Read Angguruk Yali IMAMAT 4 Bible Online

IMAMAT 4 - Angguruk Yali bible

IMAMAT 4

¹NINIKNI Allahn Musa fam ele uruk lit,

²”Israel inap hiyag isahunon tu: Ap ekeyen siyag ane timin puk fug anggeyen NINIKNI Allahn tuk fug ibag ane sobir isalug siyag ane tuhu halug hiren at ubam turuk lamuhup ane fahet iminon tu:

³Imam inap onowe suwon inowen siyag ane turukon ariyen Israel inap obog toho siyahap enebuhu. Siyahap enebuhu halug NINIKNI Allahn siyag ane tirikikon elehap tukag ulug wam sapi kabiniyon siyag teg elehon eke

⁴o sabo fanowon sok kurukon iraham walug watug NINIKNI Allah olohotma wam unggulmu inggik umbuhureg wam ino ware fuhu.

⁵Ware fuhureg wam amep minggiroho winon o sabo fanowon fam walug kuhu.

⁶Kuhureg wam amep ino inggik tumen oko walug hili Mondabi Fanoma suwalehon olohotma sum tuhuloho pilabehon fam inggik sabirenam ketne isahu.

⁷Ketne isahureg imam inowen wam amep tor angge oko walug amben fano angge yaltuk ambeg atog nganog teg ke fima-fima are rebelug wam amep winon sok aluke fil walug hubu lahaptuk ambeg alem ke hilili fuhu.

⁸Hilili fuhureg Allah olohotman wam sapi eke nul ulug turuk ane hikit toho wam seiyangge amiyon obog toho men kiyatni men anggirang piren men asimbulal men paloho wahureg hubu lahaptuk ambeg indok yale fuhu.

¹¹Yale fuhureg wam uwag unuwet ahabet angge unggul ahinanggen al yohet angge wahureg

¹²Allahn fano peruk ambeg yalik lamin ulug Israel inap o sabo wiroho wereg ambehen wilip atug ul hik isaruk ambeg e emberimu embelug indok yale fusuhu.

¹³Allah umalikisi Israel inap obog tohowen siyag ane tul puk fug anggeyen NINIKNI Allahn tuk fug ibag ane sobir isalug alem siyahon eke tuhup angge famen siyag ane turukuk ulug wenggel ha fug angge welamuhup.

¹⁴Welamuhupteg inindi anggar aruhumu siyag ane turukuk ulug wenggel hahup halug NINIKNI Allahn siyag ane turukukon elehap tukag ulug wam sapi kabiniyon siyag teg elehon eke o sabo fanowon iraham walug watug

¹⁵NINIKNI Allah olohotma Israel inap onowesi arimanowen wam unggulmu ininggik umbuhupteg wam ino ware fuhup.

¹⁶Ware fuhupmu imam inap onowe suwon inowen wam amep minggiroho winon o sabo fanowon fam walug kulug

¹⁷wam amep we tot inggik tumen oko wahureg hili Mondabi Fanoma suwalehon alukema sum tuhuloho pilabehon fam inggik sabirenam ketne isahu.

¹⁸Ketne isahureg imam inowen wam amep tor angge oko walug amben fano angge yaltuk ambeg atog nganog teg ke fima-fima are rebelug wam amep winon sok aluke fil walug hubu lahaptuk ambeg alem ke hilili fuhu.

¹⁹Hilili fuhureg inggarehen siyag turukon fahet wam waroho yaltuk ane hikit toho wam sei obog toho hubu lahaptuk ambeg indok yale fuhu. Yale fuhureg wam unu obog toho oko walug Israel inap o sabo wiroho wereg ambehen wilip aruhureg indok yale fuhu. Ari roho turukmu Israel inaben siyag ane turukon NINIKNI Allahn elehap turuk laruhu.

²²Hit honowe ekeyen siyag ane timin puk fug anggeyen IKNI Allahn tuk fug ibag ane sobir isalug siyag ane tuhureg welaruhu.

²³Welaruhumu ap ekeyen komo ruruken indi anggar aruhumu siyag ane tirikik ulug wenggel hahu halug wam kambing yuhambukon siyag teg elehon eke Allah olohotma walug waruhu.

²⁴Walug waruhureg wam unggulmu inggik umbuhureg NIKNI Allahn siyag ane tirikikon elehap tukag ulug o sabo fanowon alukema wam waroho hubu lahaptuk ambohom paltuk ambeg wam ino ware fuhu.

²⁵Ware fuhumu imam inowen wam amep o sabo fanowon alukema walug tor angge inggik tumen wam waroho hubu lahaptuk ambeg atog nganog teg ke fima-fima are rebelug wam amep winon hubu lahaptuk ambeg alem ke hililoho hik isahu.

²⁶Hik isahureg Allah olohotman wam sapi eke nul ulug turuk ane hikit toho wam sei obog toho hubu lahaptuk ambeg indok yale fuhu. Ari roho turuk laruhu ane ari imam inowen hun aruwen siyag ane tirisiyon NINIKNI Allahn elehap tukag ulug turukmu siyag ane hit honowe inowen turukon Allahn ambolmayap turuk laruhu.

²⁷Olma ahun ekeyen siyag ane timin puk fug anggeyen NINIKNI Allahn tuk fug ibag ane sobir isalug siyag ane tuhureg welaruhu.

²⁸Welaruhumu ap ekeyen komo ruruken indi anggar aruhumu siyag ane tirikik ulug wenggel hahu halug NINIKNI Allahn siyag ane tirikikon elehap tukag ulug wam kambing heyon siyag teg elehon eke walug waruhu.

²⁹Walug waruhureg wam unggulmu inggik umbuhureg wam waroho yaltuk ambeg irahamen wam ino ware fuhu.

³⁰Ware fuhumu imam inowen wam amep o sabo fanowon alukema walug tor angge inggik tumen wam waroho hubu lahaptuk ambeg atog nganog teg ke fima-fima are rebelug wam amep winon hubu lahaptuk ambeg alem ke hilili fuhu.

³¹Hilili fuhureg Allah olohotman wam nul ulug turuk ane hikit toho wam sei obog toho wahureg NINIKNI Allahn amben fano pukag ulug hubu lahaptuk ambeg indok yale fuhu. Ari roho turuk laruhu ane ari imam inowen hun aruwen siyag ane tirisiyon NINIKNI Allahn elehap tukag ulug turukmu siyag ane olma ahun inowen turukon Allahn ambolmayap turuk laruhu.

³²NINIKNI Allahn siyag ane tirikikon elehap tukag ulug wam kambing heyon ubalma wam domba heyon siyag teg elehon eke walug wam teg laruhu.

³³Wam domba ino walug waruhureg wam unggulmu inggik umbuhureg wam waroho hubu lahaptuk ambohom paltuk ambeg wam ino ware fuhu.

³⁴Ware fuhumu imam inowen wam amep o sabo fanowon alukema walug tor angge inggik tumen wam waroho hubu lahaptuk ambeg atog nganog teg ke fima-fima are rebelug wam amep winon hubu lahaptuk ambeg alem ke hililoho hik isahu.

³⁵Hik isahureg Allah olohotman wam domba nul ulug turuk ane hikit toho wam sei obog toho wahureg NINIKNI Allahn amben fano pukag ulug hubu lahaptuk ambeg nungge-nungge yaltuk angge emberimu embelug indok yale fuhu. Ari roho turuk laruhu ane ari imam inowen hun aruwen siyag ane tirisiyon NINIKNI Allahn elehap tukag ulug turukmu siyag ane ap inowen turukon Allahn ambolmayap turuk laruhu imihin,” ulug Allahn Musa hiyag itfag.