Read Angguruk Yali IMAMAT 27 Bible Online

IMAMAT 27 - Angguruk Yali bible

IMAMAT 27

¹NINIKNI Allahn Musa fam ele uruk lit,

²”Israel inap hiyag isahunon tu: Ap misihen NINIKNI Allah fam ap eke fahet sali emberuk lit, ’Ap tuwen Hat hiyabuk wituk laruhuwen hinggikmu umbuhuk,’ uruk. Aren Allah fahet umbuhuk urukon ubalma uang imbik wam teg laruhu.

³Ap angge indag atukon sali mo ilig am wirig am turukmu likin fumahen tulug teng pirenman nubam hilag falfaliken 60 atukon fam unubalmangge emberuk ane fahet o sabo fanowon famen onggo paltukon hikit toho uang anggen teng piren 50 perak men wirim teg.

⁴Hiyap fahet uang anggen teng misig men wirim teg.

⁵Ap umalik indag atukon sali mo ilig am wirig am turukmu fuwaben tulug likin fumahen atukon fam unubalmangge emberuk ane fahet uang anggen likin fumahen men wirim teg. Hilani umalik wereg halug uang anggen numen men wirim teg.

⁶Ap umalik indag atukon sali pikalem misig famen tulug mo fuwaben atukon fam unubalmangge emberuk ane fahet uang anggen fuwaben men wirim teg. Hilani malik fahet uang anggen hinahan men wirim teg.

⁷Ap sabalon indag atukon sali mo ilig am wirig am turukmu teng piren atukon famen pali filon fahet uang anggen nuwal fimahen men wirim teg. Hiyap sabalon fahet uang anggen numen emberukon men wirim teg.

⁸Ap ekeyen nare Allah fahet umbuhuk ulug sali emberukon inowen anggengge elehen are ubalmangge uang wirim toho umbuk fug teg. Aren imamen yet hawag ulug are hondoholug imam ambeg lahumu imamen kim halug hare ubalmangge emberukon fahet uang hinggikmu werehon hikit toho embemihin ulug hiyag uruhu.

⁹Ap ekeyen NINIKNI Allah fahet wam eke umbuhuk ulug sali emberuk. Aren wam umbuhuk urukon ino NINIKNI Allah anggengge welaruhu.

¹⁰Allah anggengge werehen ubalmangge wam fanowon oho siyahon oho umbuk fug teg laruhu. Wam umbuhuk irikikon ubalmangge wam eke umbuhuk uhu halug wam piren itano NINIKNI anggengge welamuhup.

¹¹Ap ekeyen wam NINIKNI Allah fahet waroho hubu lahabuk fug tehon famen At fahet umbuhuk ulug sali emberuk. Aren wam ino imamen yet hawag ulug walug lahu.

¹²Walug lahumu imam inowen ebe fano ano siyag teg ano ulug kim hahureg wam ino onggo paltukon kong toho umbuhu. Kong toho umbuhuwon ari ap misihen oho elehap tuk fug teg laruhu.

¹³Wam ngi ahunen Allah fahet emberikikon hebeloho hilamin puhu halug wam ino onggo wirim toho paltukon Allah fahet emberuk lit sebe roho onggo emberukon ino palu fuwaben tebelug fuwabon umbuhureg ambohom hebeloho ngi aruhu.

¹⁴Ap ekeyen an nibam NINIKNI Allah fahet umbuhuk ulug sali emberuk. Emberukmu imam ino waruhureg o ino fano ano siyag teg ano ulug kim hahureg onggo o ino fahet wirim toho paltukon kong toho umbuhu. Kong toho umbuhuwon ari ap misihen oho elehap tuk fug teg laruhu.

¹⁵Ap inowen an nibam Allah fahet emberikikon hebeloho hilamin puhu halug o ino onggo wirim toho paltukon Allah fahet emberuk lit sebe roho onggo emberukon ino palu fuwaben tebelug fuwabon umbuhureg o ino hebeloho ngi aruhu.

¹⁶Ap ekeyen kinang an numbasiyen lin isibahon minggiroho NINIKNI Allah fahet umbuhuk ulug sali emberuk. Emberuk halug kinang ino su reg ano tot teg ano ulug kim halug kinang ino fahet onggo wirim toho paltukon kong toho emberuk lamuhup. Kinang ino su reg lit roti anggen sum suwon hinahan fok turuk ambeg men wirim teg halug kinang ino fahet paltukon uang anggen teng piren men wirim teg.

¹⁷Ap inowen nangginang ino mo Yobel famen NINIKNI Allah ngi aruhuwen umbuhuk ulug sali emberuk halug fobik ap inowen kinang Allah fahet emberikikon hebeloho hilamin ulug kinang ino onggo wirim toho paltukon Allah fahet umbuhureg kinang hebeloho ngi aruhu.

¹⁸Ap inowen mo Yobel uwanma kinang aru NINIKNI Allah fahet embemin angge nin fobik mo Yobel fam ninggareg hebeloho hilahuk ulug sali umbuhu halug mo ilig am wirig am turukmen noenam aruhumu mo Yobel waruhu ulug imam inowen inggik winag hahu ane wirim toho kinang ino fahet onggo paltukon kong toho emberuk laruhu.

¹⁹Ap inowen fobik nangginang Allah fahet emberikikon hebeloho hilamin puhu halug kinang onggo paltukon Allah fahet emberuk lit sebe roho onggo emberukon ino palu fuwaben tebelug fuwabon umbuhureg kinang ino hebeloho ngi aruhu.

²⁰Ap inowen anggengge elehen angginang Allah fahet emberukon hebeloho hila fug angge ap eke ayeg waroho og uruhu halug fobik oho ayeg waroho hila fug teg laruhu.

²¹Hila fug tegman mo Yobel horog toho waruhu halug kinang ino NINIKNI Allah anggengge aha ulug imamen seneg laruhu.

²²Ap ekeyen kinang ayeg waroho hilarukon NINIKNI Allah fahet emberuk halug

²³mo ilig am wirig am turukmen noenam aruhumu mo Yobel waruhu ulug imam inowen inggik winag hahu ane wirim toho kinang ino fahet onggo paltukon kong toho umbuhu. Kong toho umbuhu sambil ino eneg ap inowen NINIKNI Allah fahet uang imbik waruhu.

²⁴Mo Yobel horog toho waruhu halug kinang ino tam ngi ahunen onggo paluk fug angge hilaruk laruhu.

²⁵Mun angge man angge onggo paltukon arimano o sabo fanowon famen paltuk ane hikit toho paltuk lamuhup.

²⁶Wam sapi kambing domba umalik wandabon endetuk sambilen NINIKNI Allah anggengge wereg angge re fobik wam foroho ahunen NINIKNI Allah fahet umbuhuk ulug sali uk fug teg.

²⁷Wam Allah fahet waroho hubu lahabuk fug tehon umalik wandabon oho endetuk sambilen NINIKNI Allah anggengge wereg. At anggengge wereg angge famen endetuk ahunen wam ino onggo wirim toho paltukon NINIKNI Allah fahet emberuk lit sebe roho onggo paltukon palu fuwaben tebelug fuwabon umbuhureg wam ino at aruhu. Endetuk ahunen hila fug teg laruhu halug ap eke wam ino fahet onggo wirim toho paltukon og umuhup.

²⁸Ap ekeyen anden angge ap ano wam ano kinang ano NINIKNI Allah mondabi ngi reg laruhuwen umbuhuk ulug sali emberuk. Umbuhuk ulug sali uruk angge arimano usa ulug ap inowen hebeloho hila fug teg lit ap winon fam oho ayeg waroho og isa fug teg laruhu.

²⁹Ap eke war amag ulug NINIKNI Allah inggikmu emberukon arimano onoluk welamag ulug onggo paluk fug teg. Paluk fug tehen unusuruk lamuhup.

³⁰Kinangma yatukon anggen men e anggen obog toho men palu numen tebelug numon arimano NINIKNI Allah anggengge wereg ulug At fahet imbik waharuk lamuhup.

³¹Ap ekeyen palu numon Allah fahet embeleyon ubalmangge uang embemin puhu. Aren palu numon arimano fahet onggo wirim toho paltukon NINIKNI Allah fahet emberuk lit sebe roho onggo emberukon palu fuwaben tebelug fuwabon umbuhu.

³²Wam sapi kambing domba aren tohon obog toho winag hahureg numon arimano NINIKNI Allah anggengge wereg ulug At fahet imbik waharuk laruhu.

³³Wam tu siyag, tu fano ulug enebuk fug angge winag hahureg numon arimano obog toho NINIKNI Allah fahet emberuk laruhu. It unubalmangge wam winon imbik waharuk laruhu fug. Ap san nambohom numon embeleyon ari ubalmangge wam winon embemin puhu halug wam pirenet NINIKNI Allahn tohon ulug At fahet imbik waharuk laruhuk. Waruhureg fobik oho ayeg waroho at inggareg am fug teg laruhu,” ibag.

³⁴Ari roho tom Sinai famen ele uruk lit NINIKNI Allahn An numalikisiyen tu men ari men turuk lamuhup ulug komo eneptuk ane Musa feneyen Israel inap obog toho hiyag isibag.