Read Angguruk Yali IMAMAT 21 Bible Online

IMAMAT 21 - Angguruk Yali bible

IMAMAT 21

¹NINIKNI Allahn Musa fam ele uruk lit, ”Harun umalikisi hubu lahaptuk inap imam inap arimano hiyag isahunon tu: Imam eke siyag angge ubam tag aruhu rohon are Israel ahun wareg angge senebuhu fug.

²We an namep minggirig ulug isinga, ikni, amloho, ahaloho, ori wareg angge sen enebuhu.

³Erek ahun elehon at ibam werehon wareg angge oho senetep fug angge famen nerek ulug senetuk laruhu.

⁴Inggarehen siyahap tahu rohon umbarikisi wareg angge sen enebuhu fug.

⁵Imamen ap war atukon fahet enehangge oruk men panisung men kong tuk fug angge welaruhu fug, ahap ke fili fam kiriring tuhu fug.

⁶Imam arimanowen An nunuk fanowon siyahap nabuhup tohon An Inikni welahiyon nolohotma fano welamuhup. Iren An INIKNI Allah fahet naruk angge nungge-nungge imbik waharuk lit hubu lahaptuken unubabut puhun toho welamuhup.

⁷Imam arimanowen nit Ninikni Allah anggengge welahereg puhun toho welamuhuk ulug hiyap yaying turukon men, aben siyahap turukon men, ahunen embeserukon men hilahup fug.

⁸Imam arimano An nolohotma wereg lit An nubahet naruk angge imbik waharukon haltuk lamuhup ulug mumal eneptisi inap wereg ulug enebe siyahap eneptuk lamuhup fug. An HINIKNI Allah fano welahi hag toho hir oho An numalikisi hunubabut fano welamuhup ulug mumal heneptikikon inowen nele tu uruk lahi.

⁹Imam ahaloho ekeyen yaying turuk lit siyahap taruk halug ikni Allahn mumal tarisiyon ino oho siyahap tirisi ulug indokma yale fusuhup.

¹⁰Imam onowe suwon welaruhun ulug sum fanowon wan teberuk lit e zaitun ahaluwe unggulmu are reberuk ahun inowen ap war atukon fahet oruk kong tuk fug angge welaruhu fug. At asum oho tararag isahu fug.

¹¹Ap warehon iraham lahu fug. Siyag angge ubam tag aruhu rohon ikni isinga warehon oho iniraham lahu fug.

¹²Hat Allah anggengge welaruhun ulug enehangge e ahaluwe unggulmu are reg angge re imam onowe suwon ino An wel naptuk ibamen wilip aruhu fug. An nibam embeselug wilip atuk ane ariyen An nibam siyag aruhu rohon! An HINIKNI Allahn nele tu uruk lahi.

¹³Imam onowe suwon inowen hiyap yu werehon eneg hilahu.

¹⁴Malik indag tarukon siyag angge unubam tag teg laruhu rohon ulug imam onowe suwon inowen hiyap yuwohon men, ahunen embeserukon men, aben siyahap turukon men, yaying turukon men hila fug angge ori winon enehaloho yu werehon eneg hilahu. An nolohotma puhun toho welaruhu ulug mumal taruk lahiyon inowen nele tu uruk lahi,” ibag.

¹⁶Ari ibareg NINIKNI Allahn Musa fam nin ele uruk lit,

¹⁷”Harun hiyag uruhunon tu: Haren enderuhunen endebuhubon sehelimuwon enebe siyahonen An Allah nolohotma nungge-nungge imbik waharuk lamuhup fug.

¹⁸Ap inil hupnihon men, unuyug siyahon men, onorohole siyahon men, enebe siyag tehon men,

¹⁹ininggik unuyug fala rehon men,

²⁰enembol simbuk tehon men, unuwag horohon men, inil homanggen tohon men, enehap siyahon men, unuwali sahaloho unusurukon men An nubahet hubu lahaptuk ambeg iraham waharuk lamuhup fug.

²¹Harunen ondohowonen endebuhubon sehelimuwon enebe siyahonen naruk angge nungge-nungge NINIKNI Allah fahet umbul ulug An horogma waharuk lamuhup fug.

²²An horogma wam fug angge An fahet emberuk angge fanowon men mondabi fano angge men minggiroho naruk lamuhup.

²³Enebe siyahon arimano o sabo fanowon hili Mondabi Fanoma suwaleg ambeg sok latuk asum alukema laruk lit hubu lahaptuk ambeg iraham oho laruk lamuhup fug. Enebe siyahon An wel naptuk ambeg kuruk ane ariyen An nibam men An nolohotma foroho angge men siyag aruhu rohon. Siyag aruhu rohon ulug yet teg lahiyon HINIKNI Allahn nele tu uruk lahi,” ibag.

²⁴Ibag ane ari Musa inowen Harun umalikisi men Israel inap obog toho men hiyag isibag.