Read Angguruk Yali IMAMAT 26 Bible Online

IMAMAT 26 - Angguruk Yali bible

IMAMAT 26

¹ NINIKNI Allahn ele uruk lit, ”Hininggiken laltuk angge fahet, ’Tu Allah hag toho wereg,’ ulug wirim tuk fug. Henengginang fam e usa ahen uwag men usa ahalep men hutuk teberuk lit helep fam hesenggengge ohowon olohotma henelenggen fam hur atug sembahyang uruk lamuhup fug. We An namu eneg HINIKNI Allah welahi.

²O sabir angge kel taruk lit An fahet wenggel niyaruk lamuhup. An wel naptuk ibam siyahap turuk lamuhup fug. An HINIKNI Allahn nele tu uruk lahi.

³Anden ari-ari turuk lamuhup ulug komo heneptikik ane hinine roho seneg lit An numalikisiyen tuk teg ane fahet hiyag hisarikikon hikit toho turuk lamuhup halug

⁴suburu yatuk li Anden osit pilabik waruhukmu suburu sig aruhumu e anggen oho anggolo uruk laruhu.

⁵Roti anggen anggolo paluhubon warukmen eneg hele anggur anggen tahan taruk lamuhup. Anggur anggen tahantukmen eneg suburu yatuk lamuhup. Ari roho turukmen eneg henehum ouk toho naruk lit hit henengginang fam hinindi yuwag toho welamuhup.

⁶Anden hit wanggi waroho fet henesugmu hubanggo oho hinindi yuwag toho nohoruk lamuhupmu ap misihen oho elel heneptuk laruhu fug. Olomene onolokon henengginang famen yanggal enebuhukmu ap seliyon oho hit henembeg kik waharuk lamuhup fug angge famen

⁷hiren it mug eneplug laruk lit mulangge unusuruk lamuhup.

⁸Hit henebe fuwaben enehen ap seliyon enebe teng uhan mug eneplug laruk lamuhup. Hit henebe teng uhanen ap seliyon teng obog sehelet obog mug eneplug laruk lit obog toho unusuruk lamuhup.

⁹Anden hit hunubam sali emberikik ane hikirap tuhuk ulug naluke yig hisaruk lit hinineyap henebuhukmu hiren endebuhubonen endebuhubon anggolo amuhup.

¹⁰Suburu sig aruhumu tam yahaltukon anggolo narukmen eneg henehum ouken umbuhubon arimano suburu foroho ambeg keleg aruhu rohon ulug hik isalug suburu fobik yahaltuk lamuhubon imbik kuruk lamuhup.

¹¹An nibam hit sehelimu wereg lit hit fahet nirim ulug nambol yig hisa fug angge welaruhuk.

¹²An hit hiniraham wereg lit Hinikni weregma hit An numalikisi welamuhup.

¹³Hit Mesir inap enemingmingangge welamuhup fug ulug o Mesir kinang famen hondog heneplug wilip atikikon HINIKNI Allah An tu welahi. Mesir inaben e angginon hunumaloma emberuson Anden kong toho hik isarikikmu hit henembol simbuk teg latikibon pikit in atikipteg welahep,” ibag.

¹⁴ NINIKNI Allahn ele uruk lit, ”An numalikisi welamuhup ulug sali emberikikon hiren sobir isalug Allahn komo neneptisi ane ninirimen holtul fug ulug embeseruk lit An numalikisiyen tuk teg ane fahet hiyag hisarikikon hikit toho turuk lamuhup fug halug

¹⁵

¹⁶Anden alem angginon eke hag eke hag hunubam umbuhukmu henekol anggolo haruk lamuhup. Inahan hunubam aruhureg hunuwag eneg aruhumu hinil hupnig lit war am hag ane turuk lamuhup. Suburu yatuk lamuhubon arimano hit hininggareg na fugmen ap seliyonen eneg naruk lamuhup.

¹⁷An norohole olok toho kim hisaruk lit ap seliyonen hunusukag ulug mon enebik waruhukmu hit fahet inirim peruk inaben sen henesug lamuhup. Sen henesugmu henekol haruk lit ap seliyonen mug heneplug larukon elegman linggik-longgo uruk lamuhup.

¹⁸Ari roho Anden hit hunubam tuhuk angge famen hit hinindi anggat teg elehen An nele holuhup fug halug hiren siyag ane turuk lahebon fahet Anden alem angginon hunubam emberuk laruhukon ninggik winag harukmen sabirenam aruhu.

¹⁹Hit hinindi arik teg lit winik-wonog angge turuk lahebon eleg amag ulug Anden poholman osit pilabik waruhuk fugmu hit henengginang helep hag toho ine aruhu.

²⁰Ine aruhumu hit hiniyabuk sat toho wituk lamuhup angge famen nungge-nungge wilip aruhu fugmu e anggen oho uruk laruhu fug.

²¹Ari roho Anden hunubam tuhuk angge famen hit hinindi anggat teg elehen An men seli roho wereg lit nele holuhup fug halug hiren siyag ane turuk lahebon fahet Anden sebe roho alem angginon hunubam emberuk laruhukon ninggik winag harukmen sabirenam aruhu.

²²Anden olomene onolokon henembeg monde fik waruhukmu hunumalikisi men henembohom men naruk lit hir oho hunusuruk lamuhupmu kebunggalem keyen ap enele urukon eleg aruhu.

²³Ari roho Anden hunubam tuhuk angge famen hit hinindi anggat teg elehen Allahn komo neneptukon holtul fug ulug An men seli roho welamuhup halug

²⁴An oho hit men seli roho wereg lit hiren siyag ane turuk lahebon fahet sebe roho alem angginon hunubam emberuk laruhukon ninggik winag harukmen sabirenam aruhu.

²⁵An numalikisi welamuhup ulug sali emberikikon sobir isaruk ane fahet ayeg waroho unusuhuk ulug ap seliyon henembeg mon enebik waruhuk. Mon enebik waruhukmu hit henekolen o pumbuk elehet walinggoho ohowon alukema hirag arik kuhupteg palu roho weregma ouk alem suwon hunubam monde fik waruhukteg ap seliyon ininggikmu hunumbahakuk.

²⁶Hunumbahakukmu hiniyabuk wit ta fug angge weregman eneg suburu obok haruk lamuhup. Suburu obok haruk lit roti anggen we tot eneg werehen hiyap enebe numen itanowen roti anggen wiratuk ambeg misig fam eneg wiraho feruk lamuhup. Roti anggen we tor angge wiratukon ino kuroho nul ulug anggin wirim turuk angge fam wirim tebelug naruk lamuhup angge famen henehummu atuk laruhu fug.

²⁷Ari roho Anden hunubam tuhuk angge famen hit hinindi anggat teg elehen Allah ele holtul fug ulug An men seli roho welamuhup halug

²⁸An nindimu ahe lahakumu hit men seli roho wereg lit hiren siyag ane turuk lahebon fahet sebe roho alem angginon hunubam emberuk laruhukon ninggik winag harukmen sabirenam aruhu.

²⁹Ari roho turuk laruhukmu hit suburu oboken hunumalikisi ap angge hiyap angge ununu naruk lamuhup.

³⁰Hiren punumuwen usangge fahet hubu lahaptuk ambeg halog toho siyahap tuhukteg hit henebe wareg angge usangge halog toho lin uhubon emberimu hik hisa lahuk. Hit fahet me nape naptuken nambol yig hisaruk laruhuk.

³¹Nambol yig hisaruk lit hiren amben fano pukag ulug An nolohotma hubu lahaptuk lamuhubon fahet nirim peruk laruhuk. Nirimen hiren hubu lahaptuk lahep ambeg arimano lilibug-lalabag toho ilkal isahukteg hinibam pumbuk arimano oho harep pisako siyaha fusuhuk.

³²Hit henengginang siyaha fusuhuk ambeg ap seliyon ngi arik kuruk lit yet harukmen kinang aru alem nungge fahet mondabi siyag atisi ulug enekolen yuk lagmag uruk lamuhup.

³³Anden hit hunusil laruk lit yanggal henebuhukteg o pumbuk wina ke hik-hak hisahukmu hinibam pumbuk arimano halog toho lin-lan uhupmu hit henengginangman ap enele teng uhup.

³⁴Hiren o sabir angge kel taruk lahep hag toho hit henengginang oho mo sabiron fam kel tawag ulug hiniyabuk wibuk fug angge welalep angge famen hiren hiniyabuk umbusuk fug angge witukmen eneg henengginang kel tarisi fuhen ketiya eneg kel tahu. Kel tawag ulug Anden hit henengginangman yanggal henebuhukmu ap seliyon wereg ke welamuhup. Welamuhup li henengginang ap enele elehen kel taruk laruhu.

³⁵

³⁶Hit tor angge welamuhubon ap seliyon men weregma Anden henekolap henebuhukmu e inggila homhomowen fu rurukmu aplohok tor angge turukon fahet henekolen hirag arik lahup. Ap seliyon mug heneplug larukon elegman hinindi henekolen aben nunusuhup tohon linggik-longgo ul ulug hit-hit miyal-miyal atil laruk lit salog-malog angge roho fuk turukmu ap seliyonen apmayap henebuhup.

³⁷

³⁸Apmayap henebuhupmu ap seliyon enengginangman war atuk lamuhup.

³⁹War atukmu honori winon we tor angge welamuhubon arimano it men unumbasi menen siyag ane turuk latuson ariyen war am hag ane turuk lamuhup.

⁴⁰War am hag ane turuken enele fag toho uruk lit, ’Nit nunumbasi menen Allah umalikisi roho welamuhuk ulug sali emberukukon sobir isalug At men hiliyap turuk latukuk ane ari nenembiken turuk latukuk,’ uruk lamuhup.

⁴¹An men hiliyap turuk ane ari fahet Anden it unubam oho hiliyap turuk lit ap seliyon wereg ke hik isahuk. Hik isahuk ambehen iren siyag ane turukon fahet alem angginon eke hag eke hag unubam atuk laruhumu it inindimu ambilahap paleg elehon arimanowen inindi imbik wamburuk lamuhup.

⁴²Inindi imbik wambuhupmu Anden unumba Yakub fam sali imbiyahon men, Ishak men Abraham men unubam sali imbiyahon men wenggel haruk lit kinang Anden og hisahuk ulug sali imbiyahon fahet oho wenggel hahuk.

⁴³Ari uwanma kinang Anden og hisahuk ulug sali imbiyag ambehen hiren endebuhubonen endebuhubon arimano wilip amuhup. Kinang ino mo sabiron fam kel tawag ulug iniyabuk wibuk fug angge welalep angge famen it arimanowen iniyabuk umbusuk fug angge witukmen eneg enengginang kel tarisi fuhon ketiya eneg kel tahu. Kel tawag ulug it enengginangman yanggal enebuhukmu ap kinang ino fam enele elehen kel taruk laruhu. It arimanowen Anden ari-ari turuk lamuhup ulug komo eneptikik ane sobir isaruk lit inindimuwen An numalikisiyen tuk teg ane hiyag isarikikon fahet inirim peruken alem angginon ari unubam umbuhuk.

⁴⁴Umbuhukmu ap seliyon wereg ke welamuhup angge famen Anden it unubam sali imbiyahon uwag oko hila fug teg lahireg siyag amuhup ulug nambol yig isaruk lit nirim peruk laruhuk fug ulug An HINIKNI Allahn uruk lahi.

⁴⁵An Israel inap Inikni aruhuk ulug ap o pumbuk obog toho onolohotman Israel inap unumbasi arimano o Mesir kinang famen hondog eneplug wilip atuk lit sali unubam imbiyahon fahet wenggel hahukteg let eneptuk laruhuk ulug An INIKNI Allahn uruk lahi,” ibag.

⁴⁶Ari roho tom Sinai famen ele uruk lit NINIKNI Allahn An numalikisi Israel inap men nininggik ahandip toho welamuhuken tu men ari men turuk lamuhup ulug komo eneptuk ane men, Allah fam wenggel harukonen tuk teg ane men Musa feneyen Israel inap obog toho hiyag isibag.