Read Angguruk Yali IMAMAT 24 Bible Online

IMAMAT 24 - Angguruk Yali bible

IMAMAT 24

¹NINIKNI Allahn Musa fam ele uruk lit,

²”O sabo fanowon fam iral ino misihim oho war am fug angge umbagpag turuk lit eneg welaruhu ulug Israel inaben e zaitun ahaluwe il fanowon eneg walug waharuk lamuhuben hiyag isahun.

³Walug waharuk lamuhupmu iral sum peti Wene Numen haharehon elma kilabeg angge mapmu roho aluke fil pilabehon olohotma werehon ino hupmu famen umbagpag turukmen eneg o sakan turuk laruhu ulug Harun umalikisi menen foroho lamuhup. Ari turuk lamuhubon fahet hiyag hirihiyon ari Israel hinaben endebuhubonen endebuhubon arimanowen oho mondabi senegman eneg welamuhup.

⁴Iral emberuk ambeg emas orohole mondabi fanowon fam wirigmu iral ino NINIKNI Allah olohotma likiya hupmu umbagpag turukmen eneg welaruhu ulug Harun inowen yet teg laruhu,” ibag.

⁵ NINIKNI Allahn Musa fam nin ele uruk lit, ”Roti anggen fano lilibug tehon kubag nisanggowen wahunteg roti nisanggowen tag toho wiraruhun.

⁶Roti wiraruhunon itano o sabo fanowon fam sum tuhuloho pilabehon olohotma e tuwalehon emas fam hililip toho lombog tehon fam emberuk lit roti altap toho falfaliken-falfaliken imbil lahakun.

⁷Roti altap toho imbil lahakunon emberimu e ahaluwe amben mondabi fanowon umbuhun. Umbuhunteg roti arimano NINIKNI Allahn tohon ulug e ahaluwe amben fanowon emberimu umbuhunon ino indokma yale fuhun.

⁸Roti arimano e tuwalehon ino fam An HINIKNI Allah nolohotma weregman eneg o sabir angge aruhumu Harun inowen roti keron eke emberuk laruhu. Ari roho turuk lamuhup ulug hiyag hirihi ane ari Israel inaben endebuhubonen endebuhubon arimanowen oho senegman eneg welamuhup.

⁹Harun inowen roti keron embemin ulug tam emberukon arimano oko wahureg umalikisi menen naruk lit NINIKNI Allah fahet emberuk angge minggiroho nul ulug o fanoman eneg naruk lamuhup. Imamen naruk lamuhup ihiyon ari Harunen ondohowonen endebuhubon arimanowen mondabi senegman eneg welamuhup,” ibag.

¹⁰O misihim sambil Israel hiyaben Mesir ahun indag itfahon eke Israel inaben o sabo wirig ambeg kik watfareg Israel ahun eke men yik aptuk latfag.

¹¹Ap ino isinga unuk Selomit unggul unuk Dan ahun Dibri ahaloho inowen Mesir ahun indag itfahon inowen are men yik aptuk lit NINIKNI Allah abug uruk lit lukuram siyahon sipuk toho pet tibag. Pet turukmu hol hibareg Israel inaben ap ino hondoholug Musa ambeg libag.

¹²Libagma ap ino inggik hele waroho kilapfareg NINIKNI Allahn hiyag nisamisi ane holtul ulug nangno reg latfag.

¹³Mangno reg lit weregman NINIKNI Allahn Musa fam ele uruk lit,

¹⁴”Ap ari o sabo wirig ambehen hondoholug wilip atihipteg selma lalihip. Lalihipteg ap ariyen An nunuk siyahap naptukmu holeheson arimanowen ininggik unggulmu umbulusama ap luhaloho werehon obog tohowen helep fam ware feselihip.

¹⁵Ware fusuk ohoma humalikisi Israel inap hiyag isamihinon tu: Allah lukuram siyahon sipuk toho pet turukon arimano alem angginon unubam aruhu.

¹⁶Israel inap sehelimuwon ekeyen ano ap pohon ekeyen ano NINIKNI Allah abug uruk halug Israel inap luhaloho werehon arimanowen helep fam ware fusuhup.

¹⁷Ap san ap eke ware feseruk halug ar oho war aruhu.

¹⁸Ap san wam aben tohon ware feseruk halug wam ngi ahun hebeloho og utuk lit wam fahet wam wirim tuk teg.

¹⁹Ap ekeyen ap eke mep toho ware feseruk halug hebeloho watuk lit aren mep toho watuk ane hikit toho inggareg ubam turuk lamuhup.

²⁰Hebeloho watuk lit inggik kong tohon fahet inggik kong tohon wirim tuk teg, il fahet il wirim tuk teg, ayeg fahet ayeg wirim tuk teg. Ap ekeyen watuk ane hikit toho inggareg ubam turuk lamuhup.

²¹Ap san wam aben tohon ware feseruk halug wam eke hebeloho og uruhu. Ap ware feserukon arimano war amuhup.

²²Hebeloho watuk ane fahet ihiyon ari Israel inap yuhon men ap pohon men unubam ambi roho turuk lamuhup ulug An HINIKNI Allahn uruk lahi,” ibag.

²³NINIKNI Allahn ibag ane ino Musan Israel inap hiyag isibag. Hiyag isibag ane ino hikit toho ap Allah abug ibahon ino hondoholug o sabo wirig ambehen wilip atfareg helep fam ware fisibag.