Read Angguruk Yali IMAMAT 20 Bible Online

IMAMAT 20 - Angguruk Yali bible

IMAMAT 20

¹NINIKNI Allahn Musa fam ele uruk lit,

²”Israel inap hiyag isahunon tu: Israel hinap sehelimuwon ekeyen ano ap pohon hit sehelimu werehon misihen ano aben tu Allah hag toho wereg perukon Molokh fahet umalik eke indokma yaluhu halug ar oho war amag ulug helep fam ware fusuhup.

³Ap inowen umalik Molokh fahet emberuk ane ariyen An nunuk fanowon apmayap naptuk lit An wel naptuk ibam oho siyahap turuk ulug An norohole olok toho ap ino kim hahukteg ori sehelimuwen elehap tuhuk.

⁴Ap inowen umalik eke Molokh fahet emberukmu Israel inaben yet hahup angge famen inil embeseruk lit ap ino ware fusuhup fug halug

⁵An norohole olok toho at men ori men yet isahukteg aret at ombolim laruk lit Molokh men yaying turukonet onori sehelimuwen elehap enebuhuk.

⁶Ap warehon enehime wol eneptuk inap men fulu roho hiyag isaruk inap men enembeg laruk lit it men yaying turukon arimano An norohole olok toho yet isahukteg onori sehelimuwen elehap enebuhuk.

⁷Hit HINIKNI Allah An tu welahireg siyag angge hit hunubam tag tehon puhunap turuk lit hunubabut fano welamuhup.

⁸An HINIKNI Allahn hit An nanggengge welamuhup ulug mumal heneptikikmu hit An numalikisiyen tuk teg ane fahet hiyag hisarikikon hikit toho turuk lamuhup.

⁹Ikni isinga huluwap eneptuk ahun ino war aruhu. Ikni isinga huluwap eneptuk lit alem angginon ubamap tarisi ulug ware fusuhup.

¹⁰Ap ekeyen are uhe yarog taruk halug ap ino men hiyap ino men mangno roho unusuhup.

¹¹Ap misihen ikni uhe eke men ambi atuk lit ikni apmayap turuk halug alem siyahon unubamap tarusa ulug enebe pirenet unusuhup.

¹²Ap eke iyamalhe men ambi atuk halug amben siyahon turuk lit alem angginon unubamap tarusa ulug it pirenet unusuhup.

¹³Ap ekeyen hiyap men ambi atuk hag toho are ap angge men ambi atuk halug amben siyahon turuk lit alem angginon unubamap tarusa ulug it pirenet unusuhup.

¹⁴Ap ekeyen hiyap men isinga men og enesug halug mondabi siyag ane turuson ari nit sehelimuwen eleg amag ulug ap inowet hiyap piren itanowet indokma yal enebuhup.

¹⁵Ap wam men ambi atukon ware feseruk lit wam ino oho ware fesehup.

¹⁶Hiyap wam men ambi atukon inggarehen siyahap tarisi ulug ware feseruk lit wam ino oho ware fesehup.

¹⁷Ap eke erek ikniyen indag tarukon men isingan indag tarukon men ambi atuk halug ininggali ane turuk lit alem angginon unubamap tarusa ulug abet hiyabet onori enelukeman unusuhup.

¹⁸Ap ekeyen hiyap pikalem sap turukon men ambi atmin ulug turukmu hiyap inowen nirim puk fug angge at men ambi atuk halug it piren itano onori sehelimuwen elehap enebuhup.

¹⁹Hat humum men hikni uwan men ambi am fug. It enemep minggirig lit ambi atuk ane ariyen alem angginon unubamap taruk.

²⁰Ap eke ikni are uhe men ambi atuk lit ikni are siyahap turuk halug alem angginon unubamap tarukon ariyen malik indag ta fug angge weregman eneg war amuhup.

²¹Ap ekeyen are uhe yarohoruk lit are apmayap turuk halug amben siyahon turukon ariyen malik indag ta fug angge welamuhup.

²²Anden ari-ari turuk lamuhup ulug hiyag hisarikik ane hinine roho seneg lit Anden komo heneptikikon hikit toho turuk lamuhup halug eneg hit kinang Anden hondog heneplug lahuk ambehen yanggal henebuhup fugmu amusun toho welamuhup.

²³Ap o pumbuk Anden hit honolohotman yanggal enebuhukon arimanowen siyag-siyag ane arimano obog toho turukmu Anden yet isalug me nape naptuk. Ari fahet iren enesupmu roho turukon hikit toho hiren oho turuk lamuhup fug.

²⁴Ap arimano enengginang ag owe men kin ahaluwe men eleg am fug angge mondabi anggolo wereg ambeg Anden og hisahuk ulug sali emberikik ane hikit toho hit ngi arik kuhup. An HINIKNI Allah ap o pumbuk obog toho sehelimuwen hit henemu eneg mumal heneptikikon inowen nele tu uruk lahi.

²⁵Ari fahet nit Allahn mumal neneptisiyon ulug Allahn peruk ane roho wam na hahon tu, na fug tehon tu, suwe na hahon tu, na fug tehon tu ulug honoluk aruhu. Wam, suwe, lebe ruruk angge enehum sap fam larukon men An nubahet umbuk fug teg angge arimano saliyog nahup fug ulug hiyag hisarikikon hiren naruk lit siyahap tahup tohon!

²⁶An HINIKNI Allah fano welahi hag toho hit An numalikisi oho fano welamuhup. Ap o pumbuk obog toho sehelimuwen hit eneg An nanggengge welamuhup ulug mumal heneptikikon inowen nele tu uruk lahi.

²⁷Ap enembol fam angge men mungguwat selmon menen teko lahu ane ulug ap ano hiyap ano feneyen enele si ane hiyag isaruk halug alem angginon unubamap tarusa ulug helep fam unusuhup,” ibag.