Read Angguruk Yali IMAMAT 22 Bible Online

IMAMAT 22 - Angguruk Yali bible

IMAMAT 22

¹NINIKNI Allahn Musa fam ele uruk lit,

²”Harun men umalikisi men hiyag isahunon tu: An nunuk fanowon siyahap nabuhup tohon Israel inaben An nubahet imbik waharuk angge arimano Allahn tohon ulug siyahap tuhup fug. An HINIKNI Allahn nele tu uruk lahi.

³Hit sehelimuwon eke men hiren endebuhubonen endebuhubon sehelimuwon eke men siyag angge unubam tag tegman Israel inaben An nubahet emberuk angge horogma lahubon arimano An nolohotman elehap enebuhuk. An HINIKNI Allahn nele tu uruk lahi.

⁴Harunen ondohowonen endebuhubon enehap salukangge rohon men eneyeman mulen wiliptukon men siyag angge unubam tag tehon eleg am fugmu An nubahet emberuk angge naruk lamuhup fug. It sehelimuwon san ap wareg angge sen harukon men, ap nohorukmen ayenggol wilip atukon men,

⁵lebe ruruk angge enehum sap fam larukon Anden senebuhup fug irikikon men, ap siyag angge eke hag eke hag unubam tag tehon men tung eneptuk halug

⁶siyag angge ubam tag tehen An nubahet emberukon na fug angge weregman eneg o hup aruhumu ebe ik umaruhu.

⁷O hup aruhumu siyag angge ubam tag tehon ino eleg aruhu. Eleg aruhumu An nubahet emberukon imamen naruk angge werehen minggiroho naruk laruhu.

⁸Siyag angge ubam tag aruhu rohon ulug imamen wam wareg angge men olomeneyen watukon men naruk laruhu fug. An HINIKNI Allahn nele tu uruk lahi.

⁹Imam arimanowen yabuk ari-ari turuk lamuhup ulug Anden komo eneptikik ane senegman eneg welamuhup. An nolohotma emberuk angge siyahap turuk lamuhup halug alem siyahon unubam aruhumu war amuhup. An HINIKNI Allah namingmingangge welamuhup ulug mumal eneptikikon inowen nele tu uruk lahi.

¹⁰Imam onori it inibam werehonen An nubahet emberuk angge minggiroho naruk lamuhup. Ap pohon imam inibam werehon men ap yabuk wit isarukon menen An Allah nubahet emberuk angge minggiroho naruk lamuhup fug.

¹¹Imamen ap ayeg waroho enemingminganggeyap tarukon men enemingmingangge inibamen indag atukon menen An nubahet emberuk angge minggiroho naruk lamuhup.

¹²Imam ahaloho eke olma ahun ekeyen hilahu halug An nubahet emberuk angge minggiroho naruk laruhu fug.

¹³Hiyap ino umalik indag ta fug angge yuwog aruhu halug oho umalik indag ta fugmu ahunen umbusuhu halug oho tuhummu nikni men welatikik hag toho welamuhuk ulug ikni ibam suhuloho waruhureg naruk angge ikniyen tohon minggiroho naruk laruhu. Ap imam wereg elehonen naruk lamuhup fug.

¹⁴Ap sa apelehen An nubahet emberuk angge saliyog naruk halug aren narukon hikit toho imam hebeloho og utukon palu fuwaben tebelug fuwabon ino sebe roho og uruhu.

¹⁵Israel inaben An HINIKNI Allah nubahet emberuk angge ap misihen oho saliyog nahu rohon ulug imam arimanowen yet teg lamuhup.

¹⁶Saliyog naruk ane ariyen Israel inap alem siyahon unubam aruhu rohon! An HINIKNI Allah nolohotma fano welamuhup ulug mumal heneptikikon inowen nele tu uruk lahi,” ibag.

¹⁷Ari ibareg NINIKNI Allahn Musa fam nin ele uruk lit,

¹⁸”Harun umalikisi men Israel inap obog toho men hiyag isahunon tu: Israel inap sehelimuwon ekeyen ano ap pohon ekeyen ano NINIKNI Allah fahet wam waroho hubu lahabuhuk ulug sali emberikik ane hikirap tuhuk peruk halug oho nindi nahiyehen At fahet wam waroho yaluhuk peruk halug oho

¹⁹NINIKNI Allahn hiren walug waharuk lamuhubon fahet fano pukag ulug wam yuhambukon siyag teg elehon sapi ano domba ano kambing ano imbik waharuk lamuhup.

²⁰Wam siyahon walug waharuk lamuhubon fahet NINIKNI Allahn siyag peruk laruhu.

²¹Ap ekeyen NINIKNI Allah olohotman wam nahuk ulug sali emberikik ane hikirap tuhuk peruk halug oho ninindi nenehiyehen At olohotman wam nul peruk halug oho NINIKNI Allahn fano pukag ulug wam sapi kambing domba siyag teg elehon eneg imbik waharuk laruhu.

²²Wam inil hupnihon men, unuyug fala rohon men, enebe siyahon men, kiribuaha rehon men, pot yihikon men NINIKNI Allah fahet imbik waharuk lamuhup fug. Wam siyahon arimano NINIKNI Allah fahet waroho hubu lahaptuk lamuhup fug.

²³Nindi nahiyehen Allah fahet wam eke umbuhuk perukonen wam sapi ano domba ano unuyug yaron men unuyug horohon men imbik wam teg lamuhup. Allah fahet wam eke umbuhuk ulug sali emberikik ane hikirap tuhuk perukonen wam unuyug siyahon arimano fahet NINIKNI Allahn siyag pemisi ulug imbik waharuk lamuhup fug.

²⁴Wam unuwali sahaloho unusurukon men unuwali og eneptukon men NINIKNI Allah fahet imbik waharuk lamuhup fug. Hit henengginangman wam unuwali og eneptuk lamuhup fug.

²⁵Wam ap o winamonen unuwali ohowon oho hiren ayeg waroho wahupteg Allah fahet imbik waharuk lamuhup fug. Wam siyahon arimano imbik waharuk lamuhubon fahet NINIKNI Allahn siyag peruk laruhu,” ibag.

²⁶Ari ibareg NINIKNI Allahn Musa fam nin ele uruk lit,

²⁷”Wam sapi domba kambing men indag atuk sambilen tulug isinga men hup sabirenam weregman eneg o likin angge aruhumu eneg An HINIKNI Allah fahet imbik wam teg lamuhup. Wam arimano waroho hubu lahaptuk ane fahet Anden fano peruk laruhuk.

²⁸Wam sapi kambing domba isinga men umalik men o misihim sambil ambiyeg watuk lamuhup fug.

²⁹NINIKNI Allah wel tul ulug An nolohotman wam nul peruk lamuhup halug NINIKNI Allahn fano pukag ulug wam ino wabuhup sambil obog toho naruk lit sono likiya nahukon ulug we tor angge oho umbat taruk lamuhup fug. An HINIKNI Allahn nele tu uruk lahi.

³¹Anden ari-ari turuk lamuhup ulug kong toho imbihi ane ari obog toho hinine roho seneg lamuhup ulug An HINIKNI Allahn uruk lahi.

³²An nunuk fanowon siyahap nabuk fug angge nebe usa fulu nahun fahet Israel hinap obog tohowen henekol toho welamuhup. Anden hit An numalikisi welamuhup ulug mumal heneptikikteg

³³An Hinikni fam wenggel niyaruk lamuhuben o Mesir kinang famen hondog heneplug wilip atikikonen uruk lahi,” ibag.