Read Angguruk Yali IMAMAT 25 Bible Online

IMAMAT 25 - Angguruk Yali bible

IMAMAT 25

¹ NINIKNI Allahn tom Sinai famen Musa fam ele uruk lit,

²”Israel inap hiyag isahunon tu: Hit kinang Anden og hisahukon fam kuhupteg welamuhup halug NINIKNI Allah wel tul ulug o sabir angge kel taruk lahep hag toho nit nenengginang oho kel tawag ulug mo sabiron fam yabuk wituk lamuhup fug.

³Hiren hiniyabuk wituk lit suburu yaho feheg yahal teheg hele anggur inggik paleheg anggen tahane feheg turukmen eneg mo ilig am wirig am turuk lit falfalikenam lahumu

⁴mo sabiron fam hiren nungge-nungge yabuk fug angge hele anggur inggik paluk fug angge welamuhup. Hiren o sabir angge kel taruk lit An wel naptuk lahep hag toho NINIKNI Allah unuk su amag ulug hit henengginang oho mo sabiron fam kel taruk laruhu.

⁵Kinang we tem toho kel tawag ulug hiniyabukmuwen amu fahaltug wilip atuk angge suburu yahal ta fug angge anggur anggen oho tahan taruk lamuhup fug.

⁶Kinang kel taruk li hiniyabuk wituk ambeg selman amu fahaltug wilip atuk angge eneg hit men henemingmingangge abet hiyabet, ap pohon hit sehelimu yug atukonet, ap yabuk wit hisarukonet naruk lamuhup.

⁷Selman wilip atuk angge arimano hit henembohom men wam eli, pak, olomene menen oho naruk lamuhup.

⁸Mo ilig am wirig am turukmen teng misig nubam hilag falfalik fuman 49 aruhu halug hiren mo sabiron fam hiniyabuk wibuk fug angge welamuhubon hininggik winag harukmen sabirenam aruhu.

⁹Mo ino fam pikalem sabiron inam aruhumu hup numenam welamuhupteg siyag ane turukon elehap turuk sambil welahe ulug kinang atogman atogma waruk ele ine roho tung til laruk lamuhup.

¹⁰Tung til laruk lamuhup ane ariyen mo misig tu fam Israel ninap nininggik lol neneptukon o yoho ak tehek ulug onoluk aruhu. Mo unuk Yobel ino sali obog aruhumu Israel inap obog toho kinang unumbasiyen lin isarukon ap winonen onggo paltukon nin hebeloho ininggareg ngi amuhup. Ap paleg angge fahet onggo paluk fug tehen enemingminganggeyap eneptukon oho ininggik lol enebuhupmu inibam suhuloho waharuk lamuhup.

¹¹Mo Yobel fam hiniyabuk wibuk fug angge hele anggur inggik paluk fug angge amu fahaltug wilip atukon arimano yahal ta fug angge welamuhup.

¹²Mo ino fam hiren Allahn peruk ane hikit toho turuk lamuhuben we anggenman amu wilip atuk angge naruk lamuhup.

¹³Naruk lit Israel hinap obog toho kinang hunumbasiyen lin isarukon ap winonen onggo paltukon hebeloho ngi amuhup.

¹⁴Hiren kinang ayeg waroho wul peruk lamuhup halug oho kinang og usul peruk lamuhup halug oho onggo fahet honori enele ying eneptuk lamuhup fug.

¹⁵Hiren kinang ayeg waroho wul peruk lamuhup halug mo Yobel sali ino horog teg ano yat teg ano ulug wenggel haruk lit onggo wirim toho paltuk lamuhup. Horog teg halug anggen tor angge naruk lamuhup ane hikit toho onggo tor angge og isaruk lamuhup angge famen mo Yobel sali yat teg halug anggen su roho naruk lamuhup ane hikit toho onggo su roho og isaruk lamuhup.

¹⁶Mo Yobel fam kinang hebeloho ngi ahun og umuhup li uwanma mo eke fam eke fam kinangman wilip atuk angge yahal taruk lamuhup ane hikit toho onggo paltuk lamuhup.

¹⁷Honori enele ying enebuk fug angge An Hinikni Allah fahet henekol toho wereg inaben turuk ane hikit toho turuk lamuhup ulug An HINIKNI Allahn uruk lahi.

¹⁸Anden ari-ari turuk lamuhup ulug komo heneptuk lahi ane hinine roho seneg lit An numalikisiyen tuk teg ane fahet hiyag hisarikikon hikit toho turuk lamuhup halug henengginang famen wilip atuk angge henehum ouk toho naruk lit hinindi yuwag toho welamuhup.

¹⁹

²⁰Hit hinindimuwen wenggel haruk lit, ’Mo sabiron fam niniyabuk wibuk fug angge kinangman wilip atuk angge yahal ta fug angge welamuhuk li nungge naruk lamuhuk?’ ulug wenggel haruk lit henekol toho welamuhup fug.

²¹Anden mo falfalikon fam hit henengginangman wilip atuk angge anggolo og hisaruk laruhukmu hiren mo ino fam yahal taruk lamuhubon narukmen eneg mo hinahan aruhu.

²²Mo likinon fam suburu yatuk lamuhup li oho suburu arimano narukmen eneg mo ilig am wirig am turukmen sohowen aruhumu suburu keron yahaltuk lamuhup,” ibag.

²³NINIKNI Allahn Musa fam ele uruk lit, ”An namu kinang ngi reg lahi angge re hiren kinang aben mondabi hilawag ulug ayeg waroho og isaruk lamuhup fug. Hit ap o winamon men pohon men hag toho An nangginang fam welahep.

²⁴Hiren kinang ayeg waroho hulul puhup halug fobik kinang ngi ahunen nin hebeloho hilahuk puhu ane fahet henele kong toho uhupteg eneg hilaruk lamuhup.

²⁵Henere Israel ahun eke anggengge elehen angginang ayeg waroho ap eke og utuk halug are ekeyen at fahet kinang ino hebeloho ayeg waroho hilaruk laruhu.

²⁶Ori eleg ahun anggengge elehon ino fobik nungge-nungge inggikmu aruhu halug

²⁷kinang at og itikikon hebeloho an aruhuk ulug ayeg waroho hilahu. Hilik oho lit kinang ari mo Yobel fam hebeloho hilahuk urukuk sali uwanma hilahu angge re anggen naruk laruhu ane wirim toho onggo og uruhu.

²⁸Ap ino ine elehen kinang hebeloho hila fug teg laruhu halug kinang ino ap ayeg waroho og utuk ahunen senegman eneg mo Yobel waruhumu tam ngi ahunen onggo og um fug angge hilaruk laruhu,” ibag.

²⁹NINIKNI Allahn Musa fam ele uruk lit, ”Ap ekeyen at ibam o pumbuk elehet walinggoho ohowon fam werehon ino ayeg waroho ap eke og utuk halug mo tamon fam eneg hebeloho ngi aruhuk ulug ayeg waroho hila reg laruhu. Mo ilig atug wirig aruhumu o ino hebeloho hila fug teg laruhu.

³⁰Mo tamon fam tam ngi ahunen ibam hebeloho hilahu fug halug ap og utuk ahunen ondohowonen endebuhubon oho o ino ngi regman eneg mo Yobel fam oho tam ngi ahun hebeloho og utuk lamuhup fug.

³¹O ap eke og utuk ibam ino o pumbuk elehet walinggoho oho eleg ambeg wereg halug kinang walinggoho werehon ino tam ngi inaben ayeg waroho hila reg hag toho o ino oho tam ngi ahunen hebeloho hila reg laruhu. Hilahu fug halug mo Yobel waruhumu tam ngi ahunen onggo og um fug angge o ino hebeloho hilaruk laruhu.

³²Lewi inap arimanowen inibam ap eke ayeg waroho og isaruk halug fobik iren ayeg waroho hila reg hag toho iren ondohowonen endebuhubon arimanowen oho hebeloho hila reg lamuhup.

³³Israel inap sehelimu we Lewi inap arimano inibam ngi regman eneg welamuhup ulug imbibag angge re Lewi ahun ekeyen ibam ap eke og utukon ino hebeloho ayeg waroho hilahu fug halug mo Yobel fam onggo og um fug angge hebeloho hilaruk laruhu.

³⁴Wam foroho ambeg Lewi inap inibam walinggoho werehon arimano iren ondohowonen endebuhubon arimanowen oho mondabi seneg lamuhuben ap misihen oho ayeg waroho hilaruk laruhu fug,” ibag.

³⁵ NINIKNI Allahn Musa fam ele uruk lit, ”Henere Israel ahun hit men werehon eke anggengge elehen ilaheg toho welaruhu halug ap pohon hit sehelimu werehon let eneptuk lahep hag toho ar oho hit hiniraham fano welaruhuwen let turuk lamuhup.

³⁶Uang ano suburu ano og utuk lit hebeloho og nuruhu sambil unon sebe roho og nuruhu puk fug angge og utuk lamuhup. An Hinikni Allah fahet henekol toho wereg lit nenere nit men welaruhu ulug let turuk lamuhup.

³⁷

³⁸An Hinikni fam wenggel niyaruk lamuhuben o Mesir kinang famen hondog heneplug wilip atikikteg kinang Kanaan og hisahuk ambeg ino hondog heneplug laruk lahiyon HINIKNI Allahn nele tu uruk lahi.

³⁹Hit henere eke anggengge elehen henemingmingangge welaruhuk ulug waharuk halug henele olok toho mingming enebuk fug angge

⁴⁰ap pohon men ap hiniyabuk wit hisarukon men unubam turuk ane hikit toho ubam turuk lamuhup. Ari roho ubam turukmu aren hit hiniyabuk wit hisarukmen eneg mo Yobel waruhu.

⁴¹Mo Yobel waruhumu at umalikisi menen hiniyabuk wit hisaruk ane embeselug wilip atug inibam suhuloho lahupteg kinang unumbasiyen lin isarukon hebeloho it amuhup.

⁴²Israel hinap obog toho An namingmingangge amuhup ulug o Mesir kinang famen hondog heneplug wilip atikik angge re hiren honori ap amingmingangge amag ulug ayeg waroho ap winon og isaruk lamuhup fug.

⁴³An Hinikni Allah fahet henekol toho wereg lit honori enengge elehen hiniyabuk wit hisarukon unubam honolok ane turuk lamuhup fug.

⁴⁴Ap hiyap o pumbuk winon hit walinggoho werehon arimano eneg nit nenemingmingangge welamuhup ulug ayeg waroho og eneptuk lamuhup.

⁴⁵Ap pohon hit sehelimu werehon men unumalikisi hit henengginangman indag atukon men oho ayeg waroho henemingminganggeyap enebuk teg lamuhup.

⁴⁶Ap pohon henemingmingangge amuhubon arimano ininggik loloho wilip enebuk fug angge wereg lit hiniyabuk wit hisarukmen eneg hit war atukon horog aruhumu hit hunumalikisiyen oho sen enesug lamuhuben lin isaruk lamuhup angge famen honori Israel hinap henemingminganggeyap taruk lit honolok ane unubam turuk lamuhup fug.

⁴⁷Ap pohon hit sehelimu werehon eke tung aruhumu henere Israel ahun eke anggengge elehen tung ahun ino amingmingangge welaruhu halug

⁴⁸at areyen ano at ikni areyen ano ikni are umalikisiyen ano umbalisi winonen ano ayeg waroho windatuk lamuhup. Iren enere windatuk lamuhup fug halug ap pohon amingmingangge atukon inowen ikni iyabuk wit utukmen eneg anggengge inggikmu aruhumu ninggik lol napmihinen onggo og hitmin ulug ikni fam heng tuhu.

⁴⁹

⁵⁰Heng turuk lit ikni fam an mo Yobel fam haren ninggik lol nabuhun perikik li uwanma ninggik lol napmihin angge re niyabuk wit nutuk laruhu perikinon wituk laruhuk fug. Wituk laruhuk fuhen onggo wirim toho og hitmin ulug hiyag uruhu. Hiyag uruhureg ap iniyabuk wit isarukonen onggo hilaruk ane wirim toho og uruhuwon at ikni men ambiyeg winag haruk lamuhup.

⁵¹Mo Yobel fam hinggik lol habuhuk peruk li horog atuk halug amingmingangge inowen onggo we tor angge ikni og utuk laruhu. Mo Yobel sali yat teg halug onggo anggolo og utuk laruhu.

⁵²

⁵³Inggik loltukon uwanma ikniyen ap iniyabuk wit isarukon unubam turuk ane hikit toho turuk lit olok ane amingmingangge ino ubam turuk laruhu fug ulug hit Israel hinaben yet teg lamuhup.

⁵⁴Ikniyen inggik loluhu fug halug mo Yobel sali horog aruhumu ikniyen onggo heng uk fug angge umalikisi men wilip enebuhumu inibam lahup.

⁵⁵Israel inap obog toho An namingmingangge amuhup ulug Mesir kinang famen hondog heneplug wilip atikikon HINIKNI Allahn nele tu uruk lahi,” ibag.