Read Angguruk Yali IMAMAT 6 Bible Online

IMAMAT 6 - Angguruk Yali bible

IMAMAT 6

¹ NINIKNI Allahn Musa hiyag utuk lit,

²”Israel inap hiyag isahunon tu: Ap ekeyen are anggengge foroho ano, areyen angge hirako foroho ano, og nimin ulug ele ine roho heng turukmu og utuk angge foroho ano, areyen angge longgo urukon hiyahalug foroho ano, winon oho foroho ano. Aren foroho angge arimano fahet awiya waruk lit we tem toho ihi ulug ele si ane uhu. Ele si ane uruk lit NINIKNI Allah indi siyahap tuhu angge famen

⁴fobik indi anggar aruhumu anden siyag ane tirikik ulug wenggel hahu. Wenggel hahureg nareyen angge hebeloho og itmin ulug areyen angge palu fuwaben minggiri fuhureg nin palu misig mangno rebelug are og uruhu. Siyag ane tirikik ulug wenggel hahu sambil ino eneg areyen angge palehon fahet hebeloho og utuk laruhu.

⁶Hebeloho og utuk lit ap inowen Allah indi siyahap tirikikteg hebeloho indi fanowap timin ulug wam kambing domba yuhambukon siyag teg elehon uang onggo paltuk ane o sabo fanowon inowen kong toho emberuson hikit toho imam ahun og irik waruhu.

⁷Og irik waruhumu ap inowen siyag ane tirisiyon NINIKNI Allahn elehap tukag ulug imam inowen wam ino waroho hubu lahabuhu. Hubu lahaptukmu ap inowen siyag ane turukon NINIKNI Allahn ambolmaya tuhu,” ibag.

⁸NINIKNI Allahn Musa fam ele uruk lit,

⁹”An nolohotma hubu lahaptukon fahet emberuk lahi ane haren Harun umalikisi men hiyag isahunon tu: Allah fahet yaltuk angge arimano hubanggo hubu lahaptuk ambeg indokma yaltukmen eneg o sakan turuk laruhu.

¹⁰Hubu lahaptukon imam inowen sum ebemon hekel sulumon fam yihikon men inggaliyangge mapmu reg laruhu ulug sum uyugmon hekel sulumon yihikon men wan teg laruhu. Wan teg lit yaltuk angge hubu lahaptuk ambeg indoken obog toho narukmu ul aruhuwon ino walug hubu lahaptuk ambeg iraham imbik wamburuk laruhu.

¹¹Imbik wambuhureg sum wan tehon ino nonggole felug sum winon wan tahureg ul ino oko walug Israel inaben o sabo wirig ambehen wilip atug siyengge emberuk ambeg hik isa laruk laruhu.

¹²Hik isa lahureg misihim oho hubu lahaptuk ambeg indok war aruhu rohon ulug likiya eneg yanggo welaruhuwon fam e yale felug emberimu Allah fahet yaltuk anggeyet At olohotman wam nuk oho lit sei yaltukonet embelug indok pisako hubu lahaptuk laruhu,” ibag.

¹⁴Allahn Musa fam ele uruk lit, ”Allah olohotma suburu roti anggen yaltukon fahet emberuk lahiyon tu: Aben roti anggen walug waharuk lamuhubon arimano hun Harunen ondohowonen endebuhubon ekeyen Allah olohotma embemin ulug hubu lahaptuk ambeg alukema walug laruk laruhu.

¹⁵Roti anggen walug wahason Allah fahet umbul ulug imam inowen enehangge roti anggen e zaitun ahaluwe hililihon inggik indanggenma ololop toho wahureg amben fano angge roti anggen emberimu embelug walug wamuhubon obog toho men hubu lahaptuk ambeg embelug NINIKNI Allahn amben fano pukag ulug indok yaltuk laruhu.

¹⁶Roti anggen yaltuk laruhu fuhon arimano NINIKNI Allahn tohon famen hun Harun inowen ondohowonen endebuhubon naruk lamuhup ulug NINIKNI Allahn kong toho emberisi. Wam aben siyag ane turukon elehap tukag ulug walug waharukon men Allah indi fano amag ulug walug waharukon men NINIKNI Allah fahet emberuk angge re mondabi fano wereg hag toho roti anggen arimano oho mondabi fano reg. Mondabi fano rehen imam inaben roti anggen arimano suwap turuk angge wa fug angge wirako o winonen na fug angge o sabo fanowon owahalman eneg naruk lamuhup.

¹⁸Allah fahet emberuk angge arimano minggiroho Harun umalikisiyen endetil laruk lamuhubon ap angge obog tohowen naruk lamuhup ulug Allahn kong toho emberisi. Allah fahet emberuk angge arimano usa angge ulug ap winonen saplangge sen haruk lamuhup fug, sen harukon arimano siyag amuhup,” ibag.

¹⁹Ibareg NINIKNI Allahn Musa fam nin eke hiyag utuk lit,

²⁰”Harun imam welaruhun ulug e zaitun ahaluwe unggulmu are rebehun sambil ak turuk lit at men aren ondohowonen endebuhubon at ubalmangge in atuk lamuhubon arimano menen likiya hupmu NINIKNI Allah fahet emberuk lamuhubon tu: Likiya eneg roti anggen fano roho lilibug tohon kubag misig pul ke minggiroho emberuk lit winon minggiroho hupmu fahet emberuk lamuhup.

²¹Roti anggen arimano men e zaitun ahaluwe men tag toho wiratuk angge tuwalehon ine angge besi wirihon fam wiratuk lamuhup. Wiratuk lamuhup angge arimano kuroho NINIKNI Allahn amben fano pukag ulug indokma yaltuk lit hubu lahaptuk lamuhup.

²²Harunen ondohowonen endebuhubon at ubalmangge imam in atuk lamuhubon arimanowen roti anggen arimano wirako NINIKNI Allah fahet indokma yaltuk laruhu ane ari mondabi welaruhuwen Allahn kong toho emberisi.

²³Roti anggen imam ininggarehen Allah fahet emberukon arimano na fug angge obog toho indokma yaltuk lamuhup,” ibag.

²⁴NINIKNI Allahn Musa fam ele uruk lit,

²⁵”Siyag ane elehap turukon fahet emberuk lahi ane haren Harun umalikisi men hiyag isahunon tu: NINIKNI Allahn aben siyag ane turukon elehap tukag ulug wam walug waharukon ino mondabi fano rehen wam waroho hubu lahaptukon paltuk ambeg o sabo fanowon alukeman ware fuhup.

²⁶Ware fuhupmu imam wam ino indokma yaltuk lit hubu lahaptukon inowen wam unu minggiroho emberukon naruk laruhu. Naruk lit Allah olohotman namin ulug o sabo fanowon owahalman naruk laruhu.

²⁷Wam unu ino Allah fahet emberuk angge re usa ulug ap winonen saplangge sen haruk lamuhup fug, sen harukon arimano siyag amuhup. Wam ino amep sililim toho ap enesum fam laruk halug Allahn tohon ulug siye emberuk ambehen ik umaho feruk lamuhup.

²⁸Wam unu osoho felug esetuk anggubag kinang fam wirihon ino arap toho hik isaruk lamuhup. Kubag ine angge tembaga fam wirihon fam esetuk lamuhup halug fano roho ik umaho feruk lamuhup.

²⁹Wam unu ino Allah ngi regma usa ulug we imam inap unumalikisi abon men eneg naruk lamuhup.

³⁰Aben siyag ane turukukon Allahn elehap tukag ulug wam ware feruk lamuhupmu imamen siyag ane ino eleg amag ulug wam amep minggiroho o sabo fanowon fam walug kuhumu wam unu tor angge oho na fug angge obog toho indokma yaltuk lamuhup,” ibag.