Read Angguruk Yali IMAMAT 23 Bible Online

IMAMAT 23 - Angguruk Yali bible

IMAMAT 23

¹NINIKNI Allahn Musa fam ele uruk lit,

²”Allah wel tul ulug mangno atuk lamuhup sambil fahet ap obog toho hiyag isil laruk lamuhuben Israel inap hiyag isamihinon tu:

³O falfalikenam o yabuk wituk lamuhup. O sabir angge Sabat o yabuk embeselug kel taruk lit An HINIKNI Allah wel nabul ulug o kema-kema hit welamuhup ambehen mangno atuk lamuhup.

⁴An HINIKNI Allah wel nabul ulug mangno atuk lamuhup sambil sali emberuk lahi ane hikit toho turuk lamuhubon tu:

⁵ Pikalem misihon fam hup nunggul hurikenam atuk sambil mo ubuk urukmu An HINIKNI nunuk palimuwap tul ulug wam Paskah esetuk lamuhup.

⁶O nuwal fimahon sakan turuk halug roti suwap turuk angge ragi embeselug wirako narukmen eneg o sabirenam aruhu.

⁷O sabirenam hiren An fahet suburu yaltuk lamuhup. Roti ragi embeselug narukon ak tuhup sambil ino men o sabir angge men yabuk angginon wa fug angge An nubam sembahyang ul ulug mangno atuk lamuhup.

⁹Hit kinang Anden og hisahukon fam kuhupteg suburu roti anggen yatuk lamuhubon wirik atuk halug tam kong toho het turuk lamuhubon ino An namingmingangge imam inap og isa waharuk lamuhup.

¹¹O sabiren angge kel talug likiyamon imam arimanowen roti anggen it og isaruk lamuhubon ino An nunuk fam emberuk lamuhupmu An hit fahet nahiyeg toho welaruhuk.

¹²Roti anggen An fahet umbuhup sambil ino wam domba umalik ap angge mo misig welaruhuwon fanowon men

¹³roti anggen lilibug tohon sum misig anggin te 2 kilogram e zaitun ahaluwe men sebe roho yaltuk lamuhupmu Anden amben fano peruk laruhuk. Anggur ahaluwe kubag eke An nubahet emberuk lamuhup.

¹⁴Roti anggen oluk angge oho wirako oho hit tam nalug An nubahet fobik emberuk lamuhup fug. Anden uruk lahi ane aru hit o kema-kema wereg lit turukmen eneg hunumalikisi fobikonen oho turuk lamuhup.

¹⁵O sabiren angge Sabat kel talug likiyamon suburu roti anggen tam kong toho het turuk lamuhubon An HINIKNI Allah fahet emberuk lamuhup sali winag harukmen Sabat sabiren aruhumu

¹⁶likiyamon suburu keron An nubahet emberuk lamuhup.

¹⁷O wal tanehen roti anggen tam paltukukon Allah fahet umbul ulug roti anggen lilibug tohon anggin piren 2 kilogram famon men suwap turuk angge ragi men tag toho wirahowon piren walug waharuk lamuhup.

¹⁸Roti emberuk lamuhup sambil ino wam domba umalik mo misig welaruhuwon sabiren, wam sapi kabiniyon misig, kambing piren enebe fanowon eneg, suburu men anggur ahaluwe men An nubahet yaltuk lamuhupmu An HINIKNI Allahn amben fano peruk laruhuk.

¹⁹Niren siyag ane turuk laheyon elehap timisi ulug wam kambing abon eke waroho yaltuk lit Allah men mangno amul ulug wam domba abon mo misig famon piren waroho esetuk lamuhup.

²⁰Roti men wam domba umalik piren itano men imamen NINIKNI Allah fahet emberukon ulug ininggarehen naruk lamuhup.

²¹Ari turuk lamuhup sambil ino yabuk angginon wa fug angge An wel nabul ulug mangno atuk lamuhup. Anden uruk lahi ane aru hit o kema-kema wereg lit turukmen eneg hunumalikisi fobikonen oho turuk lamuhup.

²²Hiren roti anggen paltuk lit hiniyabuk ilan ke werehon arimano paltuk lamuhup fug. Roti anggen paluhup ambeg nin fobik hebeloho ondolik laruk lamuhup fug. Ap enengge elehon men pohon men fahet embeseruk lamuhup ulug An HINIKNI Allah inowen hunubam uruk lahi.

²³Pikalem sabiron ket inam atuk sambil ino waruk ele ine roho tung turukmu hol halug hit kel taruk lit An Hinikni wel nabul ulug palu atuk lamuhup.

²⁵O ino sambil yabuk angginon wa fug angge wereg lit An nubahet suburu yaltuk lamuhup.

²⁶Pikalem sabiron fam hup numenam atukmu siyag ane turuk laheyon elehap timisi ulug suburu na fug angge wereg lit henebe mangno roho An wel naptuk lamuhup. An wel naptuk lit suburu yaltuk lamuhup.

²⁸NINIKNI Allahn nit nunubam siyag ane werehon elehap timisi puhup sambil ino o yabuk wibuk fug angge welamuhup.

²⁹O ino sambil ap misihen nungge-nungge nahu halug ap ino An numalikisi enesehelimu welaruhu fug.

³⁰Ap san o yabuk wiruhu halug oho An ninggarehen pinggi ware fusuhuk.

³¹Anden nele uruk lahi ane aru hit kema-kema wereg lit turukmen eneg hunumalikisiyen oho ari roho turuk lamuhup.

³²Pikalem ino fam o soho atuk sambil mo ubuk urukmu ak turuk lamuhup angge o Sabat kel taruk hag toho kel taruk lit suburu na fug angge weregman eneg likiyamon mo ubuk uruk laruhu.

³³Pikalem sabiron fam hup nuwal fimahen atuk sambil ino henebe mangno atuk lit nit lek ke o sabo wiroho nohil laruk latukuk ulug wenggel haruk lit

³⁵likiya hupmu suburu An nubahet yaltukmen eneg o sabirenam aruhu. Ak tuhup sambil men o likin aruhu sambil men yabuk angginon wa fug angge wereg lit An wel naptuk lit suburu yaltuk lamuhup.

³⁷An HINIKNI Allah wel nabul ulug mangno atuk lamuhup sambil fahet Anden ihi ane hikit toho ap obog toho hiyag isaruk lamuhup. Mangno atuk lamuhup sambil wal taneg An nubahet emberuk lamuhup ulug imbihiyon hikit toho suburu men wam men yaltuk lit suburu winon men anggur ahaluwe men yaluk fug angge emberuk lamuhup.

³⁸Ari hag toho turuk lit o sabiren angge Sabat An wel naptuk hag toho winasul oho hinindi fam umbul ulug emberukon men hiren tam sali uruk ane hikit toho emberukon men imbik waharuk lit wel naptuk lamuhup.

³⁹Pikalem sabiron fam hup nuwal fimahen atuk sambil roti anggen obog toho paluhup sul ino henebe mangno atuk lit henehiyeg toho yunggultukmen eneg hup sabirenam aruhu. Ak tuhup sambil men o likin aruhu sambil men kel taruk lit An wel naptuk lamuhup.

⁴⁰Ak tuhup sambil ino e anggen fanowon eneg tahantug e palma inggila men e inggik inggila anggolo werehon men fala roho walug henehiyeg toho An HINIKNI Allah nolohotma henehiyeg toho yunggultuk lamuhup.

⁴¹Mo ekeyon-ekeyon fam ari roho yunggultukmen eneg o sabirenam aruhu. Anden uruk lahiyon aru hikit toho hiren turukmen eneg hunumalikisiyen oho turuk lamuhup.

⁴²Israel inap obog toho e inggila fam o sabo wiroho nohorukmen eneg hup sabirenam aruhumu

⁴³hunumalikisi fobikonen NINIKNI Allahn nunumbasi o Mesiren og eneplug wilip atfareg e inggila fam o sabo wiroho nohil laruk lamuhup ulug hiyag isibag ane fahet inindimu onoluk amuhup ulug An HINIKNI Allahn uruk lahi,” ibag.

⁴⁴Allahn ari ibagma Musan Israel inap unubam Allah wel tul ulug mangno atuk lamuhup sambil alem tu men tu men turuk lamuhuk ulug hiyag isibag.