Read Angguruk Yali IMAMAT 5 Bible Online

IMAMAT 5 - Angguruk Yali bible

IMAMAT 5

¹Allahn Musa fam ele hiyag utuk lit, ”Aben siyag ane turukon eleg amag ulug Allah fahet wam waroho hubu lahaptuk ane fahet nin eke iminon tu: Ap ekeyen siyag ane turukmu areyen yet hahu ano holuhu ano angge famen alem haltuk ambehen alem ino fahet ele hiyag isahu fug halug alem ino at ubam aruhu.

²Ap ekeyen wam pak mene pisanggo Allahn sen ha fug irisiyon wareg angge sen hahu angge famen indi anggat teg elehen siyahon sen harikik ulug wenggel hahu fug halug oho siyahon ubam tag teg laruhu.

³Ap ekeyen are siyahon eke hag eke hag ubam tag tehon fahet apelehen sen hahureg fobik eneg siyahon sen harikik ulug indi anggar aruhu halug ap inowen siyag ane tirikik ulug wenggel haruk laruhu.

⁴Ap eke indi anggat teg elehen fano ane ano siyag ane ano timinon fahet nele tem toho ihi uhureg fobik eneg nindi nonghong uruken nele si ane irikik ulug indi anggar aruhu halug alem ubam aruhu.

⁵Ap san alem eke hag eke hag arimano tuhu halug siyag ane tirikik ulug ap iniline fag toho uhu.

⁶Uhureg anden NINIKNI Allah indi siyahap tirikikteg hebeloho indi fanowap timin ulug wam domba heyon ano kambing heyon ano walug waruhumu imam inowen wam ino waroho hubu lahabuhu. Ari roho imam inowen turukmu NINIKNI Allahn ap inowen siyag ane turukon elehap tuhu.

⁷Ap ino anggengge eleg halug NINIKNI Allah indi fanowap timin ulug wam kambing domba ubalma suwe yalma piren ano pel hahon umalik piren ano walug waruhu. Suwe misig ino ap inowen siyag ane turukon eleg amag ulug Allah fahet emberuk lit pirenehon waroho hubu lahabuhu.

⁸Suwe piren itano imam og irik waruhumu atam imam inowen ap inowen siyag ane tirisiyon eleg amag ulug suwe misig ino unggul kong tuk fug angge anggolop kani roho ware fuhu.

⁹Ware fuhureg aben siyag ane turukon elehap turuk ane hikit toho suwe amep minggiroho hubu lahaptuk ambeg umbangguwag ke hilili felug suwe ebe ino amep pete roho hubu lahaptuk ambeg alem ke hilili fuhu.

¹⁰Suwe pirenehon ino imam inowen hubu lahaptuk ane hikit toho waroho hubu lahabuhu. Ari roho imam inowen turukmu NINIKNI Allahn ap inowen siyag ane turukon ambolmayap tuhu.

¹¹Ap ino inggikmu elehen suwe piren walug wam fug teg laruhu. At inowen siyag ane tirikikon Allahn elehap tukag ulug roti anggen fano roho lilibug tohon kubag toron misig walug waruhu. Aben siyag ane turukon elehap turuk ane hikit toho roti anggen fam e zaitun ahaluwe hililuk fug angge amben fano angge umbuk fug angge walug waruhu.

¹²Walug waruhureg imam og uruhumu roti anggen walug wahayon obog toho Allah fahet umbul ulug imam inowen enehangge roti anggen inggik indanggenma ololop toho wahureg aben siyag ane turukon elehap turuk ane hikit toho hubu lahaptuk ambeg yaltuk angge winon emberimu embelug NINIKNI Allahn amben fano pukag ulug indok yaluhu.

¹³Imam inowen ari roho turukmu ap inowen alem siyahon turukon Allahn ambolmayap tuhu. Roti anggen yaltuk elehon ino imam ino nahu,” ibag.

¹⁴Ari ibareg NINIKNI Allahn Musa fam nin eke ele uruk lit,

¹⁵”Israel inap hiyag isahunon tu: Ap ekeyen NINIKNI Allah og umon fahet indi anggat teg elehen og uruhu fug. Og uruhu fureg fobik NINIKNI Allah angge paleg lahiyon fahet og itmin ulug wenggel hahu. Wenggel hahureg wam kambing domba yuhambukon siyag teg elehon uang onggo paltuk ane o sabo fanowon inowen kong toho emberuson hikit toho walug waruhu.

¹⁶Walug waharuk lit ap inowen NINIKNI Allah og umon palu fuwaben minggiri fuhureg nin palu misig mangno rebelug walug imam og uruhu. Og uruhumu ap inowen siyag ane tirisiyon Allahn elehap tukag ulug wam kambing domba og irik waharukon ino waroho hubu lahabuhu. Ari roho imam inowen turukmu NINIKNI Allahn ap inowen siyag ane turukon ambolmayap tuhu.

¹⁷Ap ekeyen siyag ane timin puk fug anggeyen NINIKNI Allahn tuk fug ibahon sobir isalug siyag ane tuhu angge famen siyag ane tirikik fug puhu.

¹⁸Puhureg fobik alem nubam wereg ano eleg ano ulug wenggel hahureg Allah angge paleg lahiyon ulug wam kambing domba yuhambukon siyag teg elehon uang onggo paltuk ane o sabo fanowon inowen kong toho emberuson hikit toho imam og irik waruhu. Og irik waruhumu imam inowen wam ino waroho hubu lahaptukmu ap ino apelehen siyag ane turukon Allahn elehap tuhu.

¹⁹Ap inowen NINIKNI Allah angge palehon fahet og utuk lit indi fanowap turuk ane ari hag toho turuk laruhu,” ibag.