ibag.